Veigadhorru (Cangas del Narcea) - La Folgueirosa - La Ubia - La Viña

13 de Marzu de 2022

Track: Veigadhorru (Cangas del Narcea) - La Folgueirosa - La Ubia - La Viña

Continuamos intentando conocer Asturies fondamente y aprovechando los llistaos que ficimos, dámonos cuenta, que la fastera suroccidental ye'l gran nuesu desconocíu, poro, restolamos que monte pudiera ser el siguiente y descubrimos que nel nuesu llistáu de Montes Cimeros d'Asturies, el Chanu La Ubia en Cangas del Narcea, tenémoslo pendiente.

D'esti xeitu, magar d'un cafetín na capital, siguiremos camín pela As-29 hacia'l conceyu vecín d'Ibias, parándonos nel pueblu de Veigadhorru, llugar onde ya tuviéramos va dellos años, p'ascender al monte xemelu al Chanu La Ubia, el Picu Tunón.

Salimos del pueblu cangués de la Veigadhorru (675 m)

Entamamos camín carretera alantre, en direición Ibias, faciendo una primer intentona, per una pista que, según los mapes, diba dexanos a metá de la faza oriental del monte. Pero, ésta como bien comunicónos un ganaderu, taba dafechu tomada y namái que caltiénense les pistes de la Folgueirosa y la Viña pa esti llau del valle, poro caleyaremos carretera alantre hasta l'amestaura de los ríos del Coutu y la Braña, onde sal la pista hacia la Folgueirosa.

Entamamos a ascender hacia la braña de la Folgueirosa

La pista dirá llevándonos nun continuu ascender, al llau de la riega la Braña, delles vegaes munchos metros penriba y otres al empar, abriéndose pali pali, les vistes hacia dellos valles que terminen nas Penas Altas, cordalín que fina nel Picu Tunón, monte que visitáremos al traviés d'esta mesma pista.

Facemos camín dende la braña La Pasada hasta la Folgueirosa

Pasaremos pela braña la Pasada, pa dellos metros dempués entamar a pisar ñeve, lo que pesie al día soleyeru, fai incrementar una sensación de cutu que llevamos teniendo dende l'entamu de la ruta. La idega de traer playeros de trail, camentando que tendríemos menos ñeve, va amosándose como un erru y pa cuando aportamos a la Folgueirosa y veo la pala d'ascensión al Chanu La Ubia, confírmase la cagada pela mió parte.

Ascendemos de la Folgueirosa hacia'l Chanu La Ubia

Magar d'echar un vistacín a la Folgueirosa, ascendemos hasta la veiga superior onde a tenemos una amplia vista de la fastera norte de Cangas del Narcea y del conceyu d'Ayande y garramos una rodada n'ascensu que déxanos nuna pista que faldea La Ubia pa descender hacia la Veiga La Braña, sirviéndonos hasta una marcada envuelta, onde garraremos una vallina que llévanos hacia'l Chanu La Ubia.

Salimos de la ñeve pa bregar cola beriza hasta los 1424 m de La Ubia

La verdá ye que vamos acertando de plenu, ascendiendo pela parte más llimpia de la vallina, alcontrándonos, pesie a la ñeve, con traces de senderu n'envueltes que percorriendo una llera de cuarcita, fadrános aportar al Chanu La Ubia, onde ya toca bregar cola beriza hasta los 1424 m de la Ubia.

Nel cumal de la Ubia (1424 m) col cielu empuercáu pal cordal cantábricu

Encantaríanos ser capaz d'acolumbrar toles cotes de la redolada, pero'l nuesu desconocimientu del suroccidente, fainos duldar incluso coles que paecen más evidentes, asína que, xintamos apriesa'l pinchu y decidimos colar, ya que'l vientu fríu y la moyadura nos pantalones y pies, fai encomendable entainar a baxar.

Descendemos per senderu pelín tomáu hasta la Veiga la Braña

Cola pingadura que gastamos, albidramos un descensu penosu y fríu, pero sacante d'un primer tramu más abegosu nel que lluchamos cola beriza, a partir del hombru NE de la Ubia, atopamos un senderín, pel que descendemos tola arista NE con cierta facilidá hasta empatar cola pista que venía de la Folgueirosa, dexándonos cómodamente na Veiga la Braña.

Ablucante la Braña La Viña onde pasamos un bon ratu sacando semeyes

Dicir que nun teníemos referencia nin d'esti monte, nin d'esta ruta, sacante l'ascensu a la Folgueirosa, poro'l restu'l camín fue trazáu penriba'l mapa y tamos más que contentos, cuando aportamos a la Veiga La Braña, onde aparte de topanos dellos caballos, vamos acolumbrar la prestosa Braña La Viña, a la que baxamos pa esfrutar de bien de cabañes remocicaes y unos horros con teyáu de llosa pizarrera que ye una verdadera delicia.

Baxamos de la Braña La Viña a la Viña

Llueu d'esfrutar d'esta ayalga etnográfica que ye la Braña la Viña, garraremos una amplia y cómoda pista que déxanos nel pueblu de La Viña, que percorremos con calma, atopando otra collecha d'horros y molinos a la vera la riega Yacéu, que faen imprescindible una visita y quiciás una inversión pa que seya un referente nel conceyu de Cangas del Narcea.

Siguiemos per carretera de nuevu hasta la Veigadhorru pa finar la ruta

Saldríemos del pueblu de la Viña con un tastu perdulce d'esta ruta, ya qu'ensin referencies anteriores trazamos un paséu bien guapu y tanto la Braña La Viña, como'l propiu pueblu, yera la guinda pa metenos más ganes de siguir descubriendo'l suroccidente astur.

Un par de kilómetros de carretera más hasta la Veigadhorru, completaríen los 15.5 km final del percorríu, que si amestamos a los +/- 965 m de desnivel positivu, ya dan cierta importancia a esti patéu, siendo en casi tola ruta de fácil caleyar, como amuesen les 5 hores y cuartu de duración.

Ta la prósima...