Track: Tonín (Los Argüeyos) - L'Esturbín - Boleru - Vallequín
Siguimos con condiciones ivernales n'Asturies y anque lloñe de los niveles de ñeve de va un mes na Farrapona, el fríu n'altor fae que'l mantu ñivosu calténgase curiosu, lo que convídanos a facer otra ascensión con un día de solín anque perfríu.
Al igual que va más de 8 años, n'anterior ascensión al picu L'Esturbín tornamos a Tonín d'Arbas p'ascendelu, ya que la temporada anterior intentámoslo dende La Paraya n'Asturies, quedándonos nun antecumal como ye la Peña Cuaña y viendo que l'accesu ye perllargu pa la dómina l'añu na que tábemos.
Partimos de Tonín (1265 m) nun día perfrío
Más menos, vamos facer el mesmu percorríu que daquella vegada, xubiendo pel valle de Tonín, metiéndonos de primeres per un camín a la manzorga del ríu Tonín, teniendo que lluchar de más coles urcies, anque d'otra miente, dir pela parte soleyera evitónos tener que facer buelga na ñeve durante más tiempu.
L'avance pel valle, llueu de salir de la gafa vexetación, sedrá agradable y el mantu verde va desapaeciendo pa metenos dafechu nel mantu blancu, ganándo-y tarrén al valle y vistes sol nuesu oxetivu del día: L'Esturbín.
Vamos salvando desnivel pel valle Tonín cola vista puesta en L'Esturbín
Aportaremos a la final del valle y cruciaremos la riega'l Cuadru, pa entrar na fondigonada previa al entamu de l'ascensión, la cual vamos faciendo, abriendo buelga per una pala de ñeve nun estáu perbono, ensin necesidá del usu de crampones nel intre.
Kíla y yo vamos adelantándonos, faciendo un esfuerzu de los que presten pola vida, entreteniéndonos ca pocu pa sacar semeyes y garrar dalgo d'aliendu ya que lo pindio del tarrén hacia la Estrella de Cuaña pasa pelín de factura.
Cruciamos la riega'l Cuadru pa entamar l'ascensión
Una vegada que rompemos el preciosu trabe p'aportar a la Estrella de Cuaña (2042 m), esperamos un pocu a la llegada del restu'l grupu demientres echamos un vistazo a los cumales del Cuetu Barriales y del Reboqueras, que ficiera va dellos años de compaña al propiu L'Esturbín.
Más cerquino unos d'otros, garro l'arista final hacia'l picu L'Esturbín, alcontrándome menos ñeve con una capa de xelu penriba, lo qu'obliga a poner crampones o dir más pegáu al trabe sur de l'arista. Kíla y yo, pasamos con curiáu nes partes más dures ganando'l cumal con un vientu molestísimu como suel ser davezu nesti picu ayerán.
Ganamos la Estrella de Cuaña y facemos el preciosu filu hasta'l cumal de L'Esturbín
Con calma y unes vistes ablucantes, esperaremos la llegada, pali pali, del restu'l grupu que vienen felices dafechu pol día que tamos teniendo y polo guapo d'esta cabera ascensión. Alégrome fondéramente sobretou por Benjamín, que dellos problemes físicos ficieren que nun pudiera acompañanos al cumal de la Pena Calabazosa un mes atrás y esta vegada sí que tuvo'l so premiu.
GM Xuan de la Borrina feliz nos 2123 m de L'Esturbín
Una vegada más, el vientu molestu, anímanos a abandonar el cumal de L'Esturbín y vamos facelo empobinándonos hacia'l col.láu Valverde. Pa ello, si conocéis esti monte, tendremos que descender pela arista SE, ensin peganos muncho a la fastera E del picu que corta a picu dafechu y tendremos de superar nesti casu en descensu, dellos espolones de peña, que colos crampones van danos un pelín de trabayu.
Increyible cuerda con toque alpín pente L'Esturbín y el Boleru
El monte ta preciosu, nun pueu más que dir abriendo buelga y parar a sacar semeyes a los compañeros, que paren a mirar esa fastera xabaz de L'Esturbín, demientres anden sollertes de nun averase de más a los trabes que caen pal norte.
Con bon instintu, llibramos tolos espolones ensin problemes aportando al col.láu Valverde (1975 m), onde garramos impulsu pa facer otru pequeñu ascensu, hasta los 2043 m d'El Boleru, otru cumal perteneciente a los dosmiles ayeranos.
Cumal del Boleru (2043 m)
Del Boleru, descenderemos sele hacia L'Altu Aguazanes y con pocu más esfuerzu encumaremos tamién el picu Aguazanes de 2046 m, enantes d'entamar una pindia baxada que tien de llevanos hasta'l colláu Vallequín, onde decidimos parar a xintar que les 5 hores y media de ruta facién mella nos cuerpos de los montañeros.
Llueu de la xinta, dividirémonos en dos, descendiendo unos hacia'l valle de Tonín, al traviés d'una amplia vallina que dexaríelos a l'altor de las Brañas y el restu, siguiremos camún ascendiendo otru dosmil llionés como ye'l Picu Vallequín.
Siguimos pa bingo col picu Vallequín (2046 m)
Nós 2087 m del Vallequín y pegaos al so finxu de piedres, camentamos si paga la pena siguir alantre o non y viendo que ya llevamos una bona soba enriba, decidimos descender, dexando pa otra vegada la cuerda del Riañu, que llevaríanos hasta'l Cuetu Millaró.
Picar nos picaba, pero diba ser muncha xatada y los compañeros nun diben tar esperando en Tonín, onde aparte de mastinos, poca más compañía diben tener na espera. La verdá ye que nos quedaría'l picu Campastiñosas un pocu desdexáu, pero cualesquier enllaz hacia'l Cuetu Millaró siempre diba pedir un picu más y en dalgún llau había que cortar jaja.
Decidimos descender polas Campas Tiñosas hacia'l valle d'Aguazanes
Asína que coles mesmes, descendemos pela llombeta de Tonín, hasta los Llagos, cubiertos de ñeve, onde ya ganaremos la riega d'Aguazones descendiendo pel so valle hasta xuntanos a la pista del valle de Tonín, onde diremos ganando velocidá nel nuesu andar, garrando a los nuesos compañeros pocu más alantre.
A la fín, ruta bien guapa, que danos pié al maxín pa dalguna otra ivernal curiosa pela zona, pero que nesti casu, quedónos en 7 hores y 50 minutinos de bregada, superando un desnivel positivu de 1055 m en 15,6 km de percorríu.
Camudando'l Camín nos ñevaos montes del cordal cantábricu
No hay comentarios:
Publicar un comentario