Pandecarme (Cangues d'Onís) - Peñesanta d'Asturies

18 de Xunetu de 2020

Track: Pandecarme (Cangues d'Onís) - Peñesanta d'Asturies

Nun terminara casi de baxar de Picos con Ana y ya taba montáu na furgo, pa tornar pa Cangues d'Onís col envís de facer un par de clásiques populares. Nun too va ser restolar llugares perdíos, nin pasos d'antaño, tamién toca repetir cumales que son tan guapos que nun podemos perder la oportunidá de repetilos.

Asina que magar de durmir en Cangues, Carlina y yo pegamos el madrugón de rigor y llueu d'almorzar salimos pa los Llagos de Cuadonga, enantes que piesllen la barrera. Nun somos los únicos, poro vamos casi en caravana hasta los llagos y nel colláu les Veleres tirámonos pa la vega Enol hasta l'aparcaderu de Pandecarme, enllenu coches a primer hora.

Preparámonos pa salir dende Pandecarme (1071 m)

Supongo que tamos notando los últimos coletazos del confinamientu y tol mundiu quier esparcer pel monte. Asina, qu'alcontrámonos con montañeros avezaos pero tamién con munchu domingueru que métese per Picos a ver si ye tan guapo como-yos cuenten.

Tenemos la idega d'ascender a la Peñesanta d'Asturies o Enol nel día, ya qu'al día siguiente camudaremos de macizu. D'esti xeitu, nun vamos andar con variantes y menos nesti día de calor infame, colo que salimos de Pandecarme pel camín normal hacia Vegarredonda.

Fadremos camín pasando per Vegarredonda hacia H.uente Prieta

Vamos adelantando xente y ye que ya llevo les pates de tres díes y como siempre, envede tar cansáu, ya garraron ritmín curiosu. Carla, ta d'andar en bici y anque va dándome un toque dacuando, de que baxe un pocu, sigue'l ritmu sin mayores problemes.

Garraremos bien d'agua nel refuxu, tomo un cafetín y siguimos p'arriba pela Llampa Cimera, saliéndonos pembaxo'l Porru Bolu, siguiendo camín hacia'l colláu Les Merines primeru y llueu hacia la H.uente Prieta, onde nun había tanto movimientu como'l finde del vivac.

Ascendemos de la H.uente Prieta hasta la collada Santa María

De camín, voi remembrando aquella primer ascensión a la Peñesanta con Fernan a la que-y amestáremos otros cumales de renome como fueren la H.orcada y la d'Enmediu. Daquella, fai diez años, fuera un branu enllenu de rutes per Picos, faciendo la mió primer Travesera col grupu y el finde de les Peñes Santes.

Anguaño, paez que tornamos al picor montañeru de primer orde y siempre con xente motivao, como Carla, presta, poro entamamos la xubida hacia la H.orcada Santa María a bon ritmu, demientres echámos-y una güeyadina a una pareya faciendo una vía d'alpina a la tercer Cebolleda.

Divertímonos trepando pela grieta rubia hacia'l cumal de la Peñesanta asturiana

Aportaremos a la h.orcada coles ablucantes vistes so la Torresanta llionesa y viendo que baxen un grupu de montañeros de la Grieta Rubia, decidimos descender pel pedreru en direición al H.usantu y garrar el terracéu un pelín más baxos pa nun cruzanos.

 

Asina lo facemos y vamos trepando de terraza en terraza hasta metenos nun hombrín ya na grieta rubia, onde alcontrámonos con un par de montañeros, que nos conviden a esperar un pocu pa dexalos baxar ya que la so compañera diba sele pelos destrepes.

Cume na Peñesanta d'Asturies (2479 m)

 

Nós, que dibemos como aviones p'arriba, ya que Carlina ye una perbona esguiladora, dalgo vaga pero mui fina, jaja, esperamos tranquilamente cruciando delles pallabres col paisanu y la so compañera. Da gustu alcontrar xente asina nel monte, educada, con tables... lloñes d'otros comportamientos de xente dando voces y tirando piedres ensin mirar si dalguien vien per baxo.

 

Saldremos a la fastera norte, viendo'l picantón corredor del Marques que tengo pendiente y continuamos trepando felizmente hasta encumar los 2479 m, onde al fin, vamos quitar el cascu, la camiseta sudadísima y tomar un airín qu'enfresca lo xusto pa nun morrer de calor.

Descendemos pel H.usantu pa siguir hacia Vegarredonda y de vuelta a Pandecarme

Tomámoslo con calma y dempués de media horina tiraos, decidimos descender cola suerte de nun alcontranos a naide, ya que fuera un día de munchos cumales na Peñesanta. Destreparemos tola grieta rubia ensin problemes y tiraremos pedreru-ñeveru abaxo hacia'l H.usantu.

Como siempre, sedrá un placer caleyar tola vuelta peles Barrastroses hacia'l colláu La Fragua y d'ellí casi corriendo hasta Vegarredonda, onde la paradina a la solombra con un birra tórnase dafechu necesariu. Llueu, camín normal hacia Pandecarme, onde tamién va tocanos cruciar munchu "montañeru" más o menos avezáu, ya que son los tiempos que nos toquen vivir, con tropecientes cenes qu'había nel refuxu.

En resume, ruta clásica con un percorríu de 20.6 km que ficimos en pocu menos de 10 hores, superando un desnivel d'unos 1770 m d'altor. Un aperitivu perfectu pa siguir en furgo hasta Arenas en Cabrales, onde aparte de cenar con dellos collacios, adelantábemos camín pal día siguiente tachar otra clásica.

Camudando'l Camín peles Peñes Santes