Cobayos (Riosa) - Picu Moncuevu

6 de Xineru de 2021

Track:  Cobayos (Riosa) - Picu Moncuevu

Llevaba años cola idega de meteme nel mundiu del esquí de monte, pero como too nesta vida, llega cuando tien de llegar y aprovechando que dellos esquiadores metiéronse al GM Xuan de la Borrina, yera'l momentu pa intentar deprender a esquiar de la man d'Anna y Mario.

Equipín d'Esquí montuno del GM Xuan de la Borrina

L'añu pasáu tuviera una intentona en pista, teniendo la mala suerte de mancame nuna rodiella, nuna baxada na que pegué un fogón curiosu jeje, así qu'esti añu vendiera'l material de l'añu pasáu y mercara otru más afayaizu con tables más curties y manexables, más les botes que me faltaben pa completar tol equipu de traveseru.

Portiamos delles envueltes hasta la Cueña Les Cabres

Magar de dellos díes en pista, nos que deprendé a manexar la cuña ensin matame y con un pelín más de confianza, el día de reis averámonos hasta L'Aramo, contando en verdá qu'hubiese más ñeve, aportando col coche hasta Cobayos, lo cual nun albidraba grandes maraviyes esquiadores, ya que normalmente en Viapará casi toca aparcar pa dir de travesía.

Entama la foqueada peles envueltes de L'Aviru

Llueu, de delles envueltes portiando'l material, a metá de la Cueña Les Cabres, ya pudimos entamar a foquear, dando preste a ún de les coses que más ilusión facíame, ya qu'onde tean los esquís que se quiten los marañones cuando les condiciones de ñeve son afayaices claro ta... con ñeve xeláo, bota y crampón y a furrular.

Aportamos a L'Angliru nun día máxicu enforma

Pasamos les envueltes de L'Aviru y aportaremos a L'Angliru nun día ablucante, de sol y cielu azul con un toque máxicu metiéndose la borrina dacuando. A estos altores, ya sabíen los collacios, que la ñeve costra yera lo pior pa intentar meter una baxada decente, así que decidimos foquear a la gueta de dalguna baxada bona pa cuando les condiciones seyan meyores.

Averámonos hacia la bas del Picu Moncuevu

A la fin, dempués de ver bones posibilidaes nel Barriscal pa otru día, vemos una evidente canal que xube hacia'l Picu Moncuevu pela so cara Este, asína qu'averámonos hasta ellí, ascendiendo los collacios y Kíla hasta la parte alta del Moncuevu (nel track amuésovos l'ascensión de va añinos) pa intentar un descensu que fue una auténtica aventura cola mala ñeve esistente.

Vistes al macizu de Penubina dende lo alto del Moncuevu

Descansadín d'echame unes rises con dalguna xostrada pela ñeve costra, continuamos foqueando hacia L'Angliru de nuevu, hasta despedinos del ivernal paisaxe de L'Aramo, foqueando hasta la parte alta de la carretera onde podíemos quitar los pelleyos de foca ya intentar un descensu.

Tornamos travesando L'Angliru con vistes hacia l'occidente astur

Como non, los esquiadores del grupu, pudieron esfrutar d'un descensu relaxáu pela carretera, demientres un servidor y escolín del esquí, baxó como pudo, cola cuña, aportando a la furgo con una petada gloriosa de frenar peles cuestes pa nun matame, jaja.

Ensin más, primer foqueada de mi vida, na qu'esfruté munchísimu y ye que'l día nun yera pa menos. El track fae un amiestu d'esta foqueada más l'ascensión al Moncuevu de cuando ficimos tolos cumales cimeros de L'Aramu. En total, sedrán unes 4 hores y media d'actividá, con +/-600 m de desnivel y casi 10 km de percorríu.

Camudando'l Camín per L'Aramo ivernal