Margalef del Montsant (Tarragona) - Ermita de Sant Salvador

12 d'Ochobre de 2021

Track: Margalef del Montsant (Tarragona) - Ermita de Sant Salvador

Dempués de 3 díes d'esguilada intensa per Margalef tocaba facer un descansín y pa ello, al igual que n'otros viaxes, siempre llevo preparáu dalgo pa los díes descansu, col envís d'entrenar un pelín corriendo o simplemente dando un pateín tranquilu.

Ya saliera varios díes a correr pela mañana, a la gueta de circulares prestoses, pero siempre acababa enmediu d'un olivar y nengún camín llevárame a la parte alta de la xerra del Montsant, así que a lo llargo los siguientes díes preferí salir a correr per pista hasta Bisbal de Falset y vuelta ensin esmoleceme muncho más.

Partimos del aparcaderu de la Fonda Margalef (370 m)

Esta vegada, aprovechando qu'Almu tenía que colar de Margalef al terminase'l puente, fuimos Mario, Anna, Almu y yo a conocer el valle de Sant Salvador, pensando a posteriori en xintar daqué en Ca Vernet, pa despedinos y xubir a trepar un puquiñín de tarde.

Entramos nel valle de Sant Salvador

Coles mesmes salimos de la Fonda de Margalef, caleyando pel Camín de Sant Salvador, alcontrándonos al pocu con dellos cartelos cola rede de senderos de tola fastera. La verdá ye que tanto en Rodellar, como en Margalef, quiciás les mayores escueles d'escalada de la península, ye un placer tener tal cantidá de percorríos señalizaos pa esfrutar d'una carrerina pel monte o un día relaxáu de caleyar.

Perguapes vistes de los parés a dambos llaos del barranc de Sant Salvador

Pocu más arriba, abandonaremos el Camí de Sant Salvador pa baxar per senderu al barrancu pasándonos a la manzorga del rigu. El senderu colgáu sol barrancu dirá amosándonos guapes vistes hasta conocer la Cova la Roba, alcontrando dellos seutores d'escalada na so redolada.

Aportamos a la Ermita de Sant Salvador

Continuamos camín relaxáu, demientres acolumbramos la cantidá de furgos y coches qu'hai nel aparcaderu del area recreativa de Sant Salvador y ye que nesta fastera los seutores d'escalada tamién son pernomaos como'l Balcó de la Ermita, enriba nuesa o el Racó de la Finestra, al otru llau del barrancu.

Baxamos pel Camí de Sant Salvador

Magar d'echar un vistacín a la Ermita y los murazos que xurden penriba d'ella, vamos garrar el Camí de Sant Salvador y viendo la hora que ye, entamaremos el descensu dándo-y un pelín d'allegría conociendo la otra fastera del barrancu hasta aportar a Margalef de nuevu.

En resume, paseín mañaneru de 6,25 km qu'en malpenes 2 hores dimos preste, ascendiendo unos 440 m de desnivel valiéndonos pa conocer tal barrancu de Sant Salvador y faciendo fame pa xintar unes tapes en Cafe Vernet.

Camudando'l Camín pel parque de la Serra de Montsant