martes, 20 de octubre de 2020

H.itu d'Escarandi (Cabrales) - Morra Llechugales - Pica'l H.ierru - Pozu Andara

 19 de Xunetu de 2020

Track: H.itu d'Escarandi (Cabrales) - Morra Llechugales - Pica'l H.ierru - Pozu Andara

Continuamos col finde de clásicos de los nuesos Picos, averándonos esta vegada hasta'l macizu Oriental, onde tenemos la idega d'ascender a la Morra Lechugales. Si'l día anterior, ya pasáremos calor na Peñesanta asturiana, güei alborecemos con una sensación chornu brutal.

Nun lo pensamos muncho, que sinon tiramos pa una sablera y salimos dende Arenas hacia Sotres, pa siguir hasta'l H.itu d'Escarandi, onde alcontrámonos col aparcaderu hasta la bandera. Toca dexar la furgo un pelín más baxa, anque sin problema, ya que sal un camín qu'empata cola pista del H.itu.

Partimos del H.itu Escarandi (1300 m)
Paezme que nunca viera tanta xente pel monte, nun teo mui claro tovía si ye bono o malo. Per un llau que la xente descubra los nuesos montes y esfrute d'ellos, ye positivu, pero les masificaciones y la falta d'ética montañera que desprende la sociedá faeme pensar que cuanto más lloñe tean les mases, muncho meyor.

Saldremos como siempre a bon ritmu y facemos con ciertu cansanciu y muncho calor, tola pista que tien de llevanos al casetón d'Andara, como siempre col picu Mancondiu de referencia. Vamos pasando xente y camiento que munchos d'ellos pocu más arriba van llegar, tomando un refrescu o birra y baxar a comer a dalgún pueblu.

Caleyamos baxo la solana pel macizu d'Andara

Garramos agua nel Casetón y siguimos camín hacia les mines de la Providencia, pa siguir pembaxo del Castillu'l Grah.al pasando a la fastera de los Grah.ales. L'anterior visita, ficiéramos tolos cumales de los Grah.ales pero darréu, namái tenemos interés en facer el puntu más altu del macizu d'Andara.

El calor nun convida a muncho más y mentantu echo una güeyada al Samelar y el San Carlos, vienme a la tiesta que tovía tengo cosines pendientes n'Andara, pero que diba quedar muncho más elegante de facer dende dalgún pueblu cántabru con dalguna canal prestosa de conocer, asina que la Rasa La Inagotable y la Xunciana van tener qu'esperar un pelín pa da-yos preste.

Continuamos camín pel macizu echando vista a vieyos conocíos y dalgunos asuntos pendientes

Continuamos camín y pali pali, vamos averándonos a los nuesos oxetivos alcontrándonos de frente con otru vieyu conocíu como ye la Siella'l Caballu. La verdá ye qu'esti macizu ye afayaizu pa meter una xatada de dosmiles perimportante ya qu'ensin perder escesivu desnivel podemos enllazalos de forma cenciella.

Pasamos pel cumal del Grah.al d'Arriba y dexando'l h.oyo Evangelista a la nuesa manzorga, plantámonos embaxo de la Pica'l H.ierru, que munchos montañeros tan atacando nel intre. Nós, de momentu pasamos y siguimos pembaxo de tolos picos del H.ierru, que tan guapu crestéu tienen, alcontrándonos a la fin col nuesu oxetivu: La Morra.

Averámonos hacia la Morra Llechugales na que tenemos qu'esperar cola pal trepe

N'otru tiempu, de xuru que repetiría tolos cumales, pero nun sé si voi faciéndome mayor o que llevaba 5 díes de monte, que tamién pesen. De toes formes, ye bien guapo alcontrar montañeros como Monchu, con esi picor mozu, pa volver a ascender tolos cumales de la redolada.

Magar de charrar un ratín con él, sentarémonos a xintar daqué y a esperar que despeye un pocu la cume de la Morra, ya que lo menos tenemos a venti persones glayando, trepando y destrepando el pasín de la cumera toos al empar.

Cumal na Morra Lechugales (2444 m)

Cuando queda llibre, pegamos la trepadina ensin mayor problemes y esfrutamos de la Morra Llechugales en soledá. Son coses que presten, dir al monte en solitariu o nun alcontrar xente per tolos llaos faise casi necesariu, anque nos tiempos que nos tocó vivir, pue ser que cada día seya más complicáu.

Magar d'esfrutar de les vistes y desplicá-y a Carla que ye cada monte, destrepamos de rises y decidimos ascender a la Pica'l H.ierru y facer una baxada un pelín más interesante pa completar la ruta con un toque circular.

Decidimos pasar pela Pica'l H.ierru (2438 m) de camín hacia los Valleh.ucos

Dicho y fecho, plantámonos con pocu más esfuerzu na Pica'l H.ierru de 2438 m, sólo 6 metros más baxo que la Morra (2444 m) pero un monte quiciás más guapu, nel que taremos unos minutinos sacando semeyes y tiramos pela arista NE col envís de descender hacia'l H.ou Llerosu.

Esfrutaremos d'un descensu más picantín esnalando per delles lleres y empobinámonos hacia los Valleh.ucos, onde tamién, decidímonos a salir del camín davezu pa que Carla conoza'l Pozu d'Andara enllazando a él per un tramín bien entreteníu nel que navegaremos pente bloques de bon tamañu.

Descendemos pelos Valleh.ucos hacia'l Pozu Andara

Perpasamos tol pozu d'Andara, con mui poca agua nesta dómina del añu y vamos aldericando que ye una pena l'españíu mineru que fizo que desapaeciese'l llagu. La verdá, ye que diba da-y un toque más verde y menos mineru a esti macizu.

Con pocu más, alcontrámonos ya enriba del Casetón d'Andara onde paramos a echar una cervecina y enfrescar el cuerpu na fonte, alcontrándonos con dellos conocíos qu'anduvieron abriendo víes na mayada la Redondal y baxen tamién con una solana enriba de curiáu.
 
Baxamos al Casetón pa siguir camín pela canal de las Vacas hacia'l H.itu d'Escarandi

Magar del descansín, vamos completar la ruta descendiendo pela canal de las Vacas, que la verdá nunca me diera por conocer y hai que dicir que ye milenta vegaes más prestoso que descender pela pista. Sorprendióme lo guapu del senderu y lo apriesa que se baxa, plantándonos na mayada la H.azuca, onde enllazamos cola pista casi nel mesmu H.itu d'Escarandi.

En resume, otra bona patiada pa repetir esta clásica del macizu d'Andara, metiéndonos pal cuerpu dalgo más de 17 km, con +/-1315 m de desnivel acumuláu, nun total de 8 hores, nel que'l calor asfisiante por momentos fue un pelín infernal.

Camudando'l Camín nel macizu d'Andara

No hay comentarios:

Publicar un comentario