Track: Molín de Salce (Cangas del Narcea ) - Picu Tunón - Monesteriu (Cangas del Narcea)
Nueva temporada de monte ya intentaremos entamar pa la fastera suroccidental, onde asítiense Rebe y Pangua. Van ser pas, complicándose'l tema pa dir de monte, hasta dientru d'una bona temporada jeje. Poro, vamos facer una ruta de Pangua que teníemos escaecida dende la temporada pasada: El picu Tunón.
Pa ello, saldremos dende Xixón, pel camín davezu hacia Cangas del Narcea, ye dicir autovía Y griega, pa siguir pela de La Espina, hasta'l final nes cercaníes de Curniana. Llueu siguiremos pela As-15 hasta Cangas del Narcea, pa parar pocu más alantre a tomar un cafetín na panadería del pueblu de Pinl.lés.
Partimos de Salce (570 m) pente Veigadorriu y Monesteriu
Magar de les llambionaes y pinchos varios, conducimos en direición al puertu del Pozu de las Muchieres Muertas, pasando pelos pueblos de La Riela, Yema, Veiga, Tremáu del Coutu, Auguera, Veigadhorru y Monesteriu onde dexaremos dellos coches pa llueu tornar hacia Cangas y parar al llau del Molín de Salce, nel crucie al pueblu de Combu onde entamaremos la ruta.
Pocu o nada, conocemos d'esta fastera asturiana, pasando tan sólu per esta carretera pa la ruta que ficiéramos al Dolmen de Seroiro,cola ascensión al Pico da Golada. Cuéstanos enforma apaecer pal occidente y por embargu, siempre colamos encantaos por mor, de camudar la erma caliza por tarrenes onde l'agua ñaz per cualesquier requexu del monte.
Xubimos pel valle la Braña esfrutando de les construiciones de los cortinos
El primer exemplu d'ello, tendrémoslo en plenu mes de Setiembre, entamando la ruta per un guapu camín paralelu al valle de la Braña pel que pali pali, toparémonos con más y más riegues y fontes que traviesen esta guapa pista, que fainos imaxinar que tan bona sería pa percorrela en BTT.
Pasaremos per llugares como El Piornu, Penahedrada o la Cruz onde mécense la riega la Braña col regueru la Val.lina, pa más alantre alcontrar otra riega más, la de Pedreiras hasta topanos cola primer braña del día la de La Pasá con dalgunes cabañes en meyor estáu qu'otres.
Xubimos altor dende la braña La Pasá hasta la Folgueirosa
De la Pasá, tendremos ya un ascensu más direutu faciendo delles envueltes hacia la siguiente braña: la de la Folgueirosa. D'esta guapa braña, mayor que l'anterior, ascenderemos a la col.lada la Folgueirosa (1118 m) onde tendremos guapes vistes hacia'l norte, destacando dellos cordales como'l de Carzanosa o el Panl.lón más atrás.
Darréu, dexaremos atrás Folgueirosa p'ascender hacia Penas Xuntas, siempre per bon senderu anque ya vamos dándonos cuenta lo que va esperanos más alantre: piornos y cotolles a mamplén. Pasaremos pembaxo de Penas Xuntas hasta que dimponémonos a ascender Penas Altas.
Xubida a Penas Altas (1147 m) con vistes hacia Muniel.los
Demientres xubiéramos unos pocos a Penas Altas, los demás prefierieron dar la vuelta pel L.lanu Pedrairas, un guapu colláu al que más tarde tendríemos de tornar. Ellos bordiaron Penas Altas pol sur, alcontrándonos más alantre nel tramu final hacia'l Picu Tunón.
Toos xuntos, diremos restolando'l meyor senderu, el más abiertu nun monte tomáu polos piornos, con un toque picante de la cotolla y y dalgún islla pente la boriza que nun ye otra cosa qu'una l.lera na que cuesta más menos avanzar.
Lluchando pente los piornos, cotolles, l.leres... un placer
El casu ye que dempués de casi 4 hores de ruta tranquila, aportamos a los 1447 m del Picu Tunón y si en cualesquier fastera d'Asturies pudiera dicir que montes tan na redolada, l'occidente nun ye'l mió tarrén y cuéstame enforma asitiame.
Daivos cuenta, que nesti puntu tamos mui cerquina de Llugo, tan sólo'l Valledor ta penmediu hacia l'Oeste y pal Sur alcontrámonos cola masa de viesca de Muniel.los, viendo más al suroccidente tierres gallegues n'Os Ancares.
Nel cumal del Tunón (1447 m)
Como tamos na primer ruta de la temporada, tampoco ye cuestión d'estresase así que taremos casi una hora tiraos, xintando, sestiando... vamos con calma, calma. El camín de vuelta nun sedrá otru que garrar el senderu más llimpiu posible topándonos nun claru con un güé como un camín.
Siguiremos como ya comentamos hasta'l L.lanu Pedrairas, qu'aparte de tener una pequeña llaguna igual que na Folgueirosa, tiene vistes bien guapes pa los altos de Cangas del Narcea: Cuitu Arbas y el triangular Caniel.las.
Nel L.lanu Pedrairas con una pequeña llaguna
Tocará siguir baxando esta vegada hacia'l col.láu Piqueiro (1255 m) pa siguir descendiendo per bon camín hacia la Braña la Siel.la, onde tendremos dos posibilidaes de baxada: pel val.le de Braña Nueva hasta'l Forcáu dellos kilómetros penriba de Monesteriu o pelos Sestos y el Val.le Rendina hasta'l propiu pueblu de Monesteriu al llau del riu Coutu.
Dicir que'l val.le de Braña Nueva, tenía una pinta guapísima, pero nun mos dió por facer más travesía colos coches y dicir que caleyar pela carretera As-29 nun ye una bona opción por tar mui transitao, poro baxamos de la Braña la Siel.la pela faldera de los Castiel.los pasando per un topónimu curiosu: los sestos.
Nós nel nuesu caleyar del val.le de la Braña Nueva a la otra fastera los Castiel.los per onde baxa'l val.le Rendina hacia Monesteriu, perpasaremos los topónimos Sestu Fonte'l Carmelo, Sestu L'Ablanín, El Sestu... quedándome con esti nome curiosu.
Baxamos pelos sestos hacia'l val.le Rendina que da a Monesteriu
Los sestos son llugares onde asestiar, ye dicir parar al frescu a descansar o el ganáu a moscar, d'ehí que vayan referíos tamién a llombes que proporciones quiciás esa solombra onde parar a descansar un ratín enantes de siguir camín.
Nós, baxo un sol perfuerte nun paramos nos sestos y baxamos lo más aina posible pel val.le Rendina a la parte alta de Monesteriu p'aportar al pueblu y dir al ríu Coutu onde poder refrescanos na fonte al otru llau de la carretera ya que veníemos mui curtios d'agua.
Llavaos y fresquinos, ficimos el tresvase de coches pa siguir hasta Cangas onde ver a Rebe y tomar dalgo na capital del conceyu del Narcea, magar d'una ruta de 7 hores y media nes que percorrimos 15.2 km y superamos un desnivel acumuláu de 1120 m.
Nun tuvo mal pa entamar...
Camudando'l Camín pente brañes y montes
No hay comentarios:
Publicar un comentario