Track: Vega Urriellu (Cabrales) - Areneras - Neverón d'Albu - Sotres (Cabrales)
Un día más, alborecemos nel refuxu de la Vega Urriellu, al que si nun sabéis como aportar tenéislo desplicadín bien curiosu equí. Güei ye un día completamente distintu al d'ayeri cuando alboreciéramos. El día ta soleyeru dende'l riscar y hai ambiente de nerviosismu nel refuxu... ye claro que muncha xente va poder facer esos planes o al menos intentalos.
La nueche fuera tan bona como l'anterior, durmiendo estupéndamente, gracies tamién a los chupitinos de oruxu de sidra dulce que xubiera Jandro nuna pequeña cantimplora. Estes caxigalines presten enforma nos refuxos y nestos detalles Jandrín ye'l meyor. Ayeri xubiera a la Vega Urriellu a fueu xuntándose a nós pa la cena y por supuestu pa la ruta d'esti tercer y últimu día nos Urrieles.
El menú del día ye'l platu fuerte pa estos díes: la intentona a la integral d'Areneras-Albos. Ésta ye una xera abegosa, per tarrén complicáu y que ya tuviéramos percorriendo en parte l'añu pasáu teniendo que conformanos con una primer visita pa conocer per onde entrar y per onde salir lo que ya fuera abondo.
Partimos de la Vega Urriellu (1954 m) nel alborecer
Despedímonos de los collacios mallorquinos, que van con calma pa la sur del Picu y siguimos hacia'l más que conocíu pasu de la Corona'l Rasu. Siempre paez que ta ehí mesmu, pero añu tres añu, faíseme igual de pesáu'l camín hasta la frecha que da pasu al Rasu. Más de lo mesmu pasa col accesu hasta la H.orcada Arenera... será que ya van munches vegaes.
De toles formes, vamos sobraos de motivación y la mió vista nun pue facer otra cosa que mirar y remirar esa muria enllena de cumales amenazantes que ye'l conxuntu d'Areneras-Albos. Esta vegada, a la escontra del otru intentu vamos col envís de completar los furacos del puzzle que dexamos, sobretou porque Fernan lleva otres sensaciones dafechu distintes.
Pasamos pela Corona'l Rasu hacia la H.orcada Arenera
Nun contábemos con trayer a Jandro per estos llugares, pero sabemos que pa llibrar los cumales más complexos nun va tener problema, así que de la H.orcada Arenera, vamos con decisión a da-y la vuelta a la primer torre Arenera, cumal que por más vueltes que-y diera dende la segunda la vegada anterior nun-y alcontrara'l pasu.
Esta vegada, envede baxar hacia l'espolón que xube direutu a la segunda, vamos bordiar lo más pegadinos posible al paré de la primer torre y garraremos un canalizu que déxase facer bien p'alluganos nuna repisa que llevanos a la mandrecha a la h.orcada pente la primer y la segunda arenera o hasta un hombru a la manzorga que d'accesu al espolón que xube a la segunda cenciello.
Asitiámonos pal ataque a la primer Arenera
Diremos los tres hasta l'hombru y ellí, quedará Jandro faciéndonos semeyes ya que nun se vé p'acometer trepaes tan espuestes y ye que mirar pa la primer Arenera acoyona un pelín. Aún así, dexo la mochila y tiro hacia'l canalizu que xube a la h.orcada intentando animar a Fernan que nun lo acababa de ver claro.
Faigo un primer trepe dende la repisa al entamu del canalizu, siendo este el pasu más complicáu ya que desploma un pocu si nun quies metete muncho al filu pola mandrecha. Cuando ve que se pasa, Fernan vien hacia mí y xuntos siguimos pel canalizu que nun ye otra cosa qu'una pedrera hasta la h.orcadina.
Quedamos plasmaos, viendo qu'un posible destrepe dende la segunda hasta esta h.orcada ye imposible dafechu y pa más, de la h.orcada hacia'l llau contrariu, sólo hai aire, lo que da un puntu de llocura a la trepada que nos espera. De lo malo, la primer parte ye una placa que supérase bien, gracies a que la roca ye estable y llueu na parte alta de la placa la roca tórnase más suelto, pero delles vires ayuden a aportar al cumal.
Delicada ascensión a la primer Torre Arenera (2391 m)
Dicir que nesti trepe final a la primer Arenera, nun hai pasos duros pero la cabeza pide asomase lo menos posible al vacíu y esti apaez per cualesquier llugar. Nun da tregua mentalmente, así que moviéndonos lo xusto, facemos una semeya, saludamos a Jandro pa que nos faiga otra y tiramos p'abaxo qu'esti cumal de 2391 m ye un h.itu que paez querer esbarrumbar a nada que lu toquemos.
Baxaremos con tol curiáu del mundiu, tanto na baxada a la h.orcada como pel canalizu pa nun tiranos peñes y media hora dempués taremos tomando un tragu d'agua con Jandro, que diz que tuvo disfrutando un ratín del espectáculu jeje. Repuestos, salimos trepando del hombru per unos canalizos y caleyaremos tranquilamente hata los 2404 m de la segunda Arenera... cumal más cenciellu y casi pasu obligáu d'una fastera a otra d'esti macizu.
Llueu de la segunda, Fernan qu'alcontróse estupendamente na primera, trepará per esi guapu filu de la tercer Arenera, quedándome esta vegada a velu yo, ya que n'anterior incursión arenera fuera al revés. Dende esa posición, Fernan baxa diciendo que la cuarta Arenera, la más alta ya importante, tien una pinta malísima.
Xubimos a la segunda y tercer Arenera... Fernan en solitariu
Namás que baxa, nun esperamos res y ponémonos el pocu material que tenemos (arneses, dalgún cordinu pa facer anillos y cuerda auxiliar) por si les mosques. Nun sé como serán les mosques n'otros montes, pero nesti cumal pesaben una tonelada, ya qu'encordeme a Fernan y tiré p'arriba pol canalizu d'accesu a la h.orcadina pente la tercer y cuarta arenera.
Esta ye la únicu vía d'ascensu si nun queremos tener qu'esguilar dafechu, pero tamos falando qu'esti canalizu aparte de mui vertical tien pasos de III+ y sin posibilidá de proteición hasta la propia h.orcadina onde alcontramos un cordinu nuevu nun clavu con bona pinta.
El canalizu nun sé porque paecióme de lo más complexu qu'esguilé en sólo na mió vida, ya que'l grau ye mui, mui continuu ensin descansu hasta la h.orcadina... lo que supón una fostia de más de quince metros hasta'l primer rebote que pué llevanos a otros tantos hasta parar si ye que paramos.
Intentona a la cuarta Arenera... roca podre y espuestu a más non poder
Llegué tan precariu a la h.orcadina que llaceé un cordinu a un piquín pocu fiable, hasta que xiré la tiesta y ví'l clavu salvador. D'esta miente, intenté colocame cómodu y relaxame y dende la mió posición nun sólo dime cuenta que l'auxiliar de 30 m nun me llevaba hasta'l cumal sinon que tenía la sensación de que tampoco me daba pal rapel d'abandonu.
D'esti xeitu, entainé a Fernan a acompañame n'aventura xubiendo resoplando hasta la h.orcadina, onde más tensu de lo que me prestaría nesta situación, púnxeme a siguir cola arista una vegada que Fernan asegurábame dende'l h.orcáu. Nun sé si fai falta dicir, que delantre mía tenía l'arista más fina, podre ya inestable que viera na mió vida.
Entamé por ella, llaceando col anillu más grande que tenía una gran aguh.a, anque sólo fuera como quitamiéu y tuve un ratín restolando si yera meyor llibrala pela mandrecha con 50 m de cayía a la terraza de baxada hacia'l Rasu o si meyor prefería un vuelu de más de 100 m hacia'l H.ou del Agua.
Hasta equí pudimos llegar... vuelta y otru día sedrá
Tengo visto xente per equí, en dalgún reportaxe, ensín cuerda y hai que dicir que la xente nun tien sangre o tien pocu apreciu a la vida, ya que cuando llevaba pasáu, con munchu mieu, l'aguh.a grande pel llau de más cayida, aporte a otres pequeñes aguh.es onde si lo anterior yera malo... agora tolo que tocaba coles manes movíase y cada pie yera más inestable que l'anterior.
Si a tou esto, amestámos-y que la cuerda nun daba pa más y que si seguía diba tener que facer el final de l'arista ensín cuerda, dióme tolo que necesitaba pa dame la vuelta. Nun me considero cobarde nestes hestories, pero tampoco préstame xugame la vida nuna arista onde nun controlo la situación en tou momentu por mor de la piedra suelto y si un cordino de 7mm tien que parame en casu d'un fallu d'una peña... meyor déxolo pa otra vegada con más seguridá y menos mieu.
Con un tastiu agridulce rapelamos por turnos... yo nun me veo pa forzar más y Fernan nun quier saber nada tampoco. D'esta mena, aportamos a les mochiles onde lleva Jandro demasiáu tiempu (más d'hora y media) viendo los nuesos avances. Acabóse la integral, perdimos muncho tiempo nesta torre y lo pior ye que ye la más alta y pícame demasiáu pa non intentala otra vegada.
Terraceamos hasta'l canalizu onde alcuéntrense los pasos más duros
Decidimos entós, dexar tamién la quinta Arenera... la más guapa cola primera, pa facer les dos otru día y tiramos los tres a pol Neverón d'Albu cumal de mayor presencia, forma más guapa y mayor altor?? del grupu de los Albos. Aparte, colos cambios de planes... teníemos que da-y un bon monte a Jandro que nun ficiera más que venos xubir fricaes jeje.
Así que baxaremos peles mesmes terraces que cuando fuimos conocer el Frailón y a mediu descensu facemos travesía hasta l'entamu de la vía al Neverón d'Albu. Ye cenciellu atopar per onde debemos atacar esti monte ya que vense tres pindios canalizos na so parte central escoyendo, magar de mirar bien les posibilidaes, el de la mandrecha, más fondu y con más bloques empotraos pero con mayores oportunidaes de movese nes trepaes.
Meterémonos nel canalizu que preséntase coles mayores dificultaes, apaeciendo una trepada pa salir d'un pequeñu desplome llibrándose pela mandrecha pa siguir de frente y facer otra trepada saliéndonos esta vegada a la manzorga, alcontrándonos dempués un cordino pa rapelar.
Salimos del canalizu pa metenos nun sistema de vires hasta l'arista cimera
Dende equí, el canalizu pierde inclinación y acaba tresformándose en varios qu'acaba pasando a una fastera de terracéu tumbáu, sin mayores dificultaes que nun tirar piedres ya que van direutes al canalizu defechu. Llueu, pasaremos a la conu superior del monte, nel que les posibilidaes aumenten, con munchísimes vires qu'en diagonal nos fadrán dir superando'l desnivel sobrante hasta l'arista cimera.
Curiáu con averase a una vira que llévanos hacia un marcáu hombru con una aguh.a, ya que si vamos hasta ellí toparémonos con qu'al otru llau hai una canal casi volada que pon los pelos de punta, nel casu de querer garrar l'arista dende ellí. Vímoslo demasiáu espuestu y preferimos garrar otra vira hacia la manzorga un pocu enantes del hombre.
Cumal del Neverón d'Albu (2439 m)
Asina, diremos travesando'l paré vira tres vira, munches d'elles h.itaes, hasta garrar l'arista cimera a unos 20 m de desnivel sol cumal, teniendo ya qu'usar les manes un puquiñín p'aportar al cumal de 2439 m d'esti Neverón d'Albu, que sí ye un picu de los que paga la pena l'esfuerzu y que sí aporta esi subidón por facer un monte curiosu.
Taremos un bon ratu na cume, mirando les vistes, viendo l'ínfimu cumal de la cuarta arenera, viendo la guapa cresta de la quinta, buscando'l pasu hacia los otros albos... en definitiva intentando relaxarnos y sobretou yo intentando baxar pulsaciones ya que dende l'engarme na cuarta arenera nun volviera a tar nun estáu mental positivu pa con esti día.
Facemos tol descensu pela misma vía... con munchu curiáu
Sólo cuando entamamos el descensu, llevando seguru a Jandro, que nun les tenía toes consigo na baxada, volví a sentime a gustu, con sensación de que fice les coses bien, que nun tenía por qué fozar de más nesa podre roca si nun me sentía seguru. Poro, pa cuando aportamos de nuevu a les mochiles, anque la mió vista se diba de xemes en cuando hacia l'arista y sus aguh.es... ya tenía decidíu que volvería con motivación y meyor preparáu.
Aparte... cómo diba dexar güerfana tamién, a esa quinta arenera con esa cresta que paez el llombu d'un dinosariu d'esos que tienen vela, jeje. Coles mesmes, saldremos a la parte baxa del Rasu, p'ascender hacia'l camín y completar el clásicu senderu dende la Corona'l Rasu hacia la Vega Urriellu.
Según baxamos voi camentando si Alón o Ta Llueu... ver veremos
Nel refuxu, descansaremos y xintaremos con calma, con otra pequeña ayalga como ye un bon gamonéu que tamién xubió Jandrín. Magar de tar bien fartucos, pagaremos les nueses deldes de tres díes d'alta montaña y decidimos entamar a baxar.
Xusto cuando dibemos colar p'abaxo, alcontrámonos con Gemma y Miguel que veníen enllenos de felicidá dempués d'esfrutar d'una esguilada perguapa al Picu Urriellu. Paez ser que too fuera reonde y al igual que nós esfrutaron d'un día perfeutu pa facer esa Sur Direuta al Picu.
Despedímonos del Picu pela cara oeste y norte dende la Vega Urriellu a Pandébano
Cuando tábemos más que descansaos encomencipiamos el descensu hacia Pandébano, notándose un pelín el calor y el cansanciu acumuláu, poro paramos a echar un cervecín na Terenosa y ya siguimos pel colláu Pandébano, pa descender pela Robre hasta'l colláu Cuaceya.
Equí, gracies al refuxeru de la Terenosa, garramos l'antiguu camín que baxa a los Ivernales del Texu, quitándonos les cansines envueltes de la pista formigonada y descubriendo un senderu que acorta y muncho los tiempos d'accesu pente Pandébano y Sotres, aparte de facer más guapu'l camín pasando per brañes como L'Armada.
Facemos una nueva baxada non conocida por nós dende Cuaceya a los Ivernales del Texu
Ensin más, aportaremos a la curvona en Sotres onde dexáramos fai tres díes el coche, dando por termines estes pequeñes vacaciones na redolada de los Urrieles acabando pa una temporada con esi Ortzamendiren Sua.
Güei, los picores lleváronmos a percorrer durante 11 hores, unos 14,5 km d'una ruta que superando un desnivel acumuláu positivu de 890 m y 1885 m de baxada, llevónos a conocer un pelín meyor la fastera de Los Albos y Areneras y a nós mesmos como montañeros.
Que vos preste!!! Esperemos tornar a acabar esti puzzle areniegu...
Camudando'l Camín na Vega Urriellu
No hay comentarios:
Publicar un comentario