viernes, 7 de junio de 2019

L'Altu La Farrapona (Somiedu) - Pena Calabazosa

24 Febreru de 2019

Track: L'Altu La Farrapona (Somiedu) - Pena Calabazosa


Dempués d'un mes ensin tornar al monte y con ciertes sensaciones estrañes, ya que debió ser la primer vegada que tuviera aguyetes dempués d'una llarga ruta per Grau, diciendo muncho de mi condición física, metémonos nel Somiedu oriental a la gueta de la primer ivernal del añu

Poro, magar d'escalar en Teberga'l día anterior, saldré con Pepa y Jose pel Altu San L.lorienzu, hasta garrar na Riera la SD-1 que nos fadrá entrar nel val.le Saliencia, pasando per Veigas, Vil.larín, Arbeyales, Éndriga y Saliencia onde cenaremos nel maraviyosu Albergue de Saliencia y dormiremos nel aparcaderu.

Increyible puntu de partida nel Altu La Farrapona (1708 m)


Almorzaremos nel albergue, tamién de forma ablucante y col avisu de que podríemos xubir X km per carretera, enantes d'entamar a caleyar pela ñeve, asistimos aténtamente al show de Benjamín, intentando facer X km +1 con un deportivu de tracción trasera dando como resultáu, un coche empozáu hasta la vuelta de la ruta, jajaja.

Coles rises davezu, saldremos carretera arriba hasta topar col camín antiguu que xube'l valle hasta L'Altu La Farrapona (1708 m), onde entamaría la nuesa ruta de verdá. Equí, quitaremos ropa ya que va caleciendo'l solete y saldremos pela mesma llende pente Asturies y Llión col envís de ganar l'Altu'l Col.ladín, onde garraremos la cuerda que tien de llevanos hacia los nuesos oxetivos montunos: tres dosmiles cola Pena Calabazosa como finxu cimeru del día.

Saldremos con fuercia faciendo les primeres ramples algamando prestoses vistes

De primeres vamos avanzando ensin crampones, pasando pela Forcada y trazando ruta a vegaes pel sur y otres pel norte, dando vista al l.lagu La Cueva unes vegaes y otres hacia los montes llioneses y el val.le de Turrustigu.

Al altor de la pena la Braña, tenemos una travesía penriba del mayáu Calabazosa, decidiendo'l grupu poner los crampones ya que'l tarrén ye pindiu y un resbarión pué llevanos munchos metros abaxo. La falta de material fizo que Simón tuviera que descender pela fastera más soleyera hacia'l mayáu, quedándose ensin aportar hasta'l colláu Sousas.

Facemos trabayu per pindiu tarrén pa ganar el cumal de la pena Cualmarce

Col restu'l grupu equipáu, yo sigo sin cramponiar y entamamos a ascender hacia'l nuesu primer oxetivu del día: la pena Cualmarce, la cual facemos ensin mayores dificultaes llueu d'un tramu pelín más pindiu nel que tocó abrir buelga pel llugar más cómodu qu'alcontramos.

Les vistes dende Cualmarce son una pasada, en toles direiciones, pero decidimos continuar ya que mandamos a Benjamín hacia la collada Cualmarce, col envís d'aforrase l'esfuerzu d'estos dos cumales, que nun faen otra cosa qu'amosanos el paraísu ñeváu que ye Somiedu.

Axuntamos el curtiu crestéu pente la pena Cualmarce (2003 m y la Colorá (2010 m)

Si nun día asína, nun te realcuentres col tu puntu montañeru, entos ye que nun ties sangre, ya qu'al día que tamos teniendo, nun-y podemos pedir más, dir cramponiando y col piolé en manga curtia ye pa facéselo mirar.

Les nueses cares son de disfrute total, cosa que paez ser que nun-y ta pasando a Benjamín, ya que vémoslo avanzar con cierta lentitú. Esto nos fai, intentar poner más ritmu pero nun ye'l meyor momentu ya que tenemos antes nós, un cresteríu de roca pa descender de la Colorá, que faese un pelín de bola colos crampones.

Descendemos hacia'l colláu Cualmarce con vistes a l'ablucante Calabazosa

Como nun los puse adelántome hasta'l colláu Cualmarce (1968 m) onde alcuéntrome con Benjamín que dizme que la travesía que fizo pembaxo les peñes casi lu funde, ya que la ñeve taba blando. Dígo que-y descanse tranquilamente y qu'ascendemos a la Calabazosa cola calma.

Facemos xuntanza, picamos dalgo y vemos que Benjamín nun acaba de recuperase del esfuerzu, colo que decidimos tirar p'arriba, ya que tenemos presente, que tovía va tocanos picar xelu pa sacar el coche cuando lleguemos.

Ascenderemos a la pena Calabazosa con un ambiente increyible

A primer vista, acoyona un pelín la entrada a la ruta de la Calabazosa y decido poner crampones, ya que sinon los compañeros me cruxen tamién jeje. Arranco p'arriba con Kíla y vamos abriendo buelga nun tramín más pindiu, pa salir un hombru onde espéranos una travesía preciosa.

L'ambiente alpín ye tremendu y voi esfrutando munchsísimu trabayando la buelga, acompañando y faciendo más guapa la ruta, les vistes hacia'l Picu Blancu que ficiéramos l'añu anterior, asina como hacia la Muria Brava y Pena Orniz.

Trabayando na buelga p'algamar el cumal de la pena Calabazosa

La primera en aportar a los 2104 m de la Pena Calabazosa ye la mió fiel compañerina, Kíla, recuperada dafechu de dellos problemes nel cadril, que teníanos esmolíos enforma. Pali, pali van aportando los collacios, siendo'l siguiente Haritz, que nun pue venir más contentu, ya que l'ambiente aéreu y la ñeve nun son unes condiciones onde tea tranquilu.

Cumal de la Pena Calabazosa (2104 m)

Pero esta vegada sí, vieno tranquilu siguiendo la buelga que ficiéramos la perrina y yo, dándonos un abrazu nesti maraviya de llugar. Pepa y Jose aporten unos minutinos más tarde completando'l grupu, que nun puede tar más contentu... la primer ivernal taba fecha y nun pudimos tener unes condiciones meyores... asína da gustu trabayar y fozar pela ñevadona somedana.

El tiempu apremiaba asina qu'a fueu hacia los llagos de Saliencia

Coles mesmes, llueu de les semeyes, entamamos el descensu pel mesmu camín, alcontrándonos con dellos montañeros que veníen dende la fastera llionesa y qu'agradecíeronmos la buelga fecha, ya que tuvieron condiciones pesaes por mor de la ñeve blando y veníen pelín desfechos.

Xintamos dalgo na collada con Benjamín, que recuperáu diz que casi tuvo ganes d'ascender colos llioneses, pero con bona vista, sabiendo que quedaba muncho por baxar, dexó fuercies p'arrancar toos xuntos a bon ritmu hacia los llagos de Saliencia.

Facemos el descensu normal hacia'l l.lagu Calabazosa

La baxada la fadremos pela normal dende la collada Cualmarce, con un rápidu descensu pel Canalizu, aprovechando'l bon estáu de la ñeve, hasta dar colos nuesos güeyos col l.lagu Calabazosa, xeláu dafechu y col Cerveiriz un pelín per detrás.

Les sensaciones tolos años son iguales, pensar que ya ta too fechu, pero siempre toca arrodiar estos enormes llagos y faese pesáu, sobretou si tenemos tramos de ñeve blando pola asoleyada, con otros de xelu puru, ya que tenemos fasteres onde nun pega'l sol en tol iviernu.

Aportamos de nuevu al altu La Farropona dende'l l.lagu La Cueva

Pali pali, diremos faciendo camín, ya cansadinos y cola mente puesta en sacar el coche de Benjamín, poro tiramos lo más aína posible bordiando primeru'l Calabazosa hasta la forcada homónima, onde pasaremos a bordiar tamién pela mandrecha'l l.lagu la Cueva, garrando al fin, la pista que tien de depositanos nel Altu La Farrapona.

Dende equí, tocó baxar hasta'l coche onde sacamos como pudimos el coche, ganándonos más si cabía les cerveces nel Albergue de Saliencia. Al final, ensin contar el camín dende'l coche a la Farrapona, saldríen unes 6 hores de ruta preciosa ivernal, con un desnivel acumuláu de 715 m y 9,25 km, anque dende de dexamos los coches bien podemos sumá-y otra hora de ruta y otros 300 de desnivel acumuláu de xuru

Camudando'l Camín pelos montes somedanos

No hay comentarios:

Publicar un comentario