viernes, 22 de marzo de 2019

Rifabar (Piloña) - Maserones - Xiblaniella - Lligüeria

25 Payares de 2018 
 
Track: Rifabar (Piloña) - Maserones - Xiblaniella - Lligüeria




Magar d'un tiempu de reposu, dende les xataes d'Ochobre per Picos, tornamos al monte llueu de que quedaren nel tinteru un par de rutes del grupu que nun acabaron por salir. Esta vegada sí que xuntámonos un bon garrapiellu xente y dan un día de sol estupendo pa poder conocer ún de les poques foces na fastera del Infiernu que quédame per conocer: Los Maserones.

El día anterior, tuviéramos esguilando pela Forcada y como non, quedamos a durmir na capital de Piloña, L'Infiestu, p'almorzar un pinchín de tortiella de bona mañana y una vegada que xuntémonos toos entamar a viaxar hacia la vega'l rigu Espinaréu.

Partimos dende'l pueblu piloñés de Rifabar (323 m)


Poro, garraremos la carretera PI-4 que percorrerá la vera'l ríu Espinaréu, pasando pelos pueblos d'Espinaréu, Riquimáu y Rifabar, onde pararemos pa preparar los trastos y entamar la ruta. Pa ello empobinarémonos al Llugar de Riba, barriu altu de Rifabar, dende'l que garraremos camín cenciellu hacia les falderes de la Xerra de Xiblaniella.

El día nun pueu tar más guapu y paez qu'axuntámonos vieyos conocíos del grupu Xuan de la Borrina, tornando al redil, el nuesu vicepresidente, Simón, que ye capaz de tresmitime esa enerxía ya ilusión que taba faltádome nos últimos tiempos.

La ñeve ceo cayío fainos bregar pa salir al camín de Llarantiellu

Munches vegaes nun valoramos les coses bien cencielles, como ye tener tiempu pa ti, pa dago tan normal pa dalgunos como ye dir de monte. Cola charra animada pente collacios y una lluchada perimportante coles canes de los árboles cayíos en batalla cola ñeve tempranera, vamos xubiendo desnivel col envís de ganar el camín del Llarantiellu.

Pasaremos faciendo les envueltes que nos pide'l monte perpasando la riega'l valle pembaxu del Cantu la Verde hasta pasáu la Vega la Cruz p'adentranos nuna nueva vallina, la del Ortigal, la cual perpasaremos pela Llera l'Agua, hasta aportar al Veneru, onde daremos vista a la vallina que tien de llevanos hacia'l nuesu destín del día: la Foz Los Maserones.

Vamos encantaos pel camín colgáu hacia'l Veneru

Tengo que dicir que'l Camín del Llarantiellu sorprendióme gratamente, siendo este con unes vistes bien guapes continuaes y calteniéndose nun estáu bien decente. Pali, pali, vamos averándonos al puntu clave de la ruta, el cual nun tenemos claru si podremos travesar y ye que les abondoses lluvies y ñeves d'estos díes ponen en dubia'l nuesu éxitu.

Dexaremos de llau el Llarantiellu que sigui hacia los collaos de Ciébanas y siguiremos per senderu descendente hacia la riega de Cuandía, ún de les tres qu'améstense na foz de los Maserones, siendo les otres dos la de Mior que baxa pela foz del Potral y la del Pedregal, con foz homónima.

Baxamos de la Pontiga hacia la Foz los Maserones

El ruxir del rigu baxo nós, faime dubiar si seremos a travesar la foz, pero según vamos averándonos más y más, vemos siempre senderu marcadín y n'amestaura tenemos la suerte de que casi tol agua de Cuandía vien procedente del Pedregal y el nuesu calce de los Maserones ta escosu y dafechu transitable.

Que dicir de la Foz de los Maserones, pues que me chiflen estos llugares, onde les riegues xúntense tomando la fuercia ún de la otra nun rigu mayor. Cada requexu que vas conociendo de les distintes foces de los montes del Infiernu ye tan guapa como l'anterior o más, viniéndome a la tiesta los Cubilones que tanto esfrutáremos va un par de temporadaes.

Travesamos la perguapa Foz los Maserones

Voi mirando pa les cares de la xente y veo que ta gustando esti requexu piloñés y como si nun quixéramos que pasara'l tiempu, dexamos a les nueses paes llevar un ritmu pausáu, hasta la salida de la foz, onde toca investigar que salida tendremos hacia la foz del Potral.

Casi tol mundiu dende la nuesa posición empobínase pa Trallán, pero nós queremos dir hacia la Xerra de Xiblaniella, poro tenemos que siguir el cursu de la riega Mior, hasta topar con una salida qu'úpanos bordiando hacia la fastera occidental del xerrón.

Facemos la salida de la Foz del Potral per tarrén pindiu

De primeres, vamos ascendiendo desnivel dexando la riega abaxo y cola suerte de les ñeves que tumbaron tolos felechales, podemos avanzar cenciello. Más tarde, nuna pequeña vega, damos descansu y restolamos un senderu qu'alcontramos pelín más arriba d'esta vega y que sepáranos dafechu de la foz del Potral.

Quiciás, quédome un pelín desilusionáu, pues apetecíame conocer la foz del Potral pel mesmu calce, p'ascender hacia la mayada del Potral dende más alantre, pero que vamos facer si alcontramos una opción sensata y normal, pues tomala y conocer el senderu que faldea Xiblaniella pel occidente.

Ascendemos dende'l Potral hacia la xerra Xiblaniella

El casu ye que fuimos negociando senderu tres senderu y aportamos a la mayada del Potral y dende esti guapu mayáu, saldremos per camín cómodu ya hacia'l colláu La Piedra (1062 m). Equí, vamos col envís d'ascender al puntu más altu de la xerra Xiblaniella: la peña La Piedra o peña Xiblaniella.

A la fín, dellos collacios prefieren quedase nel colláu y el restu entamamos a xubir per un amiestu de peña y yerba hacia'l primer cumal qu'albidramos como más altu. Ensin mayores dificultaes que siguir la traza más pisada facemos cume algamando unes precioses vistes de los Picos d'Uropa y de los grandes montes del parque de Reres.

Cumal na Peña Xiblaniella (1121 m)

Dende la nuesa posición, dámonos cuenta que nun tamos nel puntu más altu, asina qu'averámonos al cabezu siguiente, con un pequeñu destrepe y un trepín un pelín más espuestu, que llévanos a los 1121 m de la Peña Xiblaniella.

Coles semeyes feches y el trabayu tamién fechu, baxamos per otra valleya hasta un pelín pembaxu del colláu, onde alcontrámonos colos collacios qu'asperaben y ponémonos en marcha a la gueta d'un llugarín onde nun tire l'airón y poder xintar daqué.

Facemos la baxada de Xiblaniella hacia Ciébana con grandes vistes

Pegaínos a l'espolón norte de Xiblaniella, tendremos la forcadina que danos pasu a la fastera oriental del xerru, faciendo una primer baxada más direuta, pa bien ceo, pasar a facer una traviesa hacia l'hombru oriental onde alcontraremos el senderu claru que llévanos cenciello hacia los collaos de Ciébana.

Güeyu con nun baxar demasiáu a pinchu sin esta traviesa, porque'l tarrén ponse pelín tiesu y podemos alcontrar con dalgún pasu de destrepe, asína que forcadina y traviesa hacia l'hombru pa baxar pel camín correutu.

Descendemos hacia Lligüeria y per carretera hacia Rifabar

Pegaos a la fonte Cima, xintaremos nunos minutinos y viendo que'l día tórnase más murniu y sigue igual de ventoleru, decidimos baxar, per bon camín, hacia'l pueblu piloñés de Lligüeria onde quedamos un pelín ablucaos polo guapo y pol bon remanecer de munches de les cases.

En Lligüeria ya, garraremos la pista-carretera que baxa a la PI-4 y siempre con vistes a la xerra Xiblaniella al fondu y sobretou a la peña'l Castiellu, la cual casi apeteznos dir, si nun fuera polo pelín desagradable del vientu como p'allargar la ruta.

Con casi 8 hores de caleyar mui tranquilu, aportamos al pueblu de Rifabar con un total de 13.5 km y un desnivel acumuláu positivu de 1040 m, lo cual diz que ye una ruta más menos seliquina, pero con un tastu montañeru como toles rutes pel monte piloñés y lo meyor, conociendo una foz más d'esti paraisu de agua, yerba y caliza.

Camudando'l Camín col vicepresidente de vuelta

No hay comentarios:

Publicar un comentario