Magar de l'aforfugu montañeru de los últimos meses, el mió cuerpu pidió un descansu y con un estáu de forma importante, anque siguiendo coles molesties nel xemelu, abelluguéme una vegada más na escalada deportiva como deporte principal de les miós actividaes.
Ún de los munchísimos díes nos qu'anduve trepando en delles zones, pasaríame pela Forcada en Parres, dempués de dos años ensin catar la so roca. Esta vegada cola compañía de Pepa y Jose, Andrea y Lara y con Suco de compañeru de cordada, tuviéramos dándo-y unos peguinos a delles víes del seutor del Callejón.
Probando delles víes nel Callejón
Les intenciones yeren de llimpiar el seutor, contando con varies víes a la manzorga ya encadenaes, pero metímonos nun par de sestos baxos a la mandrecha y el toque alpín de la escalada, lo sucio y el nivel de cansanciu que manexábemos fizo qu'encadenásemos lo que nos dexaron les nueses fuercies más que lo que teníemos en mente.
Dicir que los sextinos de la mandrecha, tan sucios y mui pocu escalaos, asína que güeyu y muncha cabeza a la hora d'afrontalos y metese nellos, teniendo que dir más bien sobraos de grau, sinon queremos tener dalgún sustín curiosu o mancase direutamente, por mor de los alloñes y dalgún cantu sueltu.
La cordada de collacies apretando enforma
Llueu metímonos a un 6b+ y un 6c que resultaron apretones y perretes, anque como decimos, el nivel de cansanciu yera perimportante y ficiéronseme más duros de lo que realmente pudieran ser, al menos falando del 6c... el 6b+ yera perrete sí o sí, jaja.
Con ganes d'enchufalos, tuviemos que colar, ya que les previsiones más menos acertaron y púnxose a orbayar dexándonos coles ganes d'al menos llevar nel bolsiellu toles víes que tuviemos tiempu a probar, pero tendrá de ser pa la temporada siguiente ya que cierra por añeramientu hasta'l branu.
La Forcada
Croquis modificaos por mi de la escuela d'escalada de la Forcada, por mor de Piratas Free y Entretenimiento Vertical. Gracies y col so permisu.
Croquis modificaos por mi de la escuela d'escalada de la Forcada, por mor de Piratas Free y Entretenimiento Vertical. Gracies y col so permisu.
-----------------------------------------------------------------------
8 Setiembre, 31 Avientu de 2015 y 23 Xineru de 2016
Dellos díes, averámonos hasta'l conceyu de Parres, bien cerquino de la so capital, Les Arriondes, onde la escuela de la Forcada allúgase a la manzorga de la carretera que xube hacia'l Mirador del Fitu y más en concretu al altor de Santitomás.
Ya tuviéramos en Marzu per equí y les vistes y el bon pié de vía del seutor el Cercáu dexónos con bon tastu asína que repetimos el día d'Asturies (8 Setiembre), faciendo unes cuantes víes Haritz, Pau y yo, enantes de dir esi día hasta una guapa sablera en Ribeseya pa completar un gran día.
Haritz y Pau dándo-y al V del Cercáu
A los bonos pegues d'Haritz y Pau, yo tuve faciendo Furacos Profundos, un 6b, con grandes agarres pero que sinon somos a esguilar rápidu, podemos petar por mor del desplome. Nun salió a vista, pero faltó poco y al siguiente pegue ya sin problemes aporté hasta la reunión.
Furacos Profundos (6b) bien prestosu
Munchos meses dempués, n'otru día de folixa nel calendariu, el día de Nuechevieya aportamos a les soleyeres paredes de la Forcada, Alberto y yo y como somos más d'investigar pues decidimos xubir hasta'l seutor Callejón, unos cuantos metros desnivel penriba del Cercáu y en plena canal.
Esguilando y conociendo'l Callejón
Nesti guapu seutor, alcontraremos otru bon pié de vía y un paré con víes verticales y de ñapeo mayormente. Alberto llévase una bona fostia mental cola que paecía una vía cenciella de 6a, Rumpestichen, pero ye lo que tien esguilar de xemes en cuando, que piérdese'l procesu mental positivu de la escalada y duldamos en tolos pasos.
Por mi parte, saqué Rumpelstichen a vista, al igual que Atmósfera cero (6a+) y la Senda del Cartero (6b), toes elles mui prestosines con entraes a vía más dures quiciás que'l restu de la vía, lo cual llévate tensu casi tol percorríu pel paré.
Na cadena de la Senda del Cartero (6b)
Nun ye que fuera mui complexa (6a), pero'l toque alpino del percorríu, la necesidá de comprobar cada agarre y el componente aéreo al notar el vacíu a la manzorga l'espolon, da-y un xeitu esixente a esta vía que repetiré la próxima vegada pa facer la so variante pelín más dura, anque más por entrenamientu mental que más porque me presten este tipu de víes.
Otru día nel Cercáu con Zori y Richar
Metíos nel 2016 y con munches ganes d'esguilar, como cuntaba na entrada a la Peñe Pagadín aportamos a la Forcada col paré a mediu secar, pero con posibilidaes de trepar, poro ponémonos a ello sacando Richar a vista el V de la mandrecha.
Zori tamién intenta xubir en polea pero esa entrada bloquera a vía, fai que tea pegándose con ella durante un bon ratu, anque lo verdaderamente importante ye que deprendiera a asegurar, a encordase y manexar tol material que mercaron.
Les vistes d'alloriar como siempre... La Peñasanta d'Asturies y La Torre Cerredu
Alberto va pegase col 6a d'al llau, Pequeños Dolores, nesti casu de tiesta ya que tornamos a ver como la mente ye'l músculu más importante na escalada, ya que n'una vía na que nun tendría de tener problema, tuve que dir pillándolu de seguru a seguru, por mor d'inseguridaes en pasos aisllaos.
Finalmente, yo metíme en Piraña, un 6b+ apretón que nun salió a vista por un pelín, ya qu'equivoqueme con un pié a la hora de salir del pasu clave. Aún así, al siguiente pegue salió sin problemes y namái baxar di-y un tientu al 7a+ que me quedaría por facer nesti seutor.
Tan sólo fue tastialu... pero dexóme con ciertu picorín... habrá que remedialu.
Ye lo que tien l'iviernu.... qu'acabes de nueche
-----------------------------------------------------------------------
29 Marzu de 2015
Dempués de la visitina a la casi esaniciada escuela de la Morca, vamos pal auténticu oxetivu a conocer, la escuela de la Forcada, bien cerquino de la capital parraguesa: Les Arriondes. Xubiremos entos, pela carretera que va'l Fitu y a l'altor de Santitomás, onde hai una ermita, salimos a la mandrecha hacia'l pueblu del Colláu pa siguir entós hasta Cotaraxu, dexando'l coche onde bien podamos ya que nun hai sitiu de más.
Caleyamos dende'l pueblu del Cotaraxu hacia'l seutor El Cercáu
De Cotaraxu, siguimos hacia unos praos que tienen de llevanos hasta'l seutor del Cercáu nel cual camentamos pasar la mañana. Tamos Alberto, Charly, Haritz y yo, pero Charly vien a pasar el ratu ya que ta con dellos dolores nun calcañu y nun se vé pa poner los gatos.
Perbones vistes hacia Picos, Pierzu, Cetín, Tiatordos, Llambria...
Nun pondrá los gatos, pero si qu'esfrutará de les vistes hacia los macizos del Cornión y Urrieles, al igual qu'a montes de Reres como'l Tiatordos, Pica Cetín, Llambria o Pierzu... perguapu llugar esti de la Forcada.
Probando toos el quintu del Cercáu
Pente pitos y flautes... too son gaites, asína que nun tamos mui pol llabor de les prieses, poro magar de ver el pie de vía estupendu que tenemos, ponémonos a facer la vía más cenciella del seutor... un V con ciertu toque alpinu de movese a d'ambos llaos p'algamar la cadena.
Alberto y Haritz en polea nel 6a (Pequeños Dolores)
Encadenámosla a vista Alberto y yo y Haritz tampoco tien mayores problemes en polea. D'esti xeitu, pasaremos a la siguiente, un 6a nomáu como Pequeños Dolores, mui disfrutón tamién, que torno a facer a vista y Alberto y Haritz apretan como unos gallos p'aportar al descuelgue.
Y pa finar y recoyer el montaxe de reunión, fice con vidiu un 6a+ de nome, Mala Reputación, que nun podía dir d'otra manera que con música del gran grupu de rock ribeseyanu de nome homónimu... la canción fala de dir a esparcer pel monte... que meyor qu'esguilando tamién.
No hay comentarios:
Publicar un comentario