Track: Villamoréi (Sobrescobiu) - Torruxón - Llampaces - Soto
Casi un mes dempués de la última salida el GM Xuan de la Borrina, tornamos al monte y con un día pelín gafu, restolamos pente les rutes de calendariu pa salir anque seya a dar un paseín. La escoyeta de la ruta, fue col envís, de que'l grupu fuera garrando dalgo de puxu y motivación y por que non, garrar un pelín de forma.
Pa ello, averámonos hasta'l conceyu de Sobrescobiu y más en concretu al pueblu de Villamoréi dende onde entamará la nuesa circular pela xerra'l Crespón. Va dellos años, percorriera tola xerra dende'l Cogollu al picu Llampaces pero esta vegada vamos intentar ascender al más picu nomáu de la xerra propiamente dicho, sacante de los cumales solitarios del Corbellosu y el Guanalón y Cogollu.
Partimos del guapu pueblín de Villamoréi (390 m)
Como siempre, p'aportar al pueblu, saldremos dende Xixón, pela autovía minera hasta garrar el corredor del Nalón, al traviés del cuál damos bona cuenta de los conceyos de Llangréu, Samartín del Rei Aurelio y Llaviana, p'aportar finalmente na entrada al parque de Reres, Sobrescobiu, onde almorzamos como siempre en Rusecu y siguimos dempués pela Polina hasta Villamoréi.
Pa ello más menos, vamos facer el percorríu de la primer parte de trail de Reres, que ye un de los miós trail favoritos, por llargura, percorríu montuno y vistes perguapes. Poro, saldremos de Villamoréi, caleyando cómodamente pel PR que tien de llevanos hacia'l Torrexón, siempre pasando per tolos guapos miraores onde tendremos bona información del entornu qu'arródianos.
Facemos camín hacia'l Torrexón de Villamoréi
Como'l día nun ta pa munches maraviyes, nun paramos demasiáu nel nuesu camín, pero si que podemos esfrutar d'un caleyar nun ambiente pelín misteriosu xugando'l borrín penriba del banzáu de Rusecu, asomando'l sol dacuando tamién.
Pali, pali, vamos faciendo les revueltes del banzáu hasta dir dando vista al nomáu Torruxón de Villamoréi, pel que nun pasa'l trail pero sí que vamos averanos hasta él, dándo-y la vuelta y viendo los febles restos d'una quintana al so pié y del propiu Torrexón.
Ascendemos hacia Fresnéu a la gueta de la canalización d'agua
Ensin más, dexamos atrás los vestixos de la hestoria astur y del conceyu coyanu y xubimos de nuevu hacia la sienda principal pa garrar per pindiu tarrén, una sienda marcada entá con dalgún banderín del trail, que baxé na mochila, hasta l'enllaz col PR de la xerra'l Crespón.
Nel intre, siguiremos el PR cómodamente y siempre n'ascensu hacia'l mayau de Fresnéu onde topámonos cola conducción del canal d'agua qu'empobínase dende Caliao en Casu hasta la costa en Xixón y que tien tamién un ultratrail nomáu como la Carrerona del Agua.
Ascensión a pinchu y crestéu hacia'l Picu Llampaces
A nós, va duranos más bien pocu'l caleyar cenciellu penriba'l canal y bien ceo vamos decidir tirar a pinchu hacia la Güella de Cardanu, que nun ye otra cosa, qu'un pasu angostu , hacia la Xerra'l Crespon saliendo esta al norte del Picu'l Fueyu.
A dicir verdá, el tarrén nun ye mui cenciellu, pero teniendo bona visión y sobretou faciéndolo en seco, podremos entrá-y sin munchos problemes y siguir navegando pente'l picu'l Fueyu y el picu Llampaces, sedrá'l típicu crestéu amestáu de yerba llargu y caliza al que tanto tamos avezaos n'Asturies y que conociéramos perbien na crestería integral del Crespón que ficiéramos va 8 añinos.
Cume del Picu Llampaces (1137 m)
Col día amenazando ponese a llover enforma, sacamos la semeya de rigor del cumal y decidimos descender nun fuéramos garrar una pingadura y ponese'l tarré muncho más delicáu. Coses que pasen, al pocu de siguir crestéu hacia'l colláu pente'l Llampaces y la Peña Escrita, namás garrar la sienda normal de xubida, les ñubes desapaecen y ufrécenmnos una baxada seliquina y soleyera.
Esta situación dió pié a qu'al aportar al mayáu Llampaces, decidiéramos parar a xintar cola calma pente les guapes cabañes. Con casi media horina de descansu y 4 horines d'actividá, agora sí, vamos afrontar el míticu PR que tien de llevanos penriba la canalización d'agua.
Descendemos pela normal hasta la mayada de Llampaces
De primeres faldiaremos pembaxo de les muries que caen dende la Peña Escrita y con un andar agradable diremos faciendo camín. Dicir que si'l tiempu ponse mui gafu, pudiéremos descender hacia la mayada Escrita y garrar un claru camín que fadríanos baxar en pocu tiempu a Soto.
El día paez qu'aguanta y les miós alcordances de dir corriendo nel trail per esti PR, faime animar a los collacios a siguir un pocu más y estirar la ruta tanto en kilómetros como en hores. La xente va animada y pasaremos a conocer el tramu más aéreu d'esti senderu que como non, va aseguráu con una cuerda afitada a la peña pembaxu de les peñes de Faltiñosu y Rearcu.
Caleyamos esfrutando de los pasinos aéres de la canal d'agua del Crespón
Perpasaos estos guapos pasinos, saldremos a tarrenu más abiertu a partir de la mayada Cabera y a partir d'equí, entamaremos el descensu más acusáu hacia la mayada de Prieya onde podremos facer el últimu descansu a les nueses pates p'abordar los más de 400 m de desnivel negativu hasta Soto.
La baxada sedrá ya per pista siempre con guapes vistes los montes de Llaímo, la cruz de los Ríos y el picu Retriñón que personalmente tien más guapa xubida dende'l conceyu de Casu que dende Ayer, pero pa gustos collores como casi siempre.
Siguiremos camín hasta la mayada de Prieya onde descendemos hacia Soto
Como siempre, voi baxando inmersu nos mios encamientos y esta vegada collaciu y vicepresidente del GM Xuan de la Borrina, quédase mirando al empar, pa la mesma foz que yo y entrúgame si la conozo a lo que-y retruco que non, qu'esa foz pente los picos Cogullu y Xerragua nun la conozo, pero que tien de llegar a la de Corbellosu y que pudiera ser una circular aventurera tornando pel Alba... quedamos pensando, reímonos y apuntamos na llibreta.
Pocu dempués d'esta visión garraríemos ya la pista que vien dende la Foz del Alba y caleyaríemos sele pasando pel pueblu de Soto, pa siguir per pista y carretera hasta Villamoréi, onde terminaríemos la ruta dempués de 6 hores y 15 minutinos de ruta, con 13,5 km de percorríu y unos 900 m de desnivel positivu acumuláu.
Camudando'l Camín per tierres coyanes
No hay comentarios:
Publicar un comentario