Soto (Sobrescobiu) - Senda L'Alba - Valsemana - L.lomba Yana - Aberrugues - Fierros - Vallina'l Riu'l Cabritu - Cruz de los Ríos

 20 de Febreru de 2022

Track: Soto (Sobrescobiu) - L'Alba - L.lomba Yana - Aberrugues - Riu'l Cabritu - Cruz de los Ríos 

Dende'l finde d'Aniversariu del GM Xuan de la Borrina, allá pola seronda, na qu'ascendiéramos al Cullargayos, ya tenía preparada una ruta que llevásenos a conocer dellos requexos del Monte Llaímu, quiciábes, ún de los llugares más intrincaos y sorprendentes del maraviyosu parque de Reres.

El mayor problema de querer conocer estos requexos xabaces del monte Llaímu, son los 14 km (ida y vuelta) de la Senda L'Alba que tendremos de facer, poro nun tendremos otra, qu'intentar madrugar ya que nesta dómina del añu, a les 7 la tarde ye de nueche.

Partimos del pueblu coyano de Soto (445 m)

D'esti xeitu, llantámonos a les 8 la mañana nel Balcón de Redes, con ganes d'almorzar en condiciones y pillar unos pinchinos pal camín, alcontrándonos col chigre pieslláu hasta les 9. Dempués de dar varies vueltes (Rusecu y Soto), tornamos a les 8 y media alcontrándolu abiertu, pudiendo almorzar a fueu pa tornar a Soto y entamar la ruta cuanto antes.

Facemos tol camín d'Agüeri hasta la Vega

A les 9 y cuartu, con más de media hora de retrasu sol plan d'aniciu, damos los primeros pasos pel camín d'Agüeria, más conocíu como la Senda L'Alba, pela que caleyaremos a bon ritmu, esfrutando d'esta ruta, en temporaes masificada, en plena soledá, con unos niveles d'agua por mor de la ñeve cayía'l día anterior, que facíen aumentar la so belleza más si cabe.

Continuamos la Ruta L'Alba pel Camín de Llaímu

Ente tabayanes continos y col fondu músical del rigu L'Alba, aportamos a la Vega, onde entraremos nel Camín de Llaímu, parte final de la mítica ruta, que dalgunos del grupu nun tuvieren la oportunidá de conocer, ya que siempre desviámonos hacia los montes de la redolada, como pudiera ser el Corbellusu, Cugullu, Guanalón y xerra'l Crespón.

Pasos finales hasta la Cruz de los Ríos onde metémonos nel Monte Llaímu

Asina que con 7 kms y una 1h y 45 min de ruta al llombu, entamamos lo que realmente queremos conocer, adentrándonos nel Monte Llaímu pelos Yanos de la Llonga, siempre dexando a la mandrecha la riega L'Alba. El senderu, bien marcáu, travesará una preciosa viesca, na que vamos alloriando colo guapo del llugar, hasta entrar na focexa Costantina, onde'l tramu faise más pindio, ensin perder una migayina de belleza.

Ascendemos pela Focexa Costantina siempre pela manzorga de la riega L'Alba

A bon ritmu, más de lo normal en nós, continuamos ascendiendo hasta aportar al mayéu Carrizal, baxo los parés de la peña La Verdasca. Saldremos de les ruines d'esti mayéu, pa pisar les primeres ñeves del día, intentando llibrar de moyar los pies, pa separanos de la llínea de parés con una envuelta hacia'l mayéu de Valsemana.

Pasamos pelos mayeos del Carrizal y Valsemana hacia'l colláu La Felguera

El día sigue murniu, pero'l bon camín hasta'l momentu, fai que seya too rises, bon ambiente y un ritmu d'andar perafayaizu pa lo que tendríemos per delantre. Nel intre, dubiamos si xubir pelos Xendones a la Vega la Forá diréutamente o dai la vuelta a los xerros del Penón de la Carba, pa siguir hacia'l colláu La Felguera y conocer la Furacá de primer mano.

Prestosu senderu hasta'l colláu La Felguera

A la fín, decidímonos por esta segunda opción, saliendo pela Güeya Valsemana, esfrutando d'un senderín colgáu, penriba d'una pindia viesca que baxa hacia'l valle del ríu L'Argayu, qu'aportaría al colláu La Valencia, onde tendríemos ascensión al picu Retriñón y como non, quedamos con ganes de conocer este otru valle pa otra vegada.

 

Conocemos la Furacá pa siguir ascendiendo al Penón de la Carba (1488 m)

Llueu d'un descansín nel colláu La Felguera, onde comparamos les diferencies pente l'accesu dende Sobrescobiu (3 hores) y l'accesu rodáu dende'l conceyu d'Ayer, entamamos ascensu hacia La Furacá, un ventanu na peña que visitamos con calma, enantes de continuar camín, Mario y yo, hasta'l Penón de la Carba (1488 m), primer cota del día, qu'agasayábanos con una trepadina per tarrén fríu y pindiu por mor de la ñeve.

Continuamos hacia La L.lomba Yana (o Picu Forá)

Demientres el restu'l grupu (Charly, Mario y María) continuáben de la Vega la Forá hacia'l Picu Forá o Llomba Yana, descendíemos y emprendíemos la penosa ascensión a esta Llomba, Yana, pindia, ñevada y húmeda que fizo les delicies de los nuesos playerinos de correr pel monte. Lo dicho, nun esperábemos ñeve a estes cotes y los miós pies sofrieron lo suyo, pingando y xelaos nos 1637 m d'esti monte, qu'ufrez unes vistes a tol valle d'Ayer dafechu imprescindibles.

 

GM Xuan de la Borrina na L.lomba Yana (1637 m)

A estos altores, les dos de la tarde, el día termina por abrir y continuaremos crestéu, pente pequeñes cotoyes y brezu hacia'l siguiente finxu del día: el Picu Les Aberrugues. Esti tramu, fadrémoslu esfrutando del solín y escaeciendo un pelín la ñeve paposa de la L.lomba Yana, que tanto fríu fízonos pasar nos pies, trazando camín per tola crestería, siempre pela fastera ayerana.

Cenciella crestería hacia'l Picu Les Aberrugues

Con vistes hacia tolos montes ñevaos ayeranos dende'l Torres, tola cuerda L'Eyu col Fuentes y Tonéu , hasta los más cercanos de la Xerra de Fuentes d'Inviernu, vamos dir pali, pali averándonos al cumal del Picu Les Aberrugues, onde esta vegada sí, tocaba sentase a xintar nos 1610 m d'altor y relaxanos de les casi 5 hores y media que llevábemos nes pates.

Cume nel Picu Aberrugues (1610 m) últimu fitu del día

Pasaes les dos y media de la tarde, entamamos a crestiar del picu Les Aberrugues hacia'l colláu Fierros, alcontrándonos les primeres dificultaes téuniques de la ruta, que nun son otres, qu'unos destrepes a tarrén malo, pindiu y ñeváu de yerba tumbao so la fastera coyana. Llibraremos con munchu curiáu y agarrándonos a tolo que topamos esti pasu y tornaremos a la propia crestería más seca, onde atopamos una vira de salida hacia la fastera ayerana, dempués de pasar xustu penriba d'una grandes llábanes.

Salimos de la crestería de les Aberrugues hacia fastera ayerana

La verdá ye que nun taba la cosa pa facer tonteríes, asina que fuimos finos y aseguramos la salida en cuanto pudimos hacia tarrén seco, ya que pela fastera norte hacia'l monte Llaímu, más vale nun arimase nestes condiciones. Cola tranquilidá de dir per tarrén menos resbariosu, atopamos senderín que va llevanos hacia'l final de la crestería pasando pelos collaos Mariellos, enantes de descender finalmente hasta la collada Fierros.

Crestiamos per tarrén cómodu hasta'l colláu Fierros

Nos 1440 m d'esta collada y con 7 hores de ruta nes pates, entamaría una aventura, que sinon fuera pola posible falta de lluz, hubiéramos esfrutáu como neños, anque entono'l mea culpa, por nun informame un pelín más de la posible baxada. Na propia, collada garraremos un "enorme" senderu maraviyosu, que nos dexa con facilidá nes Fuentiques, xusto onde termínase tolo enorme del senderu jaja.

Descensu a pinchu pela riega'l Cabritu siempre per tarrén pindiu

De les Fuentiques nun vemos más opción que baxar en delles envueltes pindies, pela propia riega, hasta salir a la mandrecha'l calce, nun tramu de viesca con playes de yerba pindia, peles que por suerti, podemos baxar con cierta facilidá, hasta aportar de nuevu al riu'l Cabritu, pasándonos esta vegada a la manzorga del calce.

Descensu siguiendo dellos trazos de senda pente escobones hasta'l primer tabayón

Equí tendremos un tramu, nel que diremos per una traza de senderu per un fayéu pa pasar a monte baxo con urcies (escobones) pel que vamos navegando tolo fino que podemos. Les hores van pasando y nun podemos tener munchos fallos, asina que siguimos pente les urcies hasta siguir traza que devuélvenos al cursu'l rigu'l Cabritu, al altor de los que nómase como Foces Altes del Cabritu.

 

Nel intre, siguiremos el cursu'l rigu, sin mayores problemes, hasta que topámonos con un primer saltu, que fainos dubiar si vamos bien, lo que fainos perder 20 minutos preciosos, xubiendo y baxando una vallina pa llibrar el saltu, teniendo finalmente, que destrepar pela manzorga del tabayón y cruciando'l rigu pa destrepar como podemos pela mandrecha con un pasín pelín funambulista en travesía pa nun cayer nuna poza.

Últimu ya imponente tabayón que sería'l final de los nuesos problemes

Dempués d'esti primer tabayón, que dexo marcáu nel track, tendremos un ratín de tranquilidá, falta de menos d'una hora de lluz y cuando paez que vamos saliendo a la foz baxa del Cabritu, alcontrámonos con un saltu d'unos diez metros, qu'a estos altores del día o llibramos o tócanos durmir nel monte, porque nun díbemos tener tiempu a xubir y baxar vallines a la gueta d'una salida.

La verdá ye qu'impresiona dende riba, pero bono, hai qu'intentalo asina que destrepo agarrándome a unes yerbes y dalgo de brezo y atopo una repisina en mediu del tabayón que nun se veía. Mando a la xente dir baxando alloriando col matu nel que tamos metíos y alcuéntrome con una llambría moyada, qu'hai que superar en travesía col sofitu d'unes maraviyoses y fuertes rames de brezu, qu'usamos pa poder destrepar hasta'l final del tabayón.

Paseín final hacia La Cruz de los Ríos pasando de nuevu pelos Yanos de la Llonga

Dende equí, miramos pal tabayón final, ablucando pol sitiu pel que baxamos y entamamos un tramu de felicidá montuna, penmediu d'una viesca xabaz, alcordándonos de lo xabaz de la vallina'l Ríu Cabritu, qu'ufreciónos un descensu d'aventura total y dalgo de nervios por mor de la poca lluz del día que quedábanos pa salir de la vallina a tarrén más amigable.

 

 Con pocu más, pasaremos pel corripu de madreñeros y axuntarémonos nel final del nuesu camín al ríu Penoba, p'aportar a los Yanos de la Llonga y dar colos nuesos cansaos cuerpos na Cruz de los Ríos a les 7: 10 de la nueche, na llende dafechu, pa nun tener un percance montañeru y/o asustar a les nueses families.

Dende la Cruz,  teníemos otros 7 km de camín con frontal hasta Soto, completando los 25,5 km finales de percorríu increyible de monte, faciendo un desnivel de +/-1475 m nun total de 11 hores y cuartu. Quiero amosar el mió agradecimientu a Victor de Pindio, Pindio por dame información a posteriori de nomes, llugares y posibles futuribles rutes, nesti entornu del Monte Llaímu, que namoróme como poques vegaes.

Camudando'l Camín pel Monte Llaímu