Track: Llinares (Proaza) - San Adrianu'l Monte - Buei Muertu - L'Oral - Cuallagar
Dempués d'un parón perimportante de más d'un mes ensin salir de monte, a la fín, organizamos una ruta y lloñe de buscar grandes hestories, preferí meter kms de patéu ensin dificultá y conocer una fastera asturiana que tando mui cerquina del centru asturianu, caltién un toque de soledá que llevó a munchos pueblos a desaniciase poblacionalmente y pali pali, tamién estructuralmente.
Pa ello, partiremos del pueblu proacín de Llinares, al qu'aportamos dende Xixón dempués del clásicu camín hacia'l valle del Trubia, al que tantes vegaes fuí a esguilar. Una vegada qu'aportamos a San Andrés desviarémonos hacia Castañéu'l Monte nel conceyu de Santu Adrianu y dende ellí, siguiremos carretera arriba hasta'l pueblu de Llinares a un ablucante altor de 760m
Salimos bien ceo del pueblu de Llinares (760 m)
Sorprende l'altor nel qu'asítiase esti pueblín quedándonos claro, que de xuru alborez más d'una vegada al añu, cubiertu de ñeve. Por suerte, va un tiempín que nun ñeva y el mantu blancu fué retrocediendo hasta l'altu monte astur que nesta fastera sedría'l L'Aramo y el macizu de Penubina.
Tamos pelín zánganos a la hora d'arrancar a caleyar y fadrémoslo per una llarguísima pista, con pinta de ser asfaltada en breve, que durante pocu más de 3 km nos fadrá calecer pastes relaxádamente hasta les guapes cases de Las Veigas.
Caleyaremos per pista hacia Las Veigas
Perpasaremos el pueblu y facemos una envuelta p'arrodiar pela manzorga'l picu'l Cuervu. Nesti travesía, alcontremos el camín zarráu per mor de les ñeves cayíes y tendremos de salinos a un prau hasta aportar a una parte más llimpia de camín, onde ya podremos caleyar con calma pegaos al barrancu de la Cardanosa.
Llueu devolar una primer colladina con vistes al picu Buei Muertu, entamaremos a seguir camín pegaos a la riega, nun tramu bien guapu, col envís d'empobinanos hacia les cases abandonaes de la Condesa, ya pertenecientes al conceyu de Grau.
Siguiremos camín hacia les cases de la Condesa con vistes al Buei Muertu
Dende'l conceyu de Grau tuvieron a bien facer una ruta de senderismu de los pueblos desaniciaos del conceyu, siendo les cases de La Condesa ún d'ellos. Nós, magar de descender tol valle La Cardanosa sele, esfrutando del camín, nun pudimos facer otra cosa que parar con calma a echar un vistazu a toles ayalgues en forma de preseos que díbemos alcontrando baxo los horros o nes antoxanes de les cases.
Caleyaremos pentes los restos d'un tiempu pasáu, que nin meyor nin pior, diferente dafechu del nuesu, anque como dixe, abluca saber que tas a menos de media hora d'Uviéu y al empar tas enforma lloñe de toles comodidaes urbanites, onde caseríes de bon tamañu nun algamaron a tener nin lletricidá.
Empobinámonos hacia'l pueblu abandonáu de San Adrianu'l Monte
Vamos comentando pausádamente esto, diciendo que nun tamos en Ponga, nun tamos en Tolivia, nun ye Bulnes nin Cabrales, ye al llau d'Uviéu, nel conceyu de Grau y lo pior de tou ye que tamos nel camín, de que día tres día, les lluces de los pueblos y la vida nel mundiu rural, vaya apigazando casa tres casa, chimenea tres chimenea hasta desaniciase.
Nestos camientos, baxaremos hacia'l calce del rigu Las Varas, pa siguir per pista, penmediu d'una viesca preciosa, hasta la ponte que va llevanos a ascender a un pueblu deshabitáu como ye'l de San Adrianu'l Monte, un pueblu ablucante dafechu.
Travesamos con calma San Adrianu'l Monte y entamamos l'ascensión al Buei Muertu
Yo nun son unes caseríes sueltes, San Adrianu'l Monte ye un pueblu que quedó ensin xente rexistráu viviendo nel 2014, pero según pudimos ver entá veíase dalguna vivienda abierta y caleyando peles sos cais, pues tastiar que nun acabó del tou la vida nel llugar.
Facemos la pindia y llarga xubida al Buei Muertu
Ye bien guapu pasiar pela so plaza, ensin asfaltar nin empedrar, simplemente ye un prau y saliendo dende ella pa la parte alta del pueblu, aportaremos al prau onde cláramente caltiénse la folixa, tando la barraca tovía montada nestes feches.
Cume nel picu'l Buei Muertu (1023 m)
Dende'l mesmu prau, tendremos accesu hacia les cabañes de Folgueras peles que pasamos, enantes d'entamar una llarga y pindia xubida hacia'l Picu'l Buei Muertu. Les vistes dende esti modestu cumal de 1023 m sorprendren enforma, teniendo ante nós dende'l macizu de Penubina, L'Aramu hasta llegar a ver al oriente a los nuesos Picos d'Uropa.
Empobinámonos sele hacia'l Picu L'Oral pasando per Brañas Negras
Nesti día soleyeru, pero fresquete por mor del vientu, decidimos abelluganos a esperar que'l grupu volviera a reunise, ya que lo pindio del tarrén paso dalgo de factura y magar d'una xinta tranquila, seguiremos camín llombeando tol cordal hacia les cabañes de las Brañas Negras.
Facemos cume nel Picu L'Oral (1239 m)
El sol va cayendo nestos primeros díes del añu y los collores d'esta cada vegada menos verde Asturies, van amatagándose hacia'l atapecer. Con un últimu finxu importante a facer del día, dalgunos averámonos dende'l colláu de Fancuaya hasta'l cumal del picu L'Oral que conociera va dellos años cola collacia, Veru nuna ñevada ablucante, la cual nun tenemos nin de broma esti añu.
Como baxamos a facer una visitina a Cuallagar
Con pocu más que caleyar pela panda herbosa, vamos aportando ún a ún a los 1239 m del Picu L'Oral, dende'l que facemos bien de semeyes en toles direiciones. Coles mesmes y sabiendo que'l restu'l grupu va tar esperándonos, empobinámonos cuesta abaxo, pero onde más llimpiu de cotoyes atopamos p'aportar a Cuallagar.
Tornando hacia Llinares per Guamón y Covallos
Dempués de la mítica visitina a la cueva, cosa que nun fuera posible la vegada anterior con tal ñevadona, ascenderemos hasta la portiella'l Guamón, onde garraremos pista relaxada, pasando per delles brañes perbien calteníes, como les de Areyanos y Covayos hasta aportar al Cantu La Cruz, onde descenderemos finalmente hasta Llinares.
Coles últimes lluces y unos collores intensos, que daben más prestor a les guapes vistes sol macizu de Penubina, L'Aramu o la peña Caranga, arribamos al pueblu llueu de 22,45 km de percorríu, 1065 m de desnivel positivu y unes 7 hores y media de patéu.
Camudando'l Camín col atapecer iverniegu
No hay comentarios:
Publicar un comentario