El Cadavíu (Llangréu) - El Cau - El Cugullu - Les Cruces - Rondiz - Cabaños

4 d'Avientu de 2021

Track: El Cadavíu (Llangréu) - El Cau - El Cugullu - Les Cruces - Rondiz - Cabaños

Fartucos de tres selmanes de mal tiempu, ensin poder salir de monte, ensin poder esguilar, metíos nel rocódromu entrenando, vimos una mañana de ventana de "bon tiempu". Dalgunos intentaron salir a esquiar a pista y yo que nun tenía material entá, decidime a tachar un techu de conceyu, preparando una circular per Llangréu.

La idega yera facela corriendo aprovechando esa ventanina y sumáronse a la idega, Iso, collaciu d'esguilaes varies y Jandro'l so hermanu, que nun ta de correr anguaño, pero dába-y duru a les carreres pel monte, asina que yera un bon equipu, contando como siempre con Kíla, motivada a muerte pa salir al monte.

Partimos d'El Cadavíu (244 m) a les puertes del ecomuséu del valle Samuño

Pelín enantes de les 11 la mañana, aparcaremos enfrente'l Ecomuseo del Valle Samuño, pa salir cuesta riba, per carretera pa garrar una pista a la manzorga, que tien que dir llevándonos hacia les cases de Trichuru, travesando siempre per pindios senderos y pistes hacia'l pueblín de la Peña Utiillu, ablucando colo guapo de la so dimposición en tola faldera y de lo calteníu y arregláu de toles cases.

 

Continuamos de la Peña Utiillu hacia'l Cau

Saldremos del pueblu y al pocu de garrar la carretera metémonos nun guapu camín que traviesa'l monte pa salir a unes pistes que lleven hacia'l picu L'Aguila, dexando esti a la mandrecha, pa faldiar per pista hasta salir al pueblu del Cau, onde topámonos con dellos monumentos a la minería y pola llibertá ya'l socialismu.

Dexamos los pueblos a la fin pa salir a pistear pel monte la Cuetra

Esti será l'últimu poblamientu llangreanu d'esta xerra Rebullu, saliendo nel Cau al monte de continuu, averándonos lo primeru hasta'l Picu la Cuetra de 812 m. Llueu de tachar esti auténticu bardial, continuaremos corriendo hasta la Vega Espines, onde topámonos con marques de PR y del trail de Santa Bárbara, que corríase al día siguiente, casualidaes de la vida.

Faldiamos el picu Espines encumando a posteriori el picu Cugullu

Siguiendo les marques, vamos llibrar el picu Espines pela manzorga, aportando al mayáu Porrín, onde aparte de ganar vistes hacia'l Picu Polio, más cerquina y a L'Aramo más a lo lloñe, podremos crestiar tola llomba que llévanos al techu de Llangréu: El Picu'l Cugullu.

Cumal del techu de Llangréu: El Picu'l Cugullu (1019 m)

Malpenes tamos nunos minutos nel cumal, echándo una güeyada a tolos montes que nos arrodien, anque cola ñube metía, nun tenemos suerte pa ver tol macizu de Penubina nel so esplendor, pero bono, el solín reconfórtanos casi per primer vegada nel día y anímamos a siguir crestiando a la carrera tol cordal d'Urbiés.

Descendemos pela Campa San Xusto hacia la Campa d'Urbiés

Aninmaos pel solín, baxaremos a fueu hacia la Campa San Xusto, pa continuar per bonos senderos hasta la Campa Urbiés, onde ya garraremos amplia pista, cruciándonos con dellos cazadores, col envís de continuar hacia l'Altu La Mozquita, puntu nel qu'entraremos na xerra La Espada.

Namái poner pie nesti xerra de la Espada, que vamos usar pa baxar, Kíla y yo, animámonos a tachar otru vértice xeodésicu, lluchando un pocu coles cotoyes hasta dar colos 960 m del cumal, momentu nel que xintamos una barrina enerxética y echamos un vistazu dende lo alto, a los compañeros que continuen cordal alantre.

Ascensión al Picu Les Cruces (960 m)

Repuestos cola barrina, baxamos a fueu Kíla y yo per senderu hasta la Vega Les Cruces, siguiendo un guapu crestéu, pa desvianos dempués per un PR hasta'l embarráu mayáu Solis, siguiendo per sienda a media faldera hasta'l mayáu Miguel, onde veo que nun atopo a los collacios. 

 

Nel intre, pónse a esbastiar y un vientu fríu xélanos a la espera de los compañeros, llamada y que quedaren per detrás porque perdiéronse. Indíco-yos el camín a siguir y voi corriendo despacín hasta que nos pillen na Tixera.

Continuamos pela Xerra la Espada hacia'l picu La Rondiz

Dende equí, ascendemos apriesa hasta'l Picu La Rondiz (734 m), caberu oxetivu del día y baxamos peles marques del trail pa dexales y siguir hacia'l colláu Calabadón, onde se nos va la pinza siguiendo una cómoda pista y terminamos en Cabaños, onde rindimos homenax al gran cantaor asturianu y miramos el gps, pa ver como podemos descender hacia'l valle Samuño.

Baxamos de la Rondiz hasta Cabaños pa continuar de vuelta al valle Samuño

Por suerte, vemos un camín a la salida'l pueblu, hacia les Lloses y vamos faldiando'l monte hasta la Muela, onde ya sí que garramos una pista que déxanos pembaxu del pueblu de Pampiedra, garrando carretera qu'en rápida baxada, déxanos de nuevu nel aparcaderu del ecomuséu del Valle Samuño.

 

Aportamos a la furgo, onde mudámonos de ropa y salimos como tiros pa L'Espumeru na Felguera, pa esfrutar d'unes riquísimes cerveces y pizzes, pa recuperanos de les 4 horines de carrera nes que ficimos un percorríu de 21,5 km con un desnivel acumuláu de +/-1035 m.

Camudando'l Camín n'Asturies minera y roxa