6 de Setiembre de 2020
Track: Rodellar (Uesca) - Cresta Balcez - Cheto
Tornábemos a Rodellar por tercer vegada nun viaxe d'escalada, pero quiciás esti añu, fué nel que descubrí un mundiu más allá, alloñándose del fanatismu escalador que me suel atufar a los pocos díes. Poro, llevé ropa y zapas pa conocer un pocu más esi mundiu de senderos del Guara, senderos qu'hai que dicir alto y claro, tan perbien calteníos y señalizaos ufreciendo un sinfín d'oportunidaes pa salir a patiar o entrenar un pocu corretiando per ellos.
Conociendo una migayina los senderos de Guara
Por problemes na planta los pies, nun pudi salir namái qu'un par de díes a correr y ambos fice'l mesmu percorríu probando dalguna variante, anque tengo claro que pa un pateín mañaneru o un entrenu curtiu y potente, quédome con esta ruta, anque de xuru qu'en prósimos viaxes espero ampliar opciones pa entrenos más llargos.
Ascendemos pel Canalizo hacia la cresta Balcez con vistes hacia'l Cabezo de Guara
Nesti casu, salía a correr dende'l camping Mascún onde tábemos aloxaos, tomando'l camín xustu a la mandrecha, goliendo la cocina ya a los primeros almuerzos. El camín, a tramos empedráu y a tramos de tierra, asciende sele hacia lo que nómase'l Canalizo, demientres ganamos altor sol pueblu de Rodellar, al que va entrándo-y el solín y con él la vida mañanera.
Según vamos ganando desnivel, les vistes son cada vez más guapes, teniendo al frente'l Cabezo y Tozal de Guara del otru llau del Mascún y lo que ye más ablucante, tendremos vistes sola fastera de Mont Perdito. Pasaremos al llau d'un barrancu con guapos parés y entraremos nun tarrén d'envueltes, onde hai que tar fuerte pa xubir corriendo, poro toca baxar revoluciones y facer l'últimu tramu andando hasta'l colláu que daría vistes al valle de Balcés.
Corremos pela guapa Cresta Balcez esfrutando del paisaxe
Equí, nun pueu facer otra cosa que garrar aliendu, esfrutar del increyible paisaxe a esti valle ensin vida humana, onde un profundu barrancu abelluga cientos de parés que n'otru llugar quiciás tuvieren equipaes, pero tamos en Rodellar y nun accesu más cómodu, tenemos parés y parés onde esguilar.
Entramos darréu a un tramu bien correnderu y de camín más ampliu, pela Cresta Balcez, onde lo paso pipa per un tarrén más quebrapates hasta aportar al colláu San Martín. Pocu más alantre, alcontrámonos con otru indicador que nos da amuesa de siguir ampliando la carrerina mañanera, hasta onde nos pete, sólo hai que tar fuerte y entrenáu y los kilómetros lleguen sólos.
Baxamos pel barrancu de San Martín a fueu hacia Cheto
Nesti casu, decido descender pel barrancu San Martín, per un camín ampliu pero téunicu, onde hai qu'andar sollerte pa baxar a fueu corriendo ensin tronzar un todiellu. Fadremos la metá del descensu nun par d'envueltes pegaos a dellos parés y cruciaremos el barrancu onde'l senderu estréchase faciendo un par de xubidenes enantes d'entrar a una llera onde ya tirámonos per tarrén téunicu a fueu hacia'l pueblu de Cheto.
La divertída baxada nos dexará nel pueblín de Cheto pa diez minutos dempués arribar a Rodellar al altor de los chigres del pueblu. D'esti xeitu zarramos una circular de 10.3 km nun par d'hores de carrera, con una ascensión acumulada d'unos 800 m, lo que dexa claro que ye un entrenu perfeutu enantes de dir a esguilar tol día.
Camudando'l Camín peles siendes de Guara
No hay comentarios:
Publicar un comentario