Soto (Sobrescobiu) - Nozalín - Picu Cullargayos - Llaíñes (Sobrescobiu)

2 d'Ochobre de 2021

Track: Soto (Sobrescobiu) - Nozalín - Picu Cullargayos - Llaíñes (Sobrescobiu)

Continuamos cola vuelta al monte per Asturies, siendo esta un finde especial, ya que vamos facer una mini xuntanza por mor del XII Aniversariu del GM Xuan de la Borrina. De primeres, el númberu de participantes yera curiosu, pero pente la mala meteo y dellos problemes personales quedamos en poca xente, lo que nun quita que fuera un finde bien guapu.

El llugar escoyíu yera'l conceyu de Sobrescobiu y la Posada Cantu L'Osu fue'l nuesu campu base, durante tol finde. Dicir dende equí, que mil gracies pol tratu, poles cenes, los almuerzos, l'alderique montañeru y social y por tener comprensión coles baxes del grupu.

Partimos del aparcaderu de Soto (425 m)

 

Magar d'un almuerzu tan bono, como la cena del día anterior, presentámonos nel aparcaderu de Soto, con dellos planes nel bolsiellu, pero viendo'l día murniu y amenzante y que nun tenemos la meyor forma del mundiu pa lo que tenía pensáu, decidimos ascender al Picu Cullargayos, conociendo la foz de Nozalín.

Pasamos per Agues averándonos pocu a pocu hacia Nozalín

 

Pa ello, travesaremos primeru San Andrés y llueu Agues, p'a la salida d'esti últimu cruciar la riega Argayades y xubir per una pista, siempre a la mandrecha de la riega Nozalín. El día, lloñe de meyorar, va poniéndose más prietu y pesie a l'alborada espeyada, métese la ñube orbayando de continuu durante gran parte de la pista.

Entramos na Foz de Nozalín... llugar guapu enforma

Menos mal que vamos con bon ánimu y demientres la charra animada sigue'l so cursu, averámonos al entamu de la Foz de Nozalín, atopándonos coles muries del Picu Cullargayaos a la manzorga y el picu Les Crespes a la mandrecha, demientres el rigu afondónase munchos metros de cayía pembaxo'l guapu camín.

Salimos de Nozalín pela Teya ascendiendo hacia'l mayáu de Feleches

A la salida de Nozalín, paez que'l día decide acompañar un pocu, faciendo los últimos metros d'esta guapa foz ensin llover, saliendo a la parte alta'l rigu, onde na revuelta'l Fresnu, entamaremos dellos ciszás, entre cabañes, hasta aportar al mayáu de Feleches.

Entramos na fastera baxa del Cantu Imblenes onde damos vista al Cullargayos

Nesti mayáu, llueu de beber agua na so bona fonte, entraremos en tarrén de monte baxo, onde diremos ganando altor, per senderu ente cotoya y beriza, hacia'l Cantu Imblenes primeru pa continuar crestéu hacia'l Picu Cullargayos.

Vistes de primera dende'l Picu Cullargayos

 

Nestos altores de la ruta, el tramu final, pesie al día murniu, ye un esfrute total, pola divertida trepadina y poles guapes vistes, dende la Peña Riegos y el Picu Retriñón y tola fastera de la Xerra'l Crespón
que tan bones alcordances trean a la memoria.

Facemos cumal nos 1391 m del Picu Cullargayos

Al otru llau, les vistes de tol parque de Reres/Redes son increyibles, pero'l día nun mos echa un gabitu, asina que decidimos picar dos tonteríes y entamar a descender hacia la collada Imblenes, pel entrenteníu crestéu que ya esfrutáremos va dellos años n'ascensión dende Llaiñes.

Cresteríu de baxada hacia la collada Imblenes

Per un momentín, dempués de la parte más aérea del cresteríu de baxada y metíos nel fayéu, tuve tentáu de baxar a pinchu, pero fuimos sensatos y descendemos hacia la collada Imblenes, onde como non, hai abondes vaques pastiando y esfrutando tamién de les vistes del llugar.

Descendemos d'Imblenes hacia per Caón hacia la collada Faisalves

 

Per tarrén conocíu, demientres vamos saludando a dellos montañeros qu'animáronse a salir más tarde que nós, descendemos pegaos a la riega Caón, pa llibrando'l barru siguir camín pela viesca hasta salir hacia la collada Faisalves, puntu de parada, pa falar con Haritz, col envís de buscar sitiu pa xintar, ya que vamos bien de tiempu.

Facemos el descensu hacia Llaíñes peles Taconeres pel mediu d'un ablucante rebollar

Ensin pensar muncho, continuamos descendiendo per pista y cuando dámonos cuenta, nun tamos baxando pela normal, que sería pel Cándano, sinon, que baxamos más averaos al Cullargayos, conociendo un increyible rebollar, pasando pel Campu les Taconeres, hasta aportar a Llaínes al llau del remozáu llavaderu.

Desfacemos camin de nuevu hasta Soto pasando per Agues y San Andrés

Cruciaremos Llaíñes col día casi espeyáu del too y ya ensin fallu, siguiremos el PR que llevanos a cruciar la riega Argayades al altor del Molín, pa terminar por axuntanos n'Agues al entamu de ruta, desfaciendo'l pocu camín que queda hasta tornar a Soto, onde terminamos ruta y corremos hacia un vermú en terraza y una hamburguesa de primera en Casa Lao.

En resume, ruta mítica que faltaba por facer en circular per Nozalín, dafechu recomendable, nos qu'esfrutaremos, con un día meyor que'l nuesu de grandes vistes y una ascensión perdivertida nos sos 15 km de percorríu, con +/-1065m de desnivel acumuláu que saliónos en 6 hores de caleyar seliquino.

Camudando'l Camín dende Sobrescobiu