Del 4 al 14 de Setiembre 2020
Una vuelta más, tornamos per Rodellar y ya va siendo, casi una necesidá, un viaxe al añu per esta escuela oscense pernomada mundialmente. Lo bono d'esti añu, ye que tuve descubriendo un pelín tamién otres actividaes a facer y ya namoróme del tou, pudiendo esguilar, correr pel monte, bañame o dir dar un pateín, poro paezme'l sitiu perfeutu.
Yo, Suco y Orlando apretando nel Bulder del John
No que na escalada podemos falar, tornamos de nuevu a vieyos proyeutinos que dexáramos d'otros años atrás, viendo que pa dir a Rodellar con ciertes garantíes, hai que tar d'escalar duro o nel roco o en desplome, poro vimos que nun mos movíemos quedando pa prau, una vegada más.
Na roca o nel roco siempre esfrutando de la escalada
Sicasí, esti añu, nun mos centramos tanto en dellos seutores y fuimos conociendo otros tantos de grau cenciellu como de grau duro. Poro, envede marchar con menos deberes, cayeron dellos pegues a víes que nun encadené y que quedarán como non, pa otra vegada que temos más fuertes y motivaos.
Volviendo a antiguos y eternos proyeutos
Na realidá, daste cuenta onde te mueves bien y lo que lleves faciendo nos últimos tiempos, acaba por amosar cual ye'l to estilu d'escalada. Esto quier dicir, que nun yes a movete en grandes desplomes de cazos pero sí que cuando toca menos desplome y dalgo de regleta con pasos menos físicos pues sal fácil.
Tolo y Orlando apretando nel Meandro
Exemplu, pues los pocos encadenes que fice, fueron nel Camino, un 7a y un 7a+ pegaos que lleváronme lo mesmu defechu. A la escontra, víes como Juan y Fran en Ventanas, quedóme claro, que lo mesmu necesitaba otros 2 o 3 pegues en díes distintos y descansáu pa poder faceles, ya que nun son difíciles pero sí mui desplomaes y ehí hai qu'andar con resistencia y fuercia.
Viendo trepar a Nico y Rober nel Delfín... brutales les semeyes
Como siempre, xuntámonos un montón d'asturianos pela escuela y pel camping, ya que nesti añu de pandemia, l'aparcaderu de Rodellar taba dafechu prohibíu estacionar de nueche, así que tocó gastar perres nel camping, pero dexáronse bien a gustu.
Kíla esfrutando de los paisaxes o non... depende del momentu
En resume, bones vacaciones, corretiando, conociendo un pelín meyor tola redolada y esguilando lo que nos dexó'l cuerpu y el non entrenu que llevábemos pa esti tipu d'escalada. D'esta mena, nun queda otra que tornar más fuerte o intentar buscar les víes que meyor se te puedan dar pa non marchar desmotiváu, anque en Rodellar ya se sabe, desplome y garrote.
Rodellar (Seutores visitaos)
Croquis modificaos por mi de la escuela d'escalada de Rodellar, por mor de En La Vertical. Gracies y col so permisu.
---------------------------------------------------------------------------------------------
Del 27 d'Abril al 5 de Mayu de 2019
Como ye vezu, los viaxes d'escalada van con delles idegues predefiníes na tiesta, que suelen ser apretar enforma, encadenar tolo posible y nun mancase. Pero a la fín, siempre acabamos quedándonos colo realmente importante, que ye conocer bona xente, echar unes rises y na medía de lo posible esfrutar esguilando y apretando hasta que'l cuerpu nun pueda más.
Esti viaxe a Rodellar, entamaba con un viaxe eternu hasta'l cercanu
pueblu de Alquezar, onde alcontramos unos niveles de ranciedá fuera de
lo normal, teniendo que colar a la gueta d'una birra al pueblu d'al llau
en Bierge, que por total mala suerte taben de fiestes.
Parte del equipu astur nel Mascún
Al día siguiente, alborecemos daquella manera, almorzamos y pasamos olímpicamente d'escalar en Alquezar, yéndonos a Rodellar directamente, a ver si yeremos capaces de trepar dalgo curioso. La nuesa decisión fue baxar a un seutor nomáu Egocentrismu onde a lo llargo de los díes fadríemos un par de 7as como non de desplome.
Orlando y Rúben a lo suyo... apretar y encadenar
Y como non, como suel pasar nos viaxes a Rodellar, acabamos centrándonos nun seutor en cuestión y esti añu, aparte de pasar por Egocentrismo, paez que punximos la tienda campaña nel Bulder del John, tamién porque dempués de patiar y visitar otros seutores que conocíemos, vimos que taben mui moyaes la mayoría de les víes.
Bramando nel bulder del John
A lo tonto, taríemos varios díes dando sartenazos y apretando como animalinos nel desplome del bulder, llevándome al menos un 7a+ y pringando otru dempués de salir del pasu, como suel ser davezu en mí.
Visita obligada a la zona de la Surgencia anque seya poles vistes
La verdá ye qu'estos seutores dan el xuegu xustu, pa intentar garrá-y el puntu a la escalada porque les víes son mui físiques y nun ye como en Pins san Rire, onde pues llevate varios sextos pa ponete a tonu y dir garrando puxu p'apretar más fuerte.
En Ventanas Rubén y Orlando esfrutando d'un día brutal
Col pasu los díes fueron sumándose más xente astur, Ani, Rubén y Santos (con un grupu de collacios de La Rioja brutales), asina como collacios de Catalunya como Viti, Ricard y Sergi, que ficieron más amenos tanto los momentos d'escalada como de furgo. Pa l'alcordanza quedarán tolos terraceos post-escalada y les llarguísimes cenes fuera de la furgo, echando mil rises y probando lo meyor de cada tierra.
Rúben esnalando en Ventanas
A mediaos de viaxe les fuerces fueron a menos y nun sólo pol cansanciu d'escalar, sinon que como somos pelín fatos, tando alvertíos de que beber agua de la fonte del pueblu yera plan de mierda, pues defechu fue plan de mierda, ya que tirámonos varios díes revueltos del estómagu y casi nun recuperamos totalmente hasta l'últimu fin de selmana cuando ya casi tocaba colar p'Asturies de vuelta.
Kíla y Senda... enemiges íntimes
Hai que dicir, que la escalada equí da pa lo que da y más de tres o cuatru pegues al día te funden, asina que tampoco ye que tengas mecha pa mucho más, d'esta miente pruebes una vía y si te gusta y nun te la lleves, vuelves a por ella al día siguiente, poro nun da p'andar saltando d'un seutor a otru sobretou si andes probando coses nun grau que ya te resulta apretón.
Santos nun viote con unes vistes increyibles de los barrancos del Mascún
Tamién fué un placer topanos con unos xaponeses, casi tolos díes, que mui amables enantes de marchar de Rodellar, ofreciéronmos unos obsequios y correspondímos-yos con una guía de la zona norte, pa ver si animamos a xente foriato a conocer la caliza d'Asturies y de la redolada norteña (P.D: Viendo como taba'l parking de Teberga esti branu, nun se yo si fuera bona idega)
Día de despedía del equipín astur con dellos collacios
A la fín, les vacaciones son vacaciones y nun podemos querer apretar y encadenar como en casa. Lo importante ye la compañía, ya sea con collacios d'a diariu o con xente nuevo que paez que lleves tola vida de rises con ellos a los 5 minutos de conocelos y ye que la escalada ye esto... facer comuña y divertirnos faciendo'l nuesu deporte.
Camudando'l Camín nel barrancu del Mascún
-----------------------------------------------------------------------------------------------
Del 18 al 24 de Setiembre de 2017
Mira que llevo ya unos añinos nesto d'esguilar, pero nunca me diera por facer una viaxe d'escalada o más bien, nunca nun tuviera la oportunidá de llevalu alantre. A la fín, xurdió la idega nel roco de pasar una semana trepando en Rodellar y sin pensalo, p'allá que nos fuimos otru collaciu y yo.
Conozo Uesca de varios viaxes al Pirinéu pa facer monte, pero nun conocía la xerra de Guara, poro yera too nuevu pa mín. Y si dalgo tengo que dicir del cañón del Mascún y Rodellar, ye que tamos nun llugar increyíblemente guapu.
Vayas a escalar, a facer descensos de barrancos o cualesquier otra actividá acuática o simplemente a patiar peles munches rutes qu'esisten per Guara, paga la pena. Ye más, quiciás, prestaríame na próxima visita, llevame les zapatilles de correr y meter nel día de descansu una bona corretiada pa conocer lo máximu posible'l cañón del Mascún.
Aportar a Rodellar dende Asturies... pues como pa tirar pal Pirinéu... una soba de coche (furgo nesti casu) y de peaxes perimportante. Pero ye lo qu'hai, sarna con gustu... y más yendo de rises, perdiéndonos per Vitoria nel almuerzu y desistiendo d'arribar a una hora decente pa esguilar nel primer día... poro parar un ratín en Riglos yera más que necesariu.
Baxando pel camín col míticu Delfín al fondu y el nuesu seutor favoritu... Aquest any sí
Dempués de ver los parés de Riglos, siguimos viaxe hacia Rodellar, aportando a una hora prudente, p'aparcar la furgo y dar un paseín pel pueblu, ya incluso baxar a conocer dalgunu de los seutores d'escalada más averaos al pueblu.
Si'l cañón del Mascún, onde alcuéntrense casi tolos seutores, ye guapu, el pueblu nun se queda atrás. Les sos cais empedraes y mayoría de cases bien conservaes, da-y esi puntín a pueblu acoyedor, pel que presta pasiar y parar a tomar dalgo na terraza del chigre, nel camping, hotel o nel albergue d'escaladores.
Al siguiente día, almorzaremos na furgo y dempués de pasar pol Hotel, a tomar un cafetín, siguimos camín travesando tol pueblu, pa garrar el camín más llargu, que nos fadría pasar pol seutor Camino, onde alcuéntrense víes non mui llargues pero intenses.
Nun paramos y siguimos patéu, pa conocer un seutor que ya diba marcanos tol viaxe y ye qu'Aquest any sí y la so vía Spasiva, diba tenenos más tiempu del deseyáu nel so pié de vía. Sicasí, yera ún de los llugares con más encantu, a la vera'l ríu y casi siempre a la solombra, poro yera bien prestosu pasar el día trepando y descansando.
Desplomes y más desplomes... y nuesa vía de proyeutu... Spasiva
Esi primer día, fuimos hasta otru seutor tremendu, como ye'l Pince sans Rire, onde na mandrecha, tenemos víes perllargues más verticales y a la manzorga víes curties pero desplomaes, onde pesie a los enormes cazos, podemos acabar pringando la vía con una petada escomanada.
Nesti primer día, intentamos facenos a la roca, encadenando varios 6b, acabando'l día con un cansanciu bien curiosu, que namás que diónos pa parar a la vuelta hacia'l pueblu, nel seutor Bikini, onde ficimos unes poques víes de placa, por facer más metros.
El segundu día, ya nos meteríemos nel percal, montando la Spasiva (primer llargu), un 7b desplomáu con entrada per chorreres que poníanos a vivir, dexándonos valdaos a los dos pegues, pa nun ser casi capaces de trepar más en tol día.
Defechu, paezme que nun fuimos mui espabilaos, a la hora de preparar una estratexa, ya qu'encadenar dalgo pola mañana, camiento que diba danos un pelín más d'enerxía positiva pa dalo too con unu o dos pegues a lo más al proyeutu.
Pero bono, les coses son como son, a los dos nos prestó la vía y nun solo a nós, ya que'l tercer día sumáronse a nós, otru par de collacios del roco y ya los pegues a esta vía, fueron continuaos y mui fanáticos.
En tiempos de descansu o de reventada total, nun dexamos de dar paseos, a seutores con víes más cencielles, como la Fuente, al llau de la ablucante Surgencia, Bikini, Travesía de los Ángeles, El Camino... y lo demás alternando visites al Pince Sans Rire y Aquest any Sí.
La verdá ye quedámonos un pelín escasos de tiempu, aparte d'azotanos demasiáu cola Spasiva, la cual pringábemos en cadena,... pero pringábemos jeje. Poro, pal próximu viaxe d'escalada, será meyor, nun apuntar tan alto y dedicanos a escalar más víes, mientres les fuercies seyan a dexanos.
En resume, bon primer viaxe a trepar, quedándome con más ganes de tornar a Rodellar a conocer más seutores, más vies y más momentos con collacios nos piés de vía, asegurando, escalando o simplemente tiraos na furgo.
No hay comentarios:
Publicar un comentario