lunes, 4 de enero de 2010

Lloviu (Ribeseya) - Cordal de Cueva Negra - Nueva (Llanes)

26 d'Avientu de 2009

Track: Lloviu (Ribeseya) - Cordal de Cueva Negra - Nueva (Llanes)




El mal tiempu, o bon tiempu, según préstete más o menos, la ñeve, suel traer rutes non alcordaes al entamu de la temporada, ya que: 1- nun hai manera de llegar col coche al puntu de partida o 2- anque lleguemos al puntu d'aniciu de la ruta, nun tenemos inda la esperiencia fonda suficiente pa facer delles rutes en ñeve. Poro, siempre xurden rutes non esperaes, sacáes del bolsiellu nel caberu momentu y qu'al final dan un xuegu ablucante dafechu.

Una delles foi la travesía del cordal costeru ente Ribeseya y Llanes, que pue vese perféutamente de la que se pasa pela autovía'l Cantábricu, más menos, na llende d'estos dos guapos conceyos. Colos medios que poseemos, ye la travesía más afayaiza de facer ya qu'ente'l llugar d'entamu Lloviu (Ribeseya) y Nueva en Llanes, nun hai más de 11 kms apróx, en coche por tanto, facer los accesos per carretera nun lleva más de 10 min ente un pueblu y otru.


Semeya grupu y caleyando hacia'l Cabezu


Asína qu'echamos a andar dende Lloviu, dempués de dexar el coche pegáu a una casa embaxu d'un viaductu, nuna pista paralela a l'autovía. Dende ellí ya vemos el nuesu primer pilancu a superar, que ye salvar un bon desnivel hacia'l Cabezu (369 m) ya que tamos práuticamente al ras de la mar. La xubida faese bien dura, y nun aiden nada, les cotoyes que mui al nuesu pesar serían compangu durante tola travesía, anque l'ayalga que nos ufrez el Cabezu ye unes bones semeyes del pueblu de Ribeseya y de la ría que-y da'l nome.


Na cume'l Cabezu (369 ms)

De vuelta'l colláu pel qu'accedimos al Cabezu, ya pensamos en dar preste al siguiente picu, non ensín enantes echar un caberu vistazu a la salida de la cueva del Tenganón, pola que pasa l'arroyu de Lloviu. Dempués d'ello tiramos p'arriba pol Respaldu, que ye una cresta bien pindia, que nos aportará nel Picu Cueri de 580 ms, intermediu de la xubida al siguiente picu de mayor altor con un montonera piedres del que sal un pararayos, nomáu Picu H.orovitaya (721 ms).


Ente'l Cueri y el H.orovitaya con tol cordal por facer al fondu


Rolo nuna semeya bien guapa de la rasa costera de Llanes

Esti picu, danos paso rápidamente y sin esfuerzu dalgún a lo que sería la cota más alta de la travesía, l'Altu la Teyadera de 747 ms, qu'a pesar de finar l'ascensión no que se refier a altitú, nun quiso decir que fuera dexar d'ascender la dificultá nel andar. Por mor d'esto, quiero dicir que'l caleyar hasta equí, nun taba esentu de dificultá poles piedres calices afiláes y la vexetación típica de cordales costeros (Cuera sobretou), pero a partir d'equí, si fuera posible más, entramos nuna fastera de mayor xube y baxa, nomada como los Cuetos Medios (rollu Señor de los Anillos) nel que les cotoyes nos ficieron un bon trabayu nes partes baxes de los pantalones y pates, como non.


Posando nuna pequeña vega nos Cuetos Medios

Nel intre, llegamos al vértice xeodésicu del cordal, el Picu Bacia (564 ms) que tien una guapa caída sol ríu Guadamía y el polígono industrial que lleva'l so nome. Equí facemos una paradina pa sacar semeya típica, anque nun seya'l sitiu más afayadizu pola caída, y paramos un ratín p'acolumbrar lo más prestoso de tola ruta, que ye la rasa llanisca, d'acantilaos y playes de continuu, si miramos pa la mar, y si les ñubes nos lo permitieran, ver el Cuera y detrás d'él, tol macizu del Cornión mirando pal monte, pero... esi Cuera con ñubes p'aburrir, tapeciéndolo too.


Nel vértice del Picu Bacia (564 ms)

Nesti puntu, facíamos más menos, la metá del camín, casi 6 km d'andar abegosu pente les piedres afilaes y les cotoyes pinchando siempre que podíen, y quedábanos inda, más por sofrir, como foi la baxada a un colláu, que como bien díxonos un pastor: "Taba malu'l pasu". Y asína foi, pero coles pates palpitando poles esgatuñaes de les cotoyes llegamos a dellos altos conocíos como Las Tejucas, qu'al traviés de varies cimes, arribábanos notra cume señalada, esta vegada con una cruz: el Picu Sorrolles de 555 ms, que diba danos pasu dempués d'otru baxar, al caberu picu de la xornada como yera'l Picu El Gurugú (515 ms).


Nel Picu Sorrolles y yendo pal Gurugú

Esti picu foi un de los momentos más divertíos del día, ya que dempués d'una traya fina y la bregada de pates que llevábenos, peleanos un ratín con una bandera foriata, foi de lo meyor del día pa escaecer el cansanciu, jeje.


Cola bandera asturiana del Gurugú ente rises


Equí ya nos quedaba tornar al colláu del mediu del Sorrolles y Gurugú, pa metenos de lleno, per sendes nes faldes de monte más baxo, como l'altu'l Mediudíi, les Cabres o Rinueva, pa garrar la metá del grupu un camín más marcáu qu'a la fín, llevárenos a Nueva.


Semeya del cordal sofríu a lo lloñe ya

Y digo la metá, porque tovia diónos la tollura a Simón y a mi de xubir a un piquín, nel que "tenía que vese dalgo", nomáu'l Picu Maor, y dafechu víase vien guapu debaxo nuesa'l pueblu de Nueva nel conceyu de Llanes, y onde dempués de baxar al camín qu'empobinábanos al coche, pudimos al fin dar final a una travesía espeutacular.


Semeya nel Picu Maor con Nueva embaxo


Como resumen dicir, que les vistes tanto costeres como montañeres, faen que pague la pena vagar durante poco más de 7 hores y 12 kms de crestéo, pol cordal de Cueva Negra, salvando un desnivel acumuláu de 1127 ms, xubiendo a un total de 9 cimes y frayando les canilles a rabuñaes de les cotoyes. Pero aún así, foi una mui bona ruta, y que nun fae casi naide, polo tanto, dende equí recomendada queda.

Nesta ruta ficimos la cuarta cota de Ribeseya (Altu la Teyadera (747 m)) y un vértice xeódesicu de Ribeseya (Picu Bacia (564 m))
Ver progresos en: Retos montañeros

5 comentarios:

  1. LA TRAVESIA DE LES COTOYES O DE LES COYONES, PORQUE ASI ACABAS, HASTA ELLOS.
    HAY QUE MANTENER EL CAMINO PARA PODER DISFRUTARLA.
    PREPARA LOS CRAMPONES.

    ResponderEliminar
  2. La verdá ye que foi duro abondo, hai dalguna semeya que toi pola cintura de cotoyes, jeje. Vaya pinchazos.

    Los crampones ya tan al caer, jeje. Tengo qu'afilalos o que?? jaja

    ResponderEliminar
  3. Entamó la 2ª edición de "Vota'l meyor blogue". Prestaríanos que participares, pa ello, encamentámoste echa-y una güeyadina a les bases na web www.votalmeyorblogue.webcindario.com

    ResponderEliminar
  4. FERNADO PARA MANTENER LOS CAMINOS PRIMERO TIENEN QUE EXISTIR.
    HABIA COTOYES PERO EN XENERAL PODÍA ANDASE BIEN. EL PERSONAL YE MUY EXAGERAO. POR RASPASE UN POCO LES PIERNES NUN PASA NADA. PAREZ QUE ALGUNO FUERA A PONER FALDA.
    LOS CRAMPONES PAL BERTO, QUE NO ME VEO YO FACIENDO TOVÍA RUTES CON CRAMPONES.

    LO MEYOR DE QUE LA RUTA TIEN UNES VISTES GUAPISIMES.
    LO PEOR QUE TIEN YE QUE TOL CAMIN YE MUY PARECIDO Y REPETITIVO.
    HOME Y NO YE UN PASEO QUE LLEVONOS MAS DE 7 HORES Y FUIMOS BASTANTE ALEGRES

    ResponderEliminar
  5. el picu caberu ye recomendable facelu (por les vistes de Nueva)

    ResponderEliminar