7 de Payares de 2021
Track: Robrigueru (Valle Bah.u de Peñamellera) - Cuñaba - Picu Torna Las Güertas
Continuamos cola temporada 2020-2021 del Grupu Montaña Xuan de la Borrina, garrando pa la ocasión una ruta propuesta por Carlos que nos diba llevar a conocer dellos caminos d'antaño pente los pueblos del Valle Bah.u de Peñamellera de Robriguer y Cuñaba.
Ye una ruta perfeuta pa temporada ivernal, ya que nun día espeyáu, cosa que nun tenemos, tendríemos unes vistes bien guapes de Picos d'Europa ñevaos. A la escontra, tocónos un día perfríu y pesie a conducir con bon tiempu pela mañana, aportamos a Robrigueru, teniendo una boina penriba l'Escobiu la Ermida que nun mos da muncha confianza de cara a tener grandes vistes.
Puntu de salida en Robrigueru (106 m)
Salimos del pueblu hacia la parte alta, para garrar al pocu una pista que dirá empobinándonos en direición a la Ermida y más en concretu hacia'l mayáu de Tresqueh.u, llugar nel que garraremos el primer de los senderos del día, el de Peñalba.
Averámonos per pista hacia Tresqueh.u pa siguir al senderu Peñalba
De priemeres caleyaremos baxo l'abellugu de grandes castañales, pa dempués pasar al típicu amiestu de tarrén calizu y encinares de les fasteres más orientales d'Asturies. Al empar, diremos averándonos hacia l'abilsu del rigu Deva, retorciéndose'l senderu pente les peñes con dalgún pasín con bones y direutes vistes del escobiu.
Continuamos pegaos a Peñalba hacia'l Valle de Valdanza
Dempués d'una primer parte más marcada, xustu al final del senderu de Peñalba de camín al valle de Valdanza, tendremos un pindiu tramu de yerba llargo, que dificulta siguir la traza, anque los dixebraos restos de cabañes van llevándonos al nuesu destín: el mayáu de Valdanza.
Aportamos a mayáu de Valdanza onde queden restos de cabañes
En Valdanza, garraremos aliendu un segundín pente'l ganáu y ganamos un pelín más d'altor pa tomar un senderu, que devúelvenos hacia la Ermida, más en concretu, pasaremos penriba d'Estragüeña, llugar de bonos seutores d'escalada y nel nuesu camín hacia la H.orca La Maza, llugar de bones vistes hacia'l macizu Oriental de Picos .
Continuaremos hacia'l H.orcáu La Maza onde ganamos vistes hacia'l Cuetu Cerralosa
Esfrutaremos de les vistes hacia'l Cuetu Cerralosa y lo pocu que vemos de les falderes ñevaes del macizu d'Andara y entamaremos una guapa y pindia baxada pela Concha'l Pino, camín armáu que nos fadrá travesar la canal del Requeh.u primeru y dempués la d'Ente Las Llambrias, de camín al pueblu de Cuñaba.
Descendemos hacia Cuñaba travesando la canal del Requeh.u pela Concha'l Pino
En tou momentu, el desaniciu d'estos caminos d'antaño de pastores, fai que tengamos qu'andar sollertes a la traza, pero ensin mayores problemes, aportaremos al guapu pueblu de Cuñaba, onde pegaos al so llavaderu, pararemos a xintar y descansar un ratín.
Arribamos a Cuñaba a xintar desdexando travesar la canal Ente las Llambrias
Coles piles cargaes y prometiéndonos pa otra vegada una visita al H.uracu, saldremos de Cuñaba siguiendo les marques del PR de la mina L'Argayón, caleyando primeru per un guapu camín empredráu qu'aina tresformarase nuna pista formigonada mui pocu agradable d'andar hasta los ivernales de Tremañu.
Entamamos ascensu per pista hacia Tremañu siempre con vistes de la Ermida
En Tremañu, el día ábrese un pelín amosándonos delles vistes que nun tuviéramos entá, acolumbrando llugares ya conocíos y alcordándonos de rutes que ficieramos pela contorna como l'ascensión al Samelar dende Bejes o la xatada que metiéramos dende Mier pa conocer tola fastera de la Cabeza Viguera en travesía hasta Trescares.
Demientres charramos de toes rutes pasaes, vamos saliendo de Tremañu, hacia l'oxetivu del día, la Peñe Cerréu, qu'anque tien un altor pocu significativu, 895 m, va danos esi puntín montuno, con una cresta entretenía y un pieslle de ruta perfeutu siendo un mirador increyible tanto pal Cuera y costa oriental, como pa la fastera occidental cántabra.
Facemos cume nel Picu Torna Las Güertas (895 m)
Ensin más, col cumal fechu, decidimos descender qu'a lo tuntu, tomámosnos el día con calma y entama facese tarde, poro tornamos los nuesos pasos pela entretenida crestina del Cerréu y baxamos a pinchu hacia los praos de los H.uncales onde siguiremos baxada pelín más abegosa hacia'l Cantu Los Praucos.
Descendemos pelos H.uncares hacia'l Cantu Los Praucos
Nesta collada, tendríemos enllaz dende'l Valle de Valdanza, pa garrar el siguiente camín de descensu, la calzada Coperi, amplia, armada y empredada calzada qu'en varies envueltes va faciéndonos perder desnivel de vuelta hacia'l pueblu de Robrigueru.
Garraremos la Calzada Coperi pa baxar de nuevu hacia Robrigueru
Coles últimes lluces del día y cola prestosa presencia d'un de los montes más guapos d'Asturies, la Pica Peñamellera, vamos entrar de nuevu nel pueblu de Robrigueru, con ganes ya de mudanos de ropa y desplazanos hasta Panes, pa tomar la mui merecida cerveza de rigor.
Aportamos a Robrigueru col día dafechu amurniáu
En resume, ruta que con un día más claru, diba ser muncho más vistosa cola presencia ñevada de los Picos, pero que d'igual mena túvonos entreteníos durante 7 hores y media de camín, nos 14 km de percorríu col esfuerzu de +/- 1085 m de desnivel acumuláu, siendo claramente un ruta pelín quebrapates.
Como siempre, da-yos les gracies al GM Los de las Claras, de los que'l nuesu compañeru Carlos, sacó la idega perfeuta pa conocer un pelín meyor esta fastera asturiana del Escobiu de la Ermida, más conocíu por mí, poles esguilaes que poles rutes de monte.
Camudando'l Camín pela Peñamellera
No hay comentarios:
Publicar un comentario