Casomera (Ayer) - El Cuitu - Picu L.lamas - Urmial

6 de Febreru de 2022

Track: Casomera (Ayer) - El Picu Cuitu - L.lamas - Urmial

Camudamos un pocu les rutes ivernales del GM Xuan de la Borrina, por restolar dalgo afayaizu ensin ñeve y dempués de tantos años de patéu per Asturies, siempre ando a la gueta de llugares desconocíos, col envís de tachar montes pelos qu'entá nun puse los miós pies enriba.

Nesta xera andamos, poro les rutes dirán convirtiéndose nuna aventura tres d'otra, yéndonos nesti casu hasta'l conceyu d'Ayer, que tan bones rutes lleva dándonos nestos años. La idega yera conocer la parte baxa de la xerra de Fuentes d'Inviernu, averándonos hasta'l guapu pueblu de Casomera nel valle del rigu Ayer.

Partimos de Casomera (625 m) nel valle del rigu Ayer

 

Aparcaremos al llau de la ilesia, al empar que dellos montañeros más y pondrémonos a caleyar pela carretera con una xelada perfuerte, intentando calecer músculos lo antes posible. Magar d'un kilómetru de camín, al altor de la riega Castañera, saldremos per un senderu que dirá faciéndonos xubir a la manzorga'l cauce hasta crucialo en Polumal, pa continuar hacia los praos de Cul.lacón.

Caleyamos per siendes pente la viesca hasta los praos de Cul.lacón

Equí, lo meyor ye travesar una portiella y subir a pinchu pel prau hasta aportar a tarrén de viesca, onde diremos siguiendo un camín, dalgo tomáu, pero que va empobinándonos correutamente en varies envueltes, pasando peles cabañes de Velayu y la L.longa hasta aportar a Viscana, onde garramos una pista que vien de Ruayer y que fadrános percenciellu'l nuesu caminar.

Aportamos a una pista perguapa que llevarános hacia la parte alta de la Xerra de Fuentes d'Inviernu

Darréu, dexaremos el caleyar más abegosu, anque mui guapu per nuna viesca pelín tomada pa continuar per esta "autopista" pela que ganaremos altor, con muncha comodidá, pesie a dir alcontrándonos con cazadores, apurando'l pasu tolo que podemos pa salir del so radiu d'aición, cosa qu'algamaremos nes cabañes de Murazán, que diéronmos pasu direutu hasta'l col.láu la L.lera (1337 m).

Caleyamos con ritmu allegra p'arribar al col.láu la L.lera onde les vistes descománense

La verdá ye que pel momentu, la ruta taba siendo meyor de lo esperáu, con una viesca guapa pero dalgo abandonada y una pista perfeuta pa dar zapatu, hasta arribar a la parte alta de la xerra onde les vistes yeren descomanaes, con tolos grandes montes ayeranos dende l'Esturbin hasta'l Torres.

Ascensión per tierra quemada hasta'l cumal d'El Cuitu

Dende equí, tan sólo teníemos que siguir la cuerda ya intentar nun ponenos como'l tizón, de tol incendiu que calcinó tola parte baxa del nuesu oxetivu: El Cuitu. Dicir que ye una pena ver el monte prietu, pero tamién, nuna fastera estrada d'urcies el nuesu caminar fue muncu más agradable hasta los 1551 m d'El Cuitu pasando enantes pel picu La Fragua.

Semeya grupal de cume n'El Cuitu (1551 m)

Con pocu mas de dos hores andaes a bon ritmu, facíemos cota másima del día y sentábamonos a xintar daqué, demientres mirábemos les vistes a un llau y otru, quedándonos esta vegada en cotes intermedies al Este, dende'l Retriñón a Penamea y al Oeste, alcordándonos de montes como'l cordal de Cotobeyo o el picu La Boya, ensin desdexar les vistes al norte, col mar al fondu y al sur, cola preciosa Pena Reonda, Noales o Xexa.

Siguimos camín hacia'l Picu L.lamas (1428 m)

Llueu del descansín, vamos continuar hacia'l norte, metiéndonos en tarrén d'urcies, onde tendremos que lluchar un pelín pa salir a otru vértice xeodésicu como'l ye'l del Picu L.lamas. El día va pasando y la lluz según descendemos va tomando un color que convida a sacar milenta semeyes a tolos montes ñevaos qu'acolumbramos.

Baxamos pela arista Oeste en tarrén d'aventura hasta Urmial

Si'l tramu pente'l Cuitu y el L.lamas, ya yera tarrén d'aventura nel qu'alcontramos sienda tomada, la baxada pela vallina oeste, sí que la facemos al debalu, alcontrando primeru monte baxo, con cotoya baxa por suerte, hasta aportar a la primer cabaña de la braña d'Urmial.

Pasamos per Urmial a la gueta de caminos fiables hacia Casomera

Equí, garraremos un pelín más abaxo un camín trasversal a tola vallina, que nos dexará na otra fastera onde ya vamos dir per camín, dexando toles cabañes d'esta braña d'Urmial a la nuesa mandrecha, pa continuar pel cantu la xerra teniendo dos posibilidaes: baxar a los praos d'Urdiales a la mandrecha y garrar una pista que dexarános na Braña o baxar a la manzorga per unes pindes envueltes, pa cruciar una riega y entrar na enorme esplanada, que son los praos de la Braña.

Descendemos hasta la Braña pa siguir al pueblu de Vil.lar

Estes dos opciones, tan bien afitaes, ya que'l grupu dixebróse ensin querer y xuntámonos toos de nuevu na Braña, pa caleyar tranquilamente hasta'l pueblu de Vil.lar, onde per camín facemos el descensu final hasta Casomera, puntu final d'esta guapa circular pela baxera de la xerra de Fuentes d'Inviernu.

En resume, guapa ruta circular de 12 km per tarrén pocu conocíu, que va llevanos a tachar un par de vértices xeodésicos ayeranos, con un desnivel de +/-1050 m nes pocu más de 6 hores de ruta, anque podemos obviar casi media horina, na qu'anduvimos a voces p'alcontranos nel descensu hasta la Braña jaja.

Ta la prósima....

Camudando'l Camín dende'l valle del rigu Ayer