martes, 19 de enero de 2010

Campiellos (Sobrescobiu) - Peña La Xamoca

17 de Xineru de 2010

Track: Campiellos (Sobrescobiu) - Peña La Xamoca



Una vegada más, volvimos a una de les fasteres d'Asturies más impresionantes como ye'l parque de Redes o Reres, lo cual ye dalgo que nun tengo mui nidio, si dalguien que llea esta entrada ye a dicímelu, les mios gracies fonderes per adelantáu.

Pa llegar a ellí, como siempre salimos de Xixón pola autovía minera, pa garrar el corredor del Nalón, travesando los conceyos de Llangréu, Samartín del Rei Aurelio y Llaviana, pa namás entrar en Sobrescobiu, detenenos na entrada de la so capital, Rusecu. Ellí, quedáramos la xente del grupu montaña Xuan de la Borrina, con dos collacios, qu'apuntábensen a la primer ruta de monte con nós.

Un dellos yera Diego Pangua, ex-mayestru gaiteru míu, que contautó conmigu dempués de lleer dalguna entradina d'esti blog y l'otru Cesar, collaciu de la escuela d'informática y bon montañeru del Grupu de montaña de Llaviana, col que ya ficiera dalguna ruta en bici, como foi Bezanes (Casu) - Brañagallones.


Semeya de grupu en Campiellos (519 ms)

Dempués d'echar un cafetín en Rusecu, salimos per un cruce hacia'l pueblu de Campiellos onde ponémonos tolos trastos pa entamar la ruta hacia la peña La Xamoca, la cual parte de la mesma plaza del pueblu, xubiendo pol barriu de la Rasa, siempre per una pista bien marcada, lo cual será dalgo mui avezáu nesta ruta, por tanto, dedicámonos a avanzar bien axina (pallabra dedicada a mi güela de Ortigueira - Cuaña, tea onde te) pasando por delles revueltes nos collaos de l'Arcu, Ricáu y Sáus hasta llegar a la fin a la braña de Llagos a 968 ms d'altor.


El collaciu Cesar cola Xamoca al fondu

Esta braña con delles cabañes, ye un de los sitios más guapos de la ruta, ya qu'aparte de les propies cabañes, y el llagu xeláu qu'alcontramos, tien un mirador hacia'l parque de Reres, nel qu'un pue tirase un ratín intentando acolumbrar toles cimes que se nos presenten delantre nuesa.


En Llagos dixebrando los distintos montes del paisaxe

Magar de xintar un pocu, metémonos nel terrén más complicáu del día, al xuntase parte de viesca con delles piedres afilaes nel picu Xenda que nos faen avanzar más despaciu, anque siempre sin perdá dalguna, pola cantidá de pintaes y señalizaciones de la ruta.


Simón ente les peñes del picu Xenda

D'equí saldremos al fin, a la cresta cimera del picu, nel qu'alcontramos ñeve abondo, y sin demasiaes dificultaes y esfrutando della, llegamos a la parte cimera del picu a 1281 ms, que sorprendentemente nun tien nella la típica cume con buzón y dalgo significativu, sinon que lu tien un pelín más allá, n'otra cume más baxa a 1275 ms.


Na cume de la Xamoca

Sinceramente, nun ye un de les cumes más prestoses nes que tuve, ya que lleguen los árboles como se pue ver na semeya, hasta'l mesmu cumal, y eso a mi, nun me presta tanto. Pero bono, pa gustos collores. Eso sí, la ñeve siempre-y da un toque especial a cualquier ruta, asína que tamién encamiéntovos a que la faigáis con ñeve.


Dos momentos de la baxada de la Xamoca ente la ñeve

Darréu, baxamos un pelín pol mesmu sitiu de xubida, y en cuanto podemos garramos una baxada hacia'l colláu Lechugeru que ta a la manzorga de la cresta. Baxada, que foi divertía pola cantidá de ñeve que tenía, y que amosábanos ya tola crestería fácil de los Picos de la Carba que dibemos facer de siguío.


El crestéu polos picos de Carba hasta'l colláu Unqueru


Una vegada que tamos nel colláu, siguimos caleyando y sín demasiáu esfuerzu ficimos una primer cima de la Carba (1122 ms) ensín nome nos mapes, y la segunda de dalgo más d'altor col nome de Les Llombes y 1138 ms, la cual abandonamos bien ceo pa baxar a la mayá Faidiellu, que darános pasu al caberu picu del día, el Picu Pedruezo de 1130 ms.


Xintando nel Picu Pedruezo


Esti picu tien una cruz n'alcordanza d'un chaval, y pon el nome de Picu Carba, cosa que nun m'estraña, porque dir de monte y facer casu a dalgún mapa y a los nomes que pon a los picos ye una cosa bien complicada y nunca sabes bien a quien o a cual facer casu. El casu ye que dempués de xintar mui tranquilamente, ya que foi una ruta bien cortina de tiempu, baxamos ensín priesa al colláu Unqueru (1014 ms), onde garramos un camín bien marcáu pa baxar de nuevu al pueblu de Campiellos.


Baxada del colláu Unqueru hacia Campiellos col Crespón al fondu

La baxada nun se fizo demasiáu llarga a pesar d'alcontrar ñeve y sobretou na parte más cercana al arroyu Güerbu, barru a mamplén e inclusu delles charcos llegando l'agua a los todiellos fácilmente. Dicir qu'hasta'l cruce hacia Rusecu ficímosla cola compaña del Grupu de Montaña Íbice Covadonga d'Uviéu los cuales yeren un bon garrapiellu y de toa triba d'edaes y sesos.

Ya en Campiellos pudimos llavar les botes nel regueru d'enantes del pueblu, onde había hasta cepillu pa frotar el barru garráu durante los 12 kms y 1020 ms de desnivel acumuláu fechos en menos de 5 hores que duró la ruta.

jueves, 14 de enero de 2010

Caldones (Xixón) - Peña los Cuatro Xueces - Picu Fariu

10 de Xineru de 2010

Track: Caldones (Xixón) - Peña los Cuatro Xueces - Picu Fariu



La mayor nevada de los caberos años n'Asturies, con tres díes siguíos ñevando a nivel de la mar, y pal domingu daben un día impresionante, había que dir a dalgún llau por coyones. Problemes? Pues moverse en coche, pol estáu de les carreteres, por tanto, lo meyor sería facer dalgo cerquina.

Asína qu'arrimámonos la parroquia xixonesa de Caldones cola intención de facer una ruta pelos sos montes xubiendo asína a la mítica Peña de los 4 Xueces, onde diz la tradición que reúníanse cuatro xueces de los 4 conceyos llindantes, como son Xixón, Villaviciosa, Siero y Sariego. Cuantayá, supongo que falaríen de temes importantes pal conceyu como sedría l'agricultura, la ganadería y los sos terrenos, pero agora me paez a mi, que los alcaldes que faen l'actu falarán de como espropiar, especular y estrozar tolo que fae d'Asturies un paraísu y ye la so tierra: playes, montes, picos,...


GM Xuan de la Borrina en Caldones


Como segundu oxetivu, teníemos xubir al Picu Fariu, ente Siero y Sariegu, y como tercer y más importante baxar a Xixón, pa xintar y ver el partíu del Sporting, jeje. Pa ello, llegamos a Caldones, y la nuesa primera intención yera xubir col coche lo másimu posible hasta onde facíase la ruta completamente circular, que yera nel cruce de Bovies, pero nun pudimos xubir, asína que lu dexamos al llau de la fonte de Garvelles.

Ellí nos mudamos de ropa, y pusimos botes, polaínes, y abrigámonos debidamente, ya que facía fríu enforma. Darréu salimos caleyando pola Cuesta'l Caracol, pa siguir pocu más arriba, pel camín de Les Cortines hasta llegar a un cruce, onde podemos xubir pol Camín la Riega l'augua o siguir pa xubir pol del Camarón, dándo ambos al Camín Rial de San Pelayo, del cual al traviés del Camín Segundu del Castañéu arribaremos nel colláu de Bovies, onde pue entamase la ruta tamién.


Baxando de Bovies que taba asína de cargáu de ñeve

Equí, dempués de llibrar 200 ms de desnivel baxaremos pel camín del Rescañu hacia l'arroyu de Riosecu, siguiéndolu en direición contraria al nuesu destín durante un kilómetru y xubir pol camín del Coriscáu pente la viesca, hasta llegar a un cruce dempués d'una cabaña a la izquierda onde tomaremos el camín de la Fonte Bernabel, que nos dexará na parte cimera del cordal, a unos 500 ms, onde ya entamaremos a caleyar con mayor facilidá, anque siempre pique p'arriba.


Facíase duro caleyar


Una vegada que tamos arriba, ya podemos esfrutar de toles vistes que nos ufrez el camín, y más aún si tenéis la posibilidá de dir neváu y con bon día como tuvimos nosotros. Eso sí, si miramos en direición al conceyu de Xixón ya qu'una viesca nos tapará de momentu'l conceyu Villaviciosa.


Yera imposible nun parar a echar semeyes sin parar . Como esta de Xixón


Javi col Fariu al fondu


El camín sigue sin mayor dificultá pasando peles zones de Les Cabañes y la Cabaña'l Marqués, onde vemos claramente el nuesu oxetivu de mayor altor, el Fariu. Pa llegar a él tenemos que siguir xubiendo cota hacia l'Altu Argañosu (584 ms) onde entamaremos a travesar una parte de monte más cerráo que nos mete nel Monte Llagón, el cual xusto dempués de travesalo, nos dará la satisfación d'acolumbrar tol oriente astur, colos Picos d'Europa rellumando pol sol, como si tuviesen a un pasu nuesu.


El Sueve bien ñeváu



Les vistes de Picos punxéronnos el pelleyu de pita

Magar de sacar bones semeyes, ya nos quedaba pasar un par de curves pa dar cola Peña los Cuatro Xueces (651 ms), onde taba a pesar de tar bien tupíu de ñeve virxen ficimos la nuesa propia reunión de xueces, pa dempués salir de la viesca y alcontranos de frente'l Picu Fariu de 733 ms coles sos antenones y repetidores.


Los Cuatro Xueces
na Peña los Cuatro Xueces


La xubida a esti, faise por camín bien marcáu, que se nos fizo abondo duro, tanto pol estáu xeláu, de la ñeve, como pol vientu qu'arreciaba nesi momentu, faciéndos pasar un cutu importante, polo que hubo que tirar de braga polar, gorru, guantes y lo que se tuviese a man, como s'agüeya nes semeyes.


Nel Picu Fariu (733 ms) baxo un friu intensu


Ensin dar munchu tiempu a les ñubes que veníen, tiramos p'abaxu cagando melodíes, que yera tarde y facía friu, y baxamos a escape tol monte de Valdornón, parando tan solo, na lleende ente Siero y Xixón, pa tomar nota de la cota y camentando que la ruta yera preciosa pa facer en BTT, como nos amosaron inclusu con semeyante ñevada, dalgún qu'otru ciclista avezáu a ello.


Baxando pel monte de Valdornón


Dicir qu'esta baxada ye muncho más direuta y nos pon ceo nel cruce de Bovies, onde tomaríemos más o menos el mesmu camín, hasta llegar a la fonte Garbelles onde dexáremos el coche fae 4 hores y media y dempués de 18 kms de ruta y 1130 ms d'ascensión acumulada siempre cola ñeve polvu, ñeve duro y xelu castigando les pates.


Despídome hasta la prósima dende'l Fariu


Nesta ruta ficimos la primer cota (Xixón y Villaviciosa), tercer (Sariegu) y cuarta (Siero) cola Peña los 4 Xueces y segunda de Xixón (Monte Valdornón), así como les primeres de Siero y Sariegu col picu Fariu
Ver progresos en: Retos montañeros

martes, 12 de enero de 2010

Puertu Marabiu (Teberga) - Cordal de Gradura

3 de Xineru de 2010

Track: Ermita Santana - Marabiu (Teberga) - Cordal de Gradura



Entamamos l'añu con una rutina pa baxar el turrón, dulces y demás fartucaes navidiegues averándonos esta vegada, a los puertos de Marabiu, pente los conceyos de Tameza y Teberga. Pa llegar a ellos pue dise dende Xixón, garrando l'autovía a Uviéu y llueu en direición a Grau, pa lo postreru garrar direición al conceyu de Tameza pola AS-311 pasando pelos pueblos moscones de Llantrales, Cubia, Tabláu, Samiguel y El Llanón hasta llegar a Villabre onde sal una ruta bien guapa pa xubir al Picu Caldoveiru, y de Villabre garramos al fin la carretera que xube a los puertos de Marabiu.


Puertos de Marabiu

Y a dicir verdá, si fuimos per esta carretera ye porque'l nuesu collaciu Diego ye d'ellí sinon, y lo que yo recomendaría, ye dir pola mítica ruta d'Uviéu, Trubia, Proaza, y direición Teberga, pal entrar al pueblu d'Entragu (onde fina la senda l'Osu), garrar una carretera que xube a los puertos, cola Pena Gradura, siempre enriba nuesa. Muncho más rápidu al mio entender, anque nestos temes siempre hai pa discutir lo que quieras y más, jeje.


En Santana con Pena Sala detrás

Asína que dempués d'un bon ratín en coche, que fízose pesáu a pesar del descansu del cafetín en Grau, arribamos a la ermita de Santana, onde parte la nuesa ruta, y dalguna qu'otra más tanto de senderismu como de BTT. Dempués de dexar el coche na oriella drecha, y facer la semeya de rigor, salimos per un camín detrás del valláu, el cual siguimos un ratín, hasta que garramos una senda n'ascensu que nos dexará nel colláu ente les penes del Cuervu y Sala a 1105 ms d'altor.


Xubiendo a Pena Sala col Caldoveiru y L'Oubiu de fondu

Como intentamos facer una ruta circular, la primer oción ye xubir primeru a Pena Sala y llueu veremos si'l Cuervu cae o non, poro garramos tola arista que xube a la nuesa mandrecha y sin dificultá facemos el nuesu primer picu, Pena Sala de 1233 ms, el cual nun ye mui ablucante dende esti llau pero la cara que mira hacia'l valle de Teberga tien unes parés cortaes dafechu.


Grupu en Pena Sala (1233 ms)

Dende equí, acolumbramos bien nidio'l siguiente oxetivu que ya la pena Gradura, la cual tien una forma semicircular perafayaiza pa les nueses intenciones. Sin más, baxamos nesa direición con curiáu ya que la baxada ye dalgo más abegosa que la xubida, y namás que tamos na pradería de Tres prau, averámonos a la Gradura pol ramal drechu de nome Pena Padiel.la (1103 ms), la cual baxamos un pelín y ya xubimos finalmente a la Pena Gradura de 1163 ms, que nos amosará unes bones vistes de Pena Sobia y del valle de Teberga.


El que vos fala en Penapadiel.la cola Gradura al fondu


Pena Sala y el Picu L'Obiu dende Pena Gradura


Equí volvemos la vista atrás, agüeyando lo que dexamos ya (Pena Sala), y lo que nos queda por facer, el Picu L'Oubiu, a la base de cual llegaremos dempués d'un par de kms, al traviés de vegues en xube baxa, casi siempre con bones vistes d'un cordal que mos dexó fae bien pocu una grata impresión, como ye'l de Caranga, y por supuestu L'Aramu detrás d'él.


Caranga rellumando per delantre de Tene y l'Aramu

Con un pelín de suerte facemos esti camín a L'Oubiu, pente dalgún orpín qu'otru, pero ensín facer que tengamos que ponenos el chubasqueru, pa finalmente entamar la xubida pola so cara suroeste que nun ye la más habitual de xubir. L'Oubiu ye una penona, con una xubida con un desnivel mui progresivu y que nun te dexa en tola xubida dar vista a la cume, poro faise pelín llarga, y con un par de desilusiones d'estes de pensar que ya se llega, y tener que xubir más, y la siguiente más de lo mesmu.


L'arcu la vieya cayendo delantre'l Caldoveiru


Con más esfuerzu del pensáu, tamién porque na travesía dende Gradura, nun m'alcontraba demasiáu finu, y quise probáme xubiendo a degüeyu, facemos cume nesti picu de 1362 ms, de los cuales 300 son d'ascensión pura dende la vega de Praundiz, na falda del picu.


Semeya de grupu nel picu L'Oubiu

No que nos fuimos reuniendo tol grupu, pegué una carrerina hasta la Pena L'Atambu (1326 ms) y a la vuelta, dempués de facer semeya de grupu, ya recoyimos tou, col envís de baxar a xintar al colláu de Caduru pente los picos del Cuervu (1176 ms) y la nuesa cota másima del día, el Picu L'Oubiu.

Dempués de baxar pola arista este, la cual si dio impresión de ser la xubida al picu más afayaiza,viendo que la xente tomábalu más bien seliquino, decidimos Simón y yo, baxar a escape, pa que mos diese tiempu a xubir al Cuervu, el cual fízose de lo más prestosu del día, con dalguna parte con caída a ambos llaos que-y dió un toque más téunicu pa finar la ruta.

Na mio opinión, de los finalmente diez kms de ruta, y 943 ms de desnivel acumuláu, podría dexáse ensín facer, l'averamientu a la pena l'Atambu, y encamiento a que xubáis a la pena'l Cuervu, pero si nun tenéis priesa como nós, baxar pola otra arista, hasta'l primer colláu pel que xubimos a la Pena Sala, dando con ello un sentíu total circular a la ruta pel cordal de Gradura.

En resumen, foi una ruta mui prestosa, ya qu'estos cordales baxos de la fastera central d'Asturies siempre tienen unes grandes vistes qu'ufrecenos, y amás aparte de servir pa escaecer les fartures de les fiestes, tamién sirvió pa qu'una pareya más s'averáse a l'actividá del Grupu Montaña Xuan de la Borrina.

Espero que s'atrevan a volver de ruta con nós.

Nesta ruta ficimos la tercer cota de Proaza (Picu L'Oubiu (1362 m))
Ver progresos en: Retos montañeros

lunes, 11 de enero de 2010

Camudando'l..... nome

Como siempre, pasín a pasu, voi camudando ciertes coses na mio vida, y una delles yera tornar el mio nome y apellíos al asturianu. Nun hai muncho más que decir, namái qu'agora ya soi Berto Xuan envede Alberto Juan, y simplemente camudé Rodríguez por Rodrigue ya que'l mio primer apellíu vien de Soria, asína que pocu se podía facer nesi aspeutu.

L'interés, o'l pocu interés que tien esta entrada ye personal, pero tamién ye p'animar a tola xente, que tea con ganes de facelo. A mi paezme dalgo perimportante pa la normalización de la nuesa llingua. Simplemente, con que t'entruguen nalgún sitiu'l to nome, tas arguyosu de dicilu y si tracamúndiase repíteslu más arguyosu inda.

Nun ye ser más o menos asturianu, simplemente ye dar visión a tola xente, de que l'asturianu ta vivu, que nun muerre, y qu'anque sea una pih.ada, equí ta ún que ta por siguir p'alantre con ello, y dar amuesa de que tien que ser dalgo normal.

Tres cuartos de lo mesmu, pásanos col nome del Grupu Montaña: Xuan de la Borrina. A la fin, ta formáu y llegalizáu, y nun veas lo que-yos cuesta estes coses a muncha xente de la capital y ciudaes. Xuan con X?? Non, si quies ye con... joer ye que nun pescancio que con que pudiera ser, jeje o tamién con Borrina, puen ponete Gorrina, como nel caxastur, Xuan de la Gorrina, jeje. La verdá que tamién ta prestósu'l nome.

A otra xente-y presta'l nome enforma. Nun conocíen a esti ser mitolóxicu de la montaña y paezvos bien orixinal el nome, y quiciás más que seamos un grupu de montaña de xente mozo, el que lu pusiera.

En fin, son cosuques, caxigalines, pero personalmente paezme un mou más de normalizar lo que tanto defendemos, como ye la llingua, pero llueu danos mieu a amosar rialmente, que tamos por ello y que somos a usala ensín vergoña a diariu pela cai, nos nuesos papeleos y en cada estaya de la nuesa vida.

Sin más, animáivos porque nun ye un cambiu de nome, ye una torna llegalizando ambos nomes, el castellán que ya teníes y l'asturianu, por tanto nun hai que dempués camudar tolos papeles que tengas fechos, eso lo vas faciendo poquín a pocu, cuando sea.

Pa ello, namás hai que:

1- Pidir la torna a la academia de la llingua, que mui amablemente te mandarán a casa dempués de falar con ellos, o simplemente por mail tamién t'atenderán rápidamente.

2- Pasase pol rexistru civil nel xulgau, onde en 5 minutos daránte la partía de ñacencia.

3- Certificáu d'empadronamientu de la casa conceyu na que vivas la cual faen (al menos en Xixón) nel momentu.

4- Tornar al xulgao y entregar los 3 papeles, y ellos mesmos te faerán la carta que presenten al xuez pa poder tornar el nome a l'asturianu.

5- Dempués d'un tiempín (15 díes), mándate a casa los papeles cola partía de ñacimientu y el permisu pa camudar el nome.

6- Con ello dir pa la comisaría onde se faiga lo del DNI y ellí facer el nuevu colos papeles que vos dieron, más les dos semeyes tipo DNI. Vamos lo típicu de renovar el dni, anque paez ser que tienen que facer nun se que tipu d'identificación que tarde un par de díes en dátelo.

Pensé que diba ser un procesu abegosu, pero l'academia mándate en 3 díes la torna, y el xulgáu nunos 15 díes mándate la carta cola autorización del xuez, col que finalmente vas a camudar el DNI y a los dos díes ya ties el DNI col to nome n'asturianu, así que merez la pena.

Eso sí, anque Xixón sea oficial toponímicamente, sigues viviendo en Gijón y ñaciendo en Gijón, sinon te pones un pocu burru, porque paez ser qu'hai xente a la que-y ufrecen la toponimía n'asturianu y a otros non, como a mí y enriba dícente que nun se pue, cuando hai xente que si la tien. Así que tar sollertes y pidilo porque tienen el deber de date esa oción.

jueves, 7 de enero de 2010

Aciera (Quirós) - Cordal de Caranga

28 d'Avientu de 2009

Track: Aciera (Quirós) - Cordal de Caranga



Dempués d'unes nevaes ivernales, que facieron complicáu xubir muncho altor, y aprovechando que teníemos unos díes de vacaciones, de llunes averámonos al conceyu quirosanu, y más en concretu al pueblu d'Aciera, de gran tradición montañera y escaladora. Nun será la cabera vegada que tornemos a esti pueblu tan guapu, con unos impresionantes horros casi a la so entrada, ya que dalgún cursín d'esguilar daremos nes infrastuctures que posee la federación de montaña ellí.

Nesti casu, queríemos facer tol cordal de Caranga, faciendo dellos picos como'l Cuetu Mar o la Forcá entre otros, y dempués de restolar pola rede, alcontré un par de tracks, xubiendo dende un llau y dende l'otru, poro, como non, lo meyor yera xuntar los dos tracks, y facer tol cordal ensín más, jeje.


Nel entamu la ruta col cordal de Caranga detrás nuesa

Pa ello, facemos el míticu camín en coche dende Xixón, que nos lleva per direición Uviéu a Trubia, Proaza, y esta vegada envede tirar pa Teberga, garramos l'otru ramal de la senda l'Osu, hacia Bárzana de Quirós, y a l'altura del banzáu de Valdemurio, la carretera tien un cruce a la manzorga que llévanos rápidamente al pueblu d'Aciera. Ellí, hai un parking casi a la so entrada, pero ye priváu, así que recomiendu qu'enantes de dexar el coche ellí ensín más, vos paséis pol bar del pueblu, y dempués de tomar un cafetín, pidáis permisu pa dexar el coche ellí demientres la ruta, ya que'l parking ye del dueñu'l bar, y ta dalgo quemáu, con caradures que dexen el coche tol finde pola cara, pa dir pal refuxu del FEMPA.


Vistes de Pena Ruea dende Aciera

Sinceramente, esta ruta non planeada pol nuesu grupu de montaña, Xuan de la Borrina, foi la que más sorpreses positives nos dió, ya que les vistes al tar nel centru d'Asturies, foron increibles, como amuesa la visión de Pena Ruea dende'l mesmu Aciera.

Salimos del parking, y siguimos caleyando pela carretara en direición al Chanu, onde ta la escuela d'escalada de la federación de montaña asturiana, ellí bien ceo garramos un senderín, que mui al nuesu pesar, vimos hacia onde nos empobinaba, una de les canales, más prestoses y dures que xubimos, y eso namás entamar. Quiciás, foi esti aniciu tan duru'l que-y pasó dalgo de factura a Carlos, que taba dalgo oxidáu de nun venir nes caberes rutes.


Vistes dende la xubida pola canal

Lo más prestosu de la canal, foi les distintes partes que tien, ya que tenemos pedreros de primeres, y más tarde pasamos per sendes bien pindies pente les víes d'esguilar de la escuela, pa finalmente (o eso creíemos) llegar a un pequeñu colláu, el cual nos amuesa a les clares, que tendríemos inda, muncho por xubir. Pa ello faese una especie de curva, pa garrar una siguiente canal, pola parte sur del cordal, y dempués d'unos cuantos pedreros más, paez que llegaremos a la fin, a la cume del cordal, pero non foi asína.


Charly trepando y los Bertos xubiendo

Con esto, podremos dicir, que más menos hasta qu'atopámonos a los 1100 ms d'altor de media del cordal, superamos como 3 partes distintes de xubida, con sus canales, pedreros, trepaduques, y siempre una bona cantidá de desnivel, unos 600 ms hasta qu'alcuéntrase ún nel techu del cordal.


Berto con tol cordal al fondu

Dende equí, a la fin, vamos dir a bon ritmu dando preste a distintes cumes, como'l Mantegu (1136 ms) y pocu más alantre'l picu Borneu de 1142 ms, pa enfilar el que yera'l nuesu destín inicial, el picu cual vértice xeodésicu tien por nome Cuetu Mar, anque nun ye así, ya que'l picu nómase La Hoya, pero como casi siempre los nomes de los vértices, son un auténticu desastre. Nesti picu de 1191 ms, les vistes son ablucantes ya que l'Aramu preséntase en toa so llongura, colos sos picos más importantes a la vista (Gamonal, Moncuevu, Barriscal, Xistres y Gamoniteiru).


Vistes del valle de Quirós y del Aramu


Notres direiciones y con día espeyáu, vese nidio'l macizu d'Ubina (Pena Ruea, Picos del Fontán, Ubina, etc..), así como'l Gurrión enriba del banzáu de Valdemurio, y más a la mandrecha, Ferreirúa de Teberga, y un sinfin de cordales, más baxos como'l de Gradura nos puertos de Marabiu, y como non, tola costa asturiana al norte.


Na cume de la Hoya (mal nomáu Cuetu Mar)

Viendo que díbemos rápidu (solo yera la 1 del mediudíi), y el tiempu nun yera demasiáu bono (vientu, nubáu), anque nos taba salvando como siempre'l nuesu Xuan Blancu, decidimos siguir lo más rápidu posible con tol cordal y xintar abaxo, na collá d'Aciera. Pa ello, quedábanos 3 picos más enantes de baxar al colláu de la Forcá.


Cuetu Mar, la Verde y Cuetu Reondu en primer términu y al fondu La Forcá

El primeru ye'l Cuetu Mar de 1173 ms, al que xúbese dende'l norte, ya que la cara sur ye una paré na qu'hai qu'escalar. Aún así a esti peñón xubí yo solu, ya qu'había que pegar una trepada y echó p'atrás a los mios collacios, los cuales tuvieron esperando xintando dalgo pa recuperar fuercies y siguir col macizu con contíen les cumes de La Verde (1180 ms) y Cuetu Reondu (1159 ms).


La Verde, Cuetu Mar y la Hoya dende'l Cuetu Reondu


Darréu de la cabera cumal fecha, quedábanos baxar al colláu de la Forcá y xubir a esi picu que ta dalgo más separáu de los demás, poro entamamos a baxar, sin muncho problema hasta que llegamos a un puntu de non torna. Ensin querer, metímonos nun marrón, con caídes en toles direiciones, poro había que tomalu con calma y pensar, la opción fácil yera trepar otra vegada a les cumes y baxar per onde xubimos, lo cual dábanos pelín de perceguera. Dicir tamién que los tracks que teníemos nun xubíen en nengún momentu a estes 3 cimes últimes, y diben de la Forcá a la Hoya direutamente al traviés de la falda, por dalgo sería, jeje.


Mirando si había baxada posible y llueu Berto y Carlos nella


Finalmente, tuvimos que facer un pasu llateral aereo enforma, y d'ellí tovía, tuve que baxar más inda, pa ver si teníemos baxada final o dábemos la vuelta, lo cual nun tuvo que pasar, ya que teníemos una destrepada dalgo escalonada con bonos agarres pa descolgase, poro siguimos alantre hasta llegar a una canal, que dexónos xustu a tiempu nel colláu de la Forcá, ya que'l tiempu ya nun mos perdonaba y taba orbayando.


Charly na cume la Forcá

Decidimos xubir casi a la carrera al picu La Forcá de 1122 ms, que nun tien nenguna dificultá, y baxamos corriendo al colláu pa entamar una baxada gayolera per una canal mui llarga pero sele, y garrar un camín de piedra que pasín a pasu foi tornándose barru puru, ya que travesábenlu lo menos 10 regatos distintos, con sus fontes.


Na collá d'Aciera, sitiu bien guapu


La baxada nun tuvo más hestoria que moyanos cola lluvia, embarranos polos caleyos, y xintar na collá d'Aciera, embaxu d'una cabaña mediu esbarrumbada, que diónos el tiempu necesariu pa recuperar fuercies dempués de lo que seríen finalmente casi 6 hores y 10 kms de ruta con un desnivel acumuláu de 960 ms de xubida y 1000 de baxada, lo que convierte esta ruta en mui pero que mui recomendable.

Nesta ruta ficimos un vértice xeódesicu de Proaza(Picu La Hoya (1191 m))
Ver progresos en: Retos montañeros