30 de Setiembre de 2023
Alborecemos en Viḷḷar de Vildas nel conceyu de Somiedu y alborecemos con tol grupu de monte Xuan de la Borrina, que xúnese a Miguel, Mario y yo, que llevamos un par de díes ya de pateos. Alborecemos sí, pero malamente, ya que la fartura riquísima de la nueche anterior, pasó a dellos chupitos, birres... hasta les mil col cocineru'l chigre, así qu'alborecemos pero de la manera.
Lo más cenciellu, diba ser, siguir durmiendo y que faigan la ruta los demás, pero dempués de preparar la ruta y ver que'l cadril, al menos, déxame patiar durante dos díes, había qu'intentar siguir col proyeutu ya intentar compartir una ruta toos xuntos, anque fuera de resaca.
Saldremos entós, sobre les diez y media la mañana, peles cais del pueblu, valle Pigüeña alantre, al igual que ficiéramos el día anterior, pero esta vegada na puente Los Cotaos, vamos tomar el ramal esquierdu durante unos metros, pa dexar la pista que sigue a la Pornacal y metenos dafechu na Braña L'Acebu, pela que fadremos delles amplies envueltes, enantes d'entamar un pindiu ascensu pegaos a los parés de la Pena la Furada.
Cualesquier esguilador asturianu, vería estos parés y le picaría too coles plaques, pero nun sólo equí, sinon too Somiedu ye un gran desconocíu y grandes posibilidaes pa la esguilada. Sicasí, tamos de monte y vamos dexar atrás la Braña L'Acebu, travesando'l caberu prau y entraremos nuna viescona preciosa, enllena de fayes y riegues increyibles, no que nómase como la Vaḷḷinona, una ayalga pa tolos sentíos dafechu.
Como bien sabéis, una vallina como definición, ye una pindia canal y la Vaḷḷinona, nun diba ser menos, ya que dende la puente Los Cotaos hasta la salida de la vallina, tendremos 800 m de desnivel, asina que'l pindiu tarrén nos 3 km de percorríu, será duro pero una auténtica gociada, restolando senderos, pente'l fayéu unes vegaes pegaos al paré y otros más metíos na viesca, cruciando la riega na so parte final.
Na parte cimera del fayéu, alcontraremos los tramos más pindios, nos que tomaremos direción hacia'l monte Agrional, fuxendo un pelín de la vallina, la cual embarráncase un pelín, pa tornar a ella na so parte final, col envís d'embocar hacia una salida, que ye una auténtica ayalga montañera: La ḷḷaguna Cabreiru a 1729 m.
Nun soi a albidrar un final más guapu pa la primer parte de l'ascensión como ye esta ḷḷaguna Cabreiru, ya que llueu de salir de la viesca, tendremos como un tramu d'escobes con senderu marcáu, como si fuera un llaberintu, pa salir de sutrucu a esta preciosidá de llaguna, dando pasu a lo que nómase como la sierra'l Páramu y como non a les llagunes del Páramu.
Con 4 kilómetros d'ascensión y dos hores y media de patéu, descansaremos un ratín nesta primer ḷḷaguna, esfrutando d'esta maraviya escondía, enantes de continuar per bonos senderos pente urcies, pasando pela ḷḷaguna seca del Lḷamazu primeru pa siguir camín hasta la Redonda, onde pararemos otru ratín, ya que les vistes hacia la fastera'l Cornón y Cogoḷḷu Ceboḷḷéu son de primera.
Con un caleyar más relaxáu, diremos avanzando, con munches duldes de varies persones del grupu, sol envís de tirar hasta'l Picu Moscosu, ya que venlo mui lloñe, anque pali pali vamos averándonos, xubiendo dalgunos hasta'l Lḷagarieḷḷu, demientres el restu, vamos garrar camín hacia'l Moscosu, atayando un pelín pela so fastera noroccidental, baxo'l cumal del Altu La Cogoḷḷa.
Con casi 5 hores de ruta, aportamos a los 1987 m del Picu Moscosu, al cuál ya-y ficiera una visita va unos añinos dende la Peral y que recíbenos con una ñube de mosquines nel so cumal, que fainos dar preste y baxar unos metros, pa poder parar a xintar cola calma, con toles vistes hacia la fastera del Puertu Somiedu y tolos montes a la so vera (Pena Gúa y Altu y Putracón, Salgada, Franca, Valdecuélabre...)
Magar de media horina de descansu, esfrutando de les vistes, vamos descender un pelín hacia'l vaḷḷe la Peral, pa baxar pela amplia panda sur, hasta tomar el camín que va llevanos hasta la fuente Borrones, onde intentaremos echar un gabitu coles vaques a un ganaderu, enantes de siguir hacia la Enfestieḷḷa onde ya si entamamos descensu hacia la Pornacal, pol conocíu percorríu dende La Peral.
Vamos con pelín de priesa, ya que Charly tien d'entrar a currar de nueche y la ruta allargóse penriba lo camentáu, asina qu'acompañámoslu tola pindia baxada hasta la pista que xube a la Brañaviecha dende la Pornacal, onde despedímonos y reagrupamos a la solombra col restu del grupu, non ensin echar un últimu vistazu a la guapísima Pena Lḷausecu, que visitáremos na nuesa ascensión al Cornón va unos añinos.
Reagrupaos y con Charly ya empobináu sin fallu hacia'l pueblu, descenderemos charrando animádamente, casi pensando ya, na cena que pensamos metenos en La Corte a la que van quedar tamién, les collacies del grupu, anque nun se queden a la ruta del día siguiente, asína como Mario y María que vienen a pasar la nueche.
Ensin más, pasaremos pela Pornacal, quiciábes la braña más nomada de Somiedu, anque con tola solana que pega, nun paramos siquiera a pegar una visita y siguimos descendiendo con ganes hasta'l pueblu de vuelta, piesllando esta increyible circular al Moscosu, con 17,7 km de percorríu, +/-1355 m de desnivel acumuláu y un total de 8 hores y 15 min, que fízonos ganar los refrixerios y otra cena increyible de productos somedanos.
No hay comentarios:
Publicar un comentario