jueves, 22 de octubre de 2020

Cubiel.las d'Arbas (Los Argüeyos) - Peña La Barragana

 9 d'Agostu de 2020

Track: Cubiel.las d'Arbas (Los Argüeyos) - Peña La Barragana

Aprovechando que'l Baskonia Mendi Taldea, collacios de Basauri, llevaben de travesíes per Llión dellos díes, arrimámonos parte del GM Xuan de la Borrina al so alcuentru. Otra cosa ye que somos pelín desastres y Montse, Nus y yo llegamos tarde coles perrones.

Menos mal que Benjamín, punxo la nota seria nesti desastre de grupu monte que somos. Plantarémonos en Cubiel.las d'Arbas, na comarca los Argüeyos, casi una hora más tarde de la hora de quedada, asina que garraremos agua na fonte, ya que fae un calor brutal y tiramos p'arriba.

Salimos dende Cubiel.las (1315 m)
 
La ruta va ser clavada a la que ficiera n'ivernal en 2016 y que podéis lleer más abaxo, colo que vos puede quedar claro, que ye factible en dambes dómines del añu. Saldremos del pueblu p'arriba, avisándonos de que ta'l pastor colos mastinos, asina qu'andamos sollertes y dempués de perpasar la riega l'Aguilera, nun vamos siguir la pista hacia la cabaña'l Pastor, siguiendo'l cursu la riega de frente hacia la Peña Barragana.

Ascendemos hacia'l colláu Ferreras baxo l'atenta mirada de la Peña Barragana

Aún así, llevanos un sustín con dos mastinonos que nun dibe col rebañu y taben apostaos a la solombra más baxo. Na, que nun fuera garrar a Kima y Kíla y salir yo con elles dos corriendo un pelín p'arriba pa separanos de la zona de conflictu perrunu.
 
Una vegada que tuviemos a salvo, siguimos la pindia panda hasta'l colláu Ferreras, onde por suerte corría un pocu l'aire y se taba meyor qu'en plena solana. A estos altores de ruta, los collacios del Baskonia con Fernan y Benjamin a la tiesta, diben ya crestiando la Peña Barragana y mirábenmos con superioridá dende lo alto'l paré jaja.
 
Siguimos per guapu senderu hacia'l colláu los Bueyes pa crestiar entreteníos al cumal

Pocu tiempu, llevónos garrar el canalizu hacia'l colláu pente la Barragana y peña Negra y menos crestiar la Barragana, alcontrándonos con Aúrea onde entamaben les mínimes dificultaes, peles que fuimos trepando y crestiando coles perrones a la cabeza del grupu.

Cumal de la Peña Barragana (1862 m)
 
Nuna hora y cuartu, tábemos compartiendo cumal con tol Baskonia, que ya dia baxando porque una ñube de mosquitos facía imposible aguantar muncho tiempu, pesie a les guapes vistes del banzáu de Casares qu'hai dende la Peña Barragana.

Magar de les semeyes de rigor, quedándonos los miembros del GM Xuan de la Borrina a facer la nuesa, desficimos camín hacia'l colláu y convidé-yos a descender pela canalona sur, anque tan sólo los borrinos y dalgún miembru del Baskonia más animosu tuvo a bien, venir con nós.

Baxamos pela canalona la Solana hacia Cubiel.las de nuevu

Como ya recordara de la ivernal, la baxada ye cómoda y rápida pela Solana, pasando al llau de guapes aguyes que caen dende la Peña Negra, alcontrándonos nun tris, na baxera de la canal, garrando ya una pista que vien dende la carretera y que va dexanos en Cubiel.las de vuelta en menos de 3 hores de ruta.

Allargóse la post ruta un pelín... coses que pasen
 
La verdá ye que los menos de 6 km y 600 m de desnivel acumuláu que ficimos na ruta, nun dió nin p'abrir fame,  pero col calor que facía y que díbemos más a socializar qu'a caleyar, prestónos pola vida esi vermú, xinta que tuviemos colos collacios del Baskonia.
 
Cuando pases más tiempu de vermú y picando tolo que nos ofrecieron los collacios del Baskonia, que de ruta, ta claro que nun se puede tar más a gustu con ellos... poro tamos naguando pola prósima xuntanza Asturvasca.

Camudando'l Camín dende Los Argüeyos

----------------------------------------------------------------------------

27 de Payares de 2016

Track: Cubiel.las d'Arbas (Los Argüeyos) - Peña La Barragana


Pues ellí tábemos un añu más, nel segundu Alcuentru de Blogueros AsturLlioneses, nel que participaron una carrapetada de blogues de gran interés pa tola xente que nos presta, estes cosiquines d'andar pel monte y conocer llugares guapos y apartos solo al alcance de los que son a movese del putu sofá.

Asina, que nun podíemos faltar y acudimos a la llamada de los collacios de Cotoya Pindia, onde como podéis comprobar, tuvieron a bien, currase un reportaxe como ta mandáu, facer tol trabayu pa que tuviéramos a gustu tolos aconceyaos y facer d'enllaz pente tolos blogueros qu'entá nun mos conocíemos.

Semeya de grupu na Xuntaza de Blogueros del 2017 por Cotoya Pindia

La ruta partía dende Cubiel.las d'Arbas na fastera llionesa de L.luna, averáu a l'anterior quedada nel puertu d'Aral.la, que como non tenía de tener continuidá. P'aportar a esti pueblu, podemos dir pel puertu Payares hasta Vil.lamanín o tirar pel Güerna hasta la salida de Vil.lablinu, onde salímonos pa garrar la carretera C-623.

Bordiaremos el banzáu de Barrios de L.luna pela manzorga hasta topanos col crucie cola LE-473 que xubirá por Aral.la de L.luna pa pocu más alantre nunes envueltes tremendes desvianos per una carreterina hasta'l pueblu de Cubiel.las.

Salimos de Cubiel.las hacia la cabaña'l Pastor

Magar d'un almuerzu y de les debides presentaciones, ya que munchos fueron los blogues que fueron sumándose a esta iniciativa, salimos a caleyar con una bona ñevada, a ver que podía facese. Magar d'un alcuentru con una mastina, Kíla y yo tiramos col grupu hacia l'oeste del pueblu p'ascender a la manzorga del ríu Aguilera hacia lo que nómase la cabaña'l Pastor, baxo los paredones de la peña'l Castiel.lu.

Bordiamos la Barragana pel norte pa upanos al colláu oeste (1767 m)

Una vegada qu'aportamos a esta cabaña, meterémonos de frente nuna vallina pente'l cordalín rocosu que vien dende Las Tres Marías y otru cordal que xuntaría'l nuesu destín: La Barragana colas Peñas del Prado

Nós, diremos ascendiendo charrando de milenta hestories montunes, pa escaecer el tiempu repunante que nos tóco y bien ceo, plantarémonos cerquino de la collada Ferreras, dende la que garraremos una canalina hasta un colláin pente la Barragana y la Peña Negra.

Crestiamos la Barragana con curiáu ya les condiciones nun son les meyores

Dende esti colláu hai un pequeñu alderique so la necesidá d'ascender de tol mundiu, pero a la fín, tol mundiu anímase y vamos pali pali, ganándo-y tarrén a una arista fina, que nun tendría mayor dificultá si nun fuera polo xelao y petao de ñeve que tenemos la nuesa ruta.

Viendo'l percal, tírome alantre, ya que sé que Kíla muévese estupendamente en cualesquier tarrén pero los increyibles vuelos al norte, nun son pa que la perrina ande pente les pates de la xente, asína que tiramos milles y ponémonos al frente del grupu con Alex, l'organizador con Mónica d'esta prestosa iniciativa.

Cume na Peña La Barragana (1862 m) por Cotoya Pindia

Aportaremos al cumal de 1862 m, sorprendiéndome del bon monte pa una mañanera y tamién de la mala suerte que tuvimos pa coles vistes, ya que nun controlo res nesta fastera y prestaríame conocer nomes de montes na redolada y como ta claro xente que me lu contar nun faltaba.

Fadremos la semeya de rigor y como'l día nun pinta d'abrir, colamos p'abaxo pel mesmu camín y col mesmu cuidáu o un pelín más, ya que la ñeve y el xelu nun son bonos collacios nesto d'andar peles aristes y los destrepes.

Descendemos per una amplia canal xixilada per aguyes tenebroses

De nuevu tamos na colladina y anque de primeres dalgunos camentaben garrar el mesmu canalizu de xubida y la mesma vallina hacia la Cabaña'l Pastor, al final tol mundiu tiró baxando pel sur, per una amplia canal, na que destacaba lo cómodo y rápidu de baxar y delles aguyes que col color del día paecíen sacaes de Mordor.

Ensin mirar tampoco muncho per onde tirar, ya que tou paecía asemeyáu, Kíla y yo tirámonos p'abaxo apriesa, abriendo buelga pa tol grupu, hasta qu'aportamos a senderu, onde ya siguimos ritmu tranquilu hacia'l pueblu de Cubiel.las.

Facemos el tramu final con calma hasta'l pueblu onde espéranos un vermú

Poquín a pocu, fuimos un tres d'otru arribando al final de la canal, pa llueu garrar pista hacia'l pueblu, onde aparte de la mastina gafa, esperábanos una muda de ropa, una siesta pa Kíla nel coche y un vermú tranquilu, cola compaña de nuevos collacios de los blogues asturllioneses.

Los convidaos que decidieron asistir: Montaña para Dos, Montaña en Libertad, Rutinas Varias, Pindio, pindio, Camudando'l camin, Pasu a Pasu, Mareando la Perdiz, La Senda del Hayedo, Rutas por la Montaña Leonesa, JF Camina, Montaña Leonesa, Montañas del Esla, Ojo Lince y Sra, Nuestras Montañas, Sebastian Bravo y Cotoya Pindia

Fartura final con bon ambiente y munchu monte del qu'aldericar

Pente'l vermú y la posterior fartura, pasamos una tarde estupenda, falando con xente desconocío, xente que por suerte vémonos d'añu n'añu gracies al alcuentru y xente que llevaba siguiendo y lleendo dende cuantayá como JFCamina o Jose de Nuestras Montañas y ye que supongo, que caún tien el so pequeñu círculu de blogues que sigue con más ciñu o que cuando entamó diben a la par d'unu y quedaron siempre como dalgo especial.

Darréu, gracies a esti eventu y a Cotoya Pindia que son los que se meten tol trabayu y son capaces de xuntar a un garrapiellu montañeros que suel tener caún la so indisponibilidá por grupos de montaña, proyeutos montañeros o por trabayu... lo cual ye perdificil.

Vémonos na próxima... o vémonos nel monte meyor

Camudando'l Camín en tierres d'Arbas

4 comentarios:

  1. Gracias a todos los que habéis participado, que en definitiva sois los que le dan sentido y contenido a este tipo de Encuentros que son tan prestosos!! A por muchos más y a que crezca esta familia tan especial!! Un abrazo Berto!!

    ResponderEliminar
  2. Guapu reportaje Berto. Pasamos un dia estupendo gracias a esos dos enormes compañeros, con ese poder de concentración.
    Un saludo

    ResponderEliminar
    Respuestas
    1. Gracies Sebas... namás fué una reseñina pa tan bona iniciativa. Un saludu

      Eliminar