Rodellar (Semontano de Balbastro) - Cañon del Mascún - Otín

13 de Setiembre de 2020

Track: Rodellar (Semontano de Balbastro) - Cañon del Mascún - Otín

Despedímonos de les vacaciones per Rodellar con pocos encadenes, pero a gustu col mundiu de posibilidaes correnderes y montañeres qu'abrimos durante estos díes. Como non, pa terminar bien l'últimu día, que meyor que conocer tol barrancu del Mascún nun agradable patéu.

Poro, recoyeremos y pagaremos la nuesa estancia nel camping, del que nun falé muncho, pero a dicir verdá gastar perres pa tar a gustu como nesti camping paga la pena. Dicir, que ye nel primeru nel que toi, que veo bolses pa recoyer la mierda perru a cada pasu, lo cual ye d'agradecer el detalle, porque nun sabes cuando-y va dar al animalín por soltar lo suyo jeje.

Partimos de Rodellar con bona info del nuesu percorríu

Polo demás, a gustu nes instalaciones, anque pelín caro porque tampoco ye que seya'l camping más luxosu del mundiu precísamente. Poro, pagamos y vamos hasta l'aparcaderu vacíu de Rodellar, onde caleyaremos hasta'l pueblu col envís d'entamar la ruta, so les 10 de la mañana, saliéndonos sele en direición Cheto.

Aína, alcontrámonos penriba de Cheto ganando altor y vistes na Fonciecha, pa empobinanos per camín siempre cómodu hacia'l barrancu de La Virgen, formáu pol de las Tablas y San Martín, que ya conociemos de la carrerina pela Cresta Balcez.

Aportamos a Cheto pa continuar ruta ganando increyibles vistes en Turuezo

Travesaremos el barrancu y tendremos de nuevu otra subidina hasta la llomba de Turuezu, onde la parada pal mirador sol Mascún superior ye más que necesaria. Abluca dafechu, ver toles formaciones calices de la Ciudadela, onde una bayura d'aguyes, torres y xendarmes elévense dende lo fondu del rigu Mascún.

 

Siguiremos camín, con tramos al sol, que ya calez de más y tramos a la solombra, hasta travesar otru barrancu, el de Fabar, nel que tendríemos el desviu hacia'l pozu La Nieve, pudiendo enllazar cola cresta Balcez pa volver hacia Rodellar.

Continuamos el prestosu paséu travesando barrancos con vistes al otru llau del Mascún

El camín, nun pue ser más afayaizu pa la práutica de les carreres pel monte, siempre nun tarrén quebrapates de continu xubir a una llomba y baxar a un barrancu, pero sin grandes desniveles y siempre col senderu a mediu altor pente la cresta Balcez y el barrancu del Mascún.

 

Lo que sí, tamos alcordándonos de nun madrugar un pelín más, ya qu'a les 12 la mañana, ya pega con ganes la solana y vemos a les perrines pasalo un pocu mal. Llevamos agua abondo, pero vemos como nos barrancos nun hai nin mediu achisbu de restos d'agua.

Descendemos nun tramu preciosu de faixas hacia'l Saltador de las Lañas

Travesaremos tres barrancos más, el de Fornazos y Oscochar, topándonos cola primer mayada del camín, La Corrada, onde albidramos que ya descenderemos al entamu del barrancu del Mascún, garrando una cincha (faixa) increyible, escavada na peña, que fae les delicios de los humanos y sobretou de los perros que nun momentu, goliendo agua desaparecen corriendo camín abaxo.

Nel intre, aportamos a un llugar de cuentu, el Saltador de las Lañas, que daría comienzu al Mascún superior y pa nós, ye'l momentu de parar a tomar un zumín y que les perres enfresquen con tola calma del mundiu. El sitiu ye bien guapu, pero con esta sequía malpenes, hai dos champanes curiosos, poro dígome que tengo que volver en mayu a ver el saltu en tola so guapura.

Tramu perguapu hacia'l barrancu de Raisín

Llevamos 3 hores de camín y poques son les ganes d'escapar d'esti requexu al frescu, sicasí, güei entamamos la vuelta p'Asturies, asina que vamos siguir camín per otra guapísima faixa hasta aportar al barrancu Raisín, onde podríemos salir pel camín que xune Letosa y Otín.

Na riega Raisín, alcuentren les perrines otru pocu d'agua que-yos da puxu pa escorrer a unes cuantes cabres. Aún así, el calor sigue apretando y siguimos faixa alantre hacia Otín, per un senderu más aéreu pero muncho más guapu.

Terminamos la faixa Raisín p'averanos hacia'l pueblu desaniciáu d'Otín

Llueu de la faixa, tendremos la opción de siguir de frente hacia'l barrancu d'Otín onde toparemos camín en descensu hacia'l Máscún, pero nós vamos dir hasta'l pueblu d'Otín pa conocer de primer mano la razón del despoblamientu rural de los pueblos d'esta fastera.

Dicir que nun ye nin unu nin dos, ye nomes como Bagüeste, Letosa, Nasarre, Otín... toos ellos con accesu per pista y un desaniciu total nos años 70 aproximáu. Al igual que cuando faigo rutes per Soria, dalgo d'atracción tienen estos entornos pantasmales y como non, la visita obligada a les ilesies nun se fae esperar.

Travesamos Otín onde facemos una paradina a la solombra pa descender hacia'l Mascún

D'esti xeitu, travesaremos el barriu baxu, alcontrándonos con un pasáu hippie enforma na ermita y siguiremos ensin rastru d'agua hasta'l barriu altu, onde facemos la visita y sentámonos a la solombra de la torre la ilesia.

Tamos casi ensin agua y ya sabemos motivos de desaniciu, nin rastru pol pueblu. Aparte, que viniendo d'Asturies como venimos, nesti secarral, nun tenemos mui claro como poder vivir nin que semar. Sin más, toca caleyar hacia'l Mascún, empobinándonos hacia'l barracnu de la Losamora, onde garramos camín pasando supuéstamente al llau de la fonte'l Cajigar (nin rastru), nun penosu descensu a la solana, parando como podemos embaxo los arbustos.

Esfrutamos de la fastera de la Ciudadela... ablucante dafechu

Pali, pali, vamos baxando altor y entamamos a topar a dalgún caleyeru escalador, sobretou al altor de la Ciudadela, puntu más guapu de tol Mascún, d'accesu a la mítica Cuca Bellostas (aguya que dalgún añu habrá que facer).

El calor pasa factura y vemos xubir a una moza que pregúntanos mui desviada del so oxetivu. Por suerte, dalgún paseín tengo dao y soi a indica-y onde debería dir. Al final, yera asturiana, casada con un aragonés y acompañónos nel descensu, onde les perrines ya diben pelín desesperaes por garrar agua pa bañase y nós asemeyaos.

Aportamos al tramu conocíu del Mascún onde tenemos tolos grandes seutores d'escalada

Dicir, que'l tramu final del Mascún Superior, con tola Ciudadela ye una pasada, pero'l cuerpu lo únicu que nos pide ye bañanos, poro baxamos a fueu hasta'l Mascún, teniendo que caleyar un tramu, pente calce del rigu secu dafechu hasta aportar a la fín a la Surgencia, onde podemos garrar agua y les perrones bañase con tola calma.

Magar del bañu perruno y el humano, continuamos camín ya pel Mascún Inferior, percorriendo tol cañón, que tantos díes anduvimos p'arriba y p'abaxo cargando con mochila, material y cuerda. Darréu, tan sólo pensamos na xarra de cerveza frío y en picar dalgo nel chigre del pueblu, poro fadremos l'últimu tramu hasta Rodellar y aportaremos a la terraza magar de dalgo más de 7 hores de camín.

En resume, final perfeutu pa estes vacaciones en Rodellar, conociendo tol cañón del Mascún nun percorríu que nun va dexar indiferente a naide ya que'l paisaxe paga la pena y los caminos tan cuidaos, desbrozaos en dellos tramos, d'esti percorríu de casi 20 km y 1325 m de desnivel positivu acumuláu.

Camudando'l Camín en Rodellar