martes, 4 de enero de 2022

Puirtu Braña (Ayer) - Peña'l Vientu

19 d'Avientu de 2021

Track: Puirtu Braña (Ayer) - Peña'l Vientu

Continuamos col entamu de temporada ivernal, averándonos hasta'l Puirtu Braña nel conceyu d'Ayer, onde dende cuantayá teníemos pendiente facer ascensión a la Peña'l Vientu, monte que ya ficiéramos va munchos años, amestándo-y la Peña Los Fornos y el picu Cascayón.

Esta vegada, dibemos dixebraos en dos grupinos, los montañeros equipaos con crampones, marañones, piolé y demás y los esquiadores, que diben averase hasta'l colláu L'Acebal y restolar  cuales yeren les meyores opciones pa pegar una bona baxada.

Partimos pelín abaxo del Puirtu Braña al entamu de la pista Wamba

Aportamos al Puirtu Braña y como ye vezu, baxaremos en coche hasta l'entamu de la pista Wamba, onde una retafila coches y furgonetes tan aparcaes a la vera la carretera. Nós, asitiámonos como podemos y entamen los preparativos garrando los preseos necesarios pa la ruta.

Avanzamos apriesa pela pista Wamba ascendiendo pel valle Los Fornos

Llueu d'un ratín, nos que los nervios pueden a Kíla, corriendo peles ñevaes praeres al llau de la carretera, somos a salir pasaes les diez y media de la mañana. Entamamos con ritmu, compartiendo pasu con bota, ensin falta crampón al llau del grupu esquiador, pero contando con que su baxada va ser munchu más rápida, los caminantes garramos ritmu, adelantando na Vega Los Fornos, a tolos marañoneros, esquiadores y demás xente de monte que xuntóse nesti preciosu día.

Día increyible pa esfrutar de la ñeve pel cordal cantábricu

Con pocu más continuamos camín, hasta aportar a la mecedura de les riegues de Los Fornos y los Gabitos, onde pocu más alantre, abandonamos lo que sería la pista que va pal colláu L'Acebal y llagu Ubales, p'ascender una llomba penriba la riega L'Aliviada, qu'avísanos a les clares de que los crampones van ser necesarios.

Ascendemos la vallina final hasta'l colláu les Aguyes cola ñeve nun estáu perfectu pa crampones
 
Vamos con cuidadín, ya que Vane nun tien crampones y va en marañones, asina qu'avanzo a la par d'ella, por si resbaría, demientres que Benjamín continua'l so camín y Mario, dase cuenta que perdió'l móvil y tien de baxar a buscalo per onde punximos los crampones.
 
Mientres tanto, los esquiadores comuníquenme que van dir hacia'l Picu Cascayón que tien unes condiciones pa esquiar brutales, siendo una pala sur menos xelada que la de la Peña'l Vientu.  D'esti xeitu, continuo ascendiendo con Benjamín y Vane, hasta que los marañones son peligrosos pa siguir y con bota Vane, nun atrévese a bregar con ñeve blando y más resbariosa del accesu a la cresta final.

Benjamín y yo nel cumal de la Peña'l Vientu (2001 m)

Llueu de dexar a Vane a salvo nuna peña, xubo a pinchu hacia la cresta y facemos cumal Benjamín y yo, nos 2mil raspaos de la Peña'l Vientu y coles mesmes, baxo pela mesma pala hacia Vane y descendemos con cuidadín hacia'l colláu Les Aguyes, onde espéranos Benjamín.

Nun vemos que Mario xuba hacia la Peña'l Vientu, asina que decidimos continuar la ruta, desdexando la opción de xubir a Les Rapaínes, ya que lleva cubierta con una boina tola ruta y el vientu sopla enforma na parte alta de los cumales.

Descensu pel valle Los Pozos hasta la riega L'Aliviada

Coles mesmes, garraremos tol valle Los Pozos, pa facer una baxada máxiga, con unes vistes hacia tolos cumales de la raya pente Asturies y Llion dafechu ablucante. Dende'l Picu Torres, pasando pel Valmartín, Porru Blancu, L'Arenal y Entecampos, hasta'l Cascayón onde tan los collacios esquiadores, son too pales sur con pendientes perfeutes pal esquí de monte.

Descendemos tol valle de L'Aliviada sollerte a les cayíes hacia la riega

Aportaremos a la riega L'Aliviada, dando fin a la vallina los Pozos y siguiremos el so cursu con cuidáu, al tener dellos tramos con muncha acumulación de ñeve y posibles cayíes hacia la riega, hasta salir a la parte baxa, onde tendremos que desvianos al mayáu de L'Aliviada pa continuar hacia la Puente Wamba.

Con pocu más, qu'esfrutar de les vistes hacia'l Picu Tonéu o les peñes Requexines y L'Ausente, daremos por finalizada la ruta, magar de 4 hores y media, nel que percorrimos casi 10 km de percorríu perfeutu pela ñeve, con un desnivel de +/- 570 m

Camudando'l Camín nel Puirtu Braña

No hay comentarios:

Publicar un comentario