Isoba (Porma) - Peñón San Justo - Valle Pinzón

30 d'Agostu de 2020

Track: Isoba (Porma) - Peñón San Justo - Valle Pinzón

Siguimos intentando compensar los meses perdíos pola pandemia, saliendo al monte en dómines nes que davezu, caún ta más bien a les sos hestories, ya seya peles sableres o faciendo proyeutos personales nos Picos.

Poro, finales d'Agostu y con un día pelín frescu pa esta dómina, vamos facer una salidina pa la comarca del Porma, más en concretu hasta Isoba, onde son munches les opciones que tenemos pa facer monte. Una d'elles y que siempre tuve na tiesta yera l'ascensión al Peñón San Justo, una mole de casi dosmil metros dafechu asitiáu en fastera llionesa.

Partimos a la vera'l llagu Isoba (1410 m)

Saldremos del aparcaderu del Llagu Isoba, penriba'l pueblu y bordiándolo pela mandrecha, averámonos hasta'l rigu Isoba, onde alcontramos delles guapes poces y una ponte pela que lu travesamos col envís e garrar la primer panda qu'alcontremos, pa dir ganándo-y metros a esti Peñón San Justo.

Cruciamos el rigu Isoba y ascendemos hacia'l Peñón San Justo

Hai un clásica circular, bordiando tol peñón que tiraría pel valle Llangréu, pero nós ya vamos dir restolando senderinos pela panda, dexando una vallina a la nuesa manzorga, hasta aportar a l'amplia arista Oeste pela qu'aportamos sele al cumal de 1960 m del Peñón San Justo.

Cume fría nos 1960 m del San Justo

En hora y media, taremos nesti guapu cumal, que nun mos va dexar tar relaxaos por mor del fríu, poro decidimos descender viendo les ñubes qu'amenacen dende'l Puirtu Braña. Desfadremos l'arista p'abaxo y vamos empobinanos per una vallina hacia'l colláu Pinzón, aportando a un claru, onde tomamos un senderín que va llevanos a una viesca increyible.

Aportamos a un claru y descendemos per una increyible viesca

Podríemos dar un pelín nesi claru hacia atrás y garrar la cómoda pista, pero nun podiemos perder la oportunidá de travesar esta viesca tan guapa. Tan sólo, tenemos que siguir unes rodaes y dexanos cayer per senderín mediu marcáu y caleyar en silenciu pel fayéu que nun mos va dexar indeferente, hasta topar la pista que baxa del colláu Pinzón.

Garramos pista y el día ponse a orbayar acompañándonos hasta'l rigu Porma

Esperaremos un ratín a Benjamín, que como siempre testerón, decidió dir per onde consideró y acabó nel colláu Pinzón, envede baxar con nós pela viesca. Arrexuntaos, facemos tola pista del valle Pinzón, baxo un orbayu finu, hasta aportar a la mecedera los rigos Pinzón y Páramu onde fórmase'l rigu Porma, casí al llau de la perguapu tabayón del Pinzón.

El día ameyora y diremos descubriendo saltos d'agua per tol valle

Dende equí, tendremos la suerte que'l día escampla y cola calma diremos restolando más llugares ablucantes, enllenos de vida y agua, hasta axuntar los valles Pinzón e Isoba, empobinándonos al d'Isoba que nun sele ascensu diba llevanos hacia'l nuesu entamu de ruta.

Visitamos el Pozu La Leña enantes de continuar hacia Isoba per Entrevados

Si col valle Pinzón, quedáramos a gustu en cuanto a guapura, el d'Entrevados, cola visita al Pozu La Leña, nun va quedase atrás, aportando a la parte alta con un solín que déxanos un tastu perbono con esta curtia pero completísima ruta.

Aportaremos al Llagu Isoba, magar de dalgo menos de 6 hores de caleyar, con un bon monte algamáu y una circular enllena de vida, agua, viesca, nun percorríu que malpenes pasa de 13 km con un desnivel acumuláu positivu de 835 m, poro nun hai disculpa pa esfrutala enforma.

Camudando'l Camín con Sua