martes, 27 de octubre de 2020

Vega Urriellu (Cabrales) - Picos d'Arenizas

11 d'Agostu de 2020

Track: Vega Urriellu (Cabrales) - Picos d'Arenizas

Un martes cualquiera d'Agostu, llama a files Ana, llibra de curro y que si pueu pillar un día. Col cuentu de la pandemia, tengo díes ensin gastar abondo, asína que sobre la marcha pidimos el día, preparamos una mochilina y restolo na carpeta de pendientes que tenemos de menú del día.

Coménto-y la xugada y nun perdemos tiempu, vamos intentar el crestéu de los picos d'Arenizas, que llevo ensin pisalos dende la nuesa primer Travesera. Daquella, ficiéramos un hombrín y aportáramos a la primer Areniza si contamos dende la h.orcada d'Arenizas Baxas o de Caín.

Partimos de Pandébano (1080 m)

Esta vegada la idega ye salir dende Pandébano y pegar tola tirada nel día, pa lo que supuéstamente teníemos tiempu de sobra, anque esmolecíanos un pelín una posible tormenta pa les 5 la tarde. Pa entamar, ya nun fuimos capaces d'aportar a Pandébano por mor del estáu de la pista, quedanos pocu más arriba de los ivernales de Sotres, asina que sumémos-y una tiradina en km y tiempu perdíu.

Coles pates calecíes, siguimos como aviones perpasando bien de xente hacia la Vega Urriellu, camín perconocíu pa la mayoría de xente montañero y agora domingueru postpandémicu tamién. Como siempre, les vistes del Picu, el Neverón o los Albos, van entreteníendonos, anque l'alderique con Ana siempre ye faltón y les rises tan aseguraes.

Facemos camín hacia la Vega Urriellu con un día perguapu de solín

Nun paramos nin al café na vega y siguimos baxo un preciosu cielu azul hasta la gargantada'l H.ou Sin Tierre, al cual tendremos que descender, pa siguir camín hacia la gargantada Los Boches. Pali, pali, vamos viendo'l nuesu oxetivu, qu'entama por buscar camín hacia la Collada Labrada.
 
Mentantu, vamos echando una güeyadina a tolos montes que conocemos y a dalgunos que falten por completar, quedándome sobretou ganes de volver a Los Campanarios, del que sólo ficiéramos Fernan y yo, el primeru dempués de los dos cumales de la Morra.

Perpasamos la vega Urriellu pa travesar el H.ou Sin Tierre pasando al de los Boches

Nuna hora dende la Vega Urriellu, tamos na gargantada Los Boches, pasu al H.ou Los Boches, al cual descendemos pa garrar un senderín que sal dende la entrada hacia los H.orcaos Roxos a la mandrecha, empobinánodons hacia la Collada Labrada.
 
Esta vegada tenemos doble gana d'aportar a los 2392 m de la Collada Labrada, por conocer un requexín nuevu de Picos y por ver la que nos pudiera venir enriba. Defechu, namás asomar el focicu, ya vimos que nun esistía esi pudiera, va pillanos de xuru nos diximos con una mirada.

Ascendemos a la Collada Labrada (2392 m) viendo que la meteo poníase fea

Como siempre, sopesamos les opciones, desdexando el crestéu sí o sí, pero decidiendo al menos intentar el cumal más alto, el segundu picu d'Arenizas. La tormenta adelantóse y tenemos claro, que tenemos mui pocu tiempu, asina que bordiamos el crestéu de la quinta y la cuarta arenera per tarrén calizu nel que ta prohibíu cayer si nun quies abrasate y ascendemos per una llera hacia la entrada a la tercer arenera.

Por qué la tercera? Porque vimos que nun mos daba tiempu a siguir bordiando y dende la nuesa posición veíemos una baxada rápida hacia'l H.ou Sin Tierre per una canal. Dedicimos arriesgar un pelín ascendiendo hasta una h.orcada que vien dende la cuarta Areniza y garrarmos un cresteríu perdelicáu hacia la tercer Areniza.

En plenu marrón decidimos intentar el tercer picu d'Arenizas

El cielu paez que va cayenos enriba y según vamos trepando, el tarrén tórnase más y más delicáu. Muévese tou y hai qu'andar sollerte a los que vamos garrando coles manes y colo que vamos pisando, ya que tenemos una guapa cayida per ambes faces de la cresta.
 
Superamos un par d'aguyes, dalguna pel filu, pero la mayoría los pasos mirando hacia'l H.ou Sin Tierre, ya qu'al menos les llambries tan menos podres que pa la fastera del H.ou Grande. Nun puntu, Ana diz que nun sigue, que nun paga la pena, que ta poniéndose la cosa fea, aportando en solitariu hasta los 2495 m de la tercer Areniza.


Cume nel Tercer Picu d'Arenizas (2495 m)

Ana, saca semeya dende lo lloñe y yo alloriáu por salir d'ellí enantes de que póngase a esbastiar, desfaigo tol crestéu, con más curiáu si cabe que xubiendo. Va dar un pelín de pereza repetir esto cuando crestiemos tolas Arenizas, pero bono, con más tiempu, son pasos que vas esfrutando ensin priesa, non como nel intre.
 
Aporto hasta Ana, diciendo prepárate que va ser bona esta y descendemos del crestéu hacia la canal que teníemos controlada, corriendo peles lleres p'abaxo a fueu, hasta una fondigonada onde sacamos el goretex y funda pa la mochila, xusto nel momentu, onde entama a esbastiar y a tronar ensin xacíu.

Escapamos de la tormentona como bonamente podemos... abluca tar en Picos d'esti xeitu

Menos mal que nun fai fríu, porque con pantalón curtiu aguantar d'esti xeitu'l granizu, nun fizo muncha gracia jaja. Intentamos abelluganos nun paré, pero al pocu, l'agua cayía pel paré como una ducha, asina que siguimos caleyando pente la tronada y la escuridá enmediu del H.ou Sin Tierre.

Hai coses qu'impresionen y a la par presten. Somos así de faltosos, que díbemos riéndonos demientres caleyábemos a fueu hacia la Vega Urriellu. Dende equí ya'l torbón fue aselando y fuimos moyándonos menos, ya incluso secando hasta aportar primeru a Pandébano y llueu a la furgo muncho más abaxo.

Déxovos, namái, que'l track dende la Vega Urriellu que ye lo interesante, saliéndonos pocu más de 4 hores de guapa actividá (con 7,8 km y 720 de desnivel), teniendo claro que pa tol crestéu necesítense otres dos hores mínimu ya que la navegación y el tarrén delicáu asina lo diben requerir.

Lo dicho, actividá que camiento sería perfeuta pa un día saliendo dende la Vega Urriellu y disfrutándola cola calma. A nós, sin poder facer tol crestéu, saliéronmos dende'l puntu de la furgoneta, unos 23 km, sumándoles otros +/- 1000 de desnivel y les correspondientes +/- 5 hores de xubida y baxada dende Pandébano o más allá jeje.

Camudando'l Camín a salvo en Sotres

No hay comentarios:

Publicar un comentario