L.lumaxu (L.laciana) - Picu Muxivén

12 d'Avientu de 2021

Track: L.lumaxu (L.laciana) - Picu Muxivén

Entamábemos temporada ivernal, recuperando una ruta que nun pudiéramos facer poles restriciones covidianes pente paises, del iviernu anterior, asina que tiramos con ganes hacia L.laciana, p'ascender el Picu Muxivén, el cuál fadrémoslu dende'l guapu pueblu de L.lumaxu.

Primer día de monte, magar de sofrir tres selmanes de temporal de continuu y llueu de marchar bastante de ñeve per semana, topámonos col pueblu llimpiu y la ñeve duro por mor de les temperatures. Asina, que desdexamos los marañones y preparamos el piolé y los crampones pa dir que seguridá.

Partimos del pueblín de L.lumaxu (1397 m) col Muxivén detrás

Saldremos del aparcaderu al final del pueblu, onde tenemos indicada una llarga y guapa ruta hasta'l Cornón y vamos facelo baxando hacia la riega la Mozarra la cual travesaremos, p'ascender hacia la cabaña la Polvorosa, per bon camín con restos de ñeve.

Salimos pela Polvorosa hacia Las Campas

 

Bien ceo, camudamos los restos de ñeve y barru xeláu, pero un tramu abegosu de ñeve y urcies, nel que toca lluchar fundiendo la pata hasta la rodiella en delles vegaes. Por suerte, siguimos avanzando hacia Las Campas, onde ya topámonos con ñeve de continuu con un bon espesor y entamamos a ganar les vistes hacia los montes d'enfrente'l valle, como La Cañada enriba de Güergas de Babia.

Averámonos hacia l'arista del picu Muxivén con vistes hacia l.laguna Los Buéis

Travesaremos un tramu de vallines, col envís de ganar l'arista que ya tien de llevanos hacia'l Muxivén y una vegada que tamos nella, tan sólo toca dir abriendo buelga y esfrutar de les vistes, ya seya hacia la fastera somedana y babiana al oriente o pal occidente, alloriando con toles opciones ivernales nos montes de Degaña, Ibias, Cangas del Narcea, L.laciana.... una auténtica pasada.

Esfrutando del crestéu hasta topanos col cumal del picu Muxivén al fondu

Según avanzamos más guapa tórnase l'actividá, restolando per onde tenemos meyor ñeve, intentando evitar tramos de ñeve blando averaos a peñes normalmente y evitando les cornises, ya que los ádenes tan al orde del día, con varies purgues evidentes hacia la l.laguna los Buéis.

Preciosu tramu final hasta encumal el Picu Muxivén

Con pocu más fadremos el tramu final d'arista caún al so ritmu, esfrutando d'esti monte tan afayaizu pa les ivernales y aportando al cumal de 2031 m magar de pocu más de 3 hores d'ascensión. Fuelga dicir que tomámosnos con muncha calma la xinta, sentaos nel cumal intentando aldovinar tolos maraviya de montes que nos arrodiaba.

Cumal del Muxivén con tol grupu feliz

Llueu de media horina de descansu, continuaremos crestiando hacia'l cumal norte del Muxivén, col mesmu altor y echamos una güeyadina a la baxada pela arista norte, que tien de llevanos pali pali, hasta'l Picu'l Rebezu (1921) primeru y llueu ensin fallu hasta'l Colláu la Bobia (1790 m).

Baxamos al colláu la Bobia (1790 m) onde garraremos descensu hacia L.lumaxu

Nel colláu La Bobia, entamaremos un prestosu descensu la riega Xistral, tando sollertes colos tramos xelaos, ya que'l monte dexa esta fastera a la solombra tol día y la ñeve ta perdura, anque siendo esti un tramu de poca inclinación, nun vimos la necesidá de sacar los crampones.

Siguiremos la riega Xistral hasta topar la pista de la Mozarra hasta L.lumaxu

Con pocu más, siguiendo un pocu la traza de la riega Xistral, topamos un camín que sácanos a unos praos, que vamos cruciando hasta dar nuna pista, que llévanos hasta la cimera que vien de tol valle de la Mozarra, la cual fainos aportar cómodamente de nuevu al pueblu de L.lumaxu.

En resume, día perfeutu pa esfrutar d'esta ascensión ivernal seliquina a un monte prestosu y cimeru del Cordal Cantábricu, llevándonos un total de 6 hores d'actividá pa percorrer 9 km con un desnivel +/- de 670 m,

Kíla esfrutando del Cordal Cantábricu ñeváu