28 de Setiembre de 2023
Selmana de vacaciones y dempués de probame na primer ruta de la temporada en L.lena, nel Curul.lu Braña, díbemos intentar dar un pasu más y facer varios díes de monte per Somiedu. El plan yera quiciábes mui ambiciosu pa mi estáu físicu, pero dempués d'unos díes d'escalada, ya tenía ganes de patiar nestes vacaciones, asína que'l primer axuntámonos Miguel, que vien dende Soria a pasar unos díes y yo, col envís de conocer un pelín meyor, la fastera somedana del Altu San L.lorienzu.
Pa ello, quedamos cola calma na Riera y viendo que tenemos tol día per delantre, vamos hasta la Pola a almorzar y baxamos de nuevu hasta la Riera, pa xubir esta vegada hacia L'Altu San L.lorienzu, parando nel pueblu de Las Morteras, onde tendremos el nuesu puntu de partida pa la ruta. Poro, preparámonos y a les 12 la mañana, entamamos a caleyar pentes les cases del pueblu, pa siguir camín hacia Fontagallos primeru a la solombra pa dempués salir a tarrén más abiertu de monte baxo pela Cantullada.
En tou momentu, vamos alcontrando camín y sorprendéntemente un airín frescu nortiegu, va dexándonos caleyar y esfrutar de la ruta, aportando en malpenes una hora, a una de les brañes más guapes d'Asturies, pol allugamientu sobretou, que non pol bon caltemientu, como ye Braniecha, cláramente asitiada no que bien podria ser un emplazamientu castrense astur de llibru.
Dende Braniecha, llueu de munches semeyes, vamos ascender hacia l'averada Pena L'Home (1476 m), xustu 150 m de desnivel penriba la braña y que completa un paisaxe y unes vistes increyibles de tol conceyu Somiedu, siendo esti puntu un mirador perfeutu de tolos valles somedanos (La Mesa, Somiedu, Pigüeña...) y tolos montes que cierren esti increyible conceyu, dende la llende con Teberga a Cangas del Narcea.
Los nuesos pasos, tendrán de llevanos al norte, descendiendo hacia'l colláu la Tartulla, onde vamos empatar col camín de la Mesa durante dellos metros, hasta que decidimos ascender tamién al picu Balgabín, viendo tola arista herbosa estrada de ganáu, diónos les ganes de patiar a la gueta de grandes vistes del nuesu destín final: El Monegru, monte de más presencia de tola fastera, pero con sienda d'accesu más fedionda de toos.
Dende'l Balgabín descenderemos pela arista contraria ensin problemes hasta la braña La Espina onde toparemos la pista que baxa al pueblu de la Bustariega y que llévanos a nós, hacia la terrible ascensión n'envueltes al Monegru faciéndose'l camín pelín cansino, per pista pedregosa y abandonándonos l'airín frescu, lo que fai que tarrezamos un pocu esti monte, pesie a les vistes hacia la mar que presenta y que domina tola fastera pente los conceyos de Somiedu, Miranda y Tinéu.
El calor a les 3 de la tarde, xunto a una mosquitada de llibru nel cumal, fai que xintemos una barrina enerxética y decidamos descender erróneamente per tierra quemada hacia la Bustariega. Nun paga la pena, muncho meyor descender pela pista de nuevu y baxar hacia'l valle Varcárcel, onde tendremos varies opciones pa volver a las Morteras al traviés de les brañes de Visnabar, Barrosa y Veigadeiros.
Nós, una vegada na pista hacia la Bustariega, siguimos camín pela Llaniza y el colláu'l Mogote, hasta topar la carretera nel colláu La Granda, anque decidimos descender per camín, con una primer idega que nos llevase a Valcárcel, col envís de recuperar ruta, pero'l calor y el mal estáu de los caminos qu'intentábemos lleváronmos al guapu pueblu de Clavichas, con un patrimoniu cultural arquiteutónicu perimportante y que paga la pena visitar.
En Clavichas, charramos un ratín con una paisana'l pueblu y ya decidimos viendo la hora y el calor que facía, que díbemos tirar de carretera, asina que dempués de cargar d'agua, descendemos un pelín pa xubir pali pali al crucie de carreteres a Valcárcel y la Bustariega, continuando dempués hasta'l crucie cola carretera del Altu San L.lorienzu, onde agora sí, palmaremos otros 3 km d'asfaltu terrible n'ascensu hasta Las Morteras, faciendo un total de 5 km de cagada montañera per asfaltu.
Facía tiempu, que nun tenía una cagada d'esti tamañu aventurándome pel monte, pero bono, nin les condiciones físiques míes nin de mi compañeru nin el día, cola calufa que pegaba a estes hores, daba p'aventurase pel monte, por munches ganes d'intentar igüar la ruta que tengía, reconduciendo per Valcárcel y baxando direutos hacia Las Morteras.
En resume, tenía ganes d'espublizar esta ruta, ya qu'hasta'l Monegru, prestónos enforma la fastera pela que movíamonos y la visión dende'l norte de tou Somiedu, pero bono, salió asina, siendo un total de 15.3 km (5 km de carretera) con +/- 1123 m de desnivel acumuláu nun total de 6 hores y media, muncho más de lo que tenía camentáu pa un primer día.
No hay comentarios:
Publicar un comentario