Chanos de Somerón (L.lena) - Curul.lu Braña

17 de Setiembre de 2023

Track: L.lanos de Somerón (L.lena) - Curul.lu Braña

Pues sí, llueu d'unos meses de parón nos que pude facer mui pocu de monte, tuviera dellos díes prebando la cadera per Soria y entamaba la nueva temporada 2023 - 2024 col GM Xuan de la Borrina, llueu de torgase tola parte más potente nos meses de primavera y branu de la temporada anterior, por mor de la mió lesión.

Nun debiera ser así, pero entiendo que siempre tiré pol carru, preparé les rutes y moví a la xente pa facer grandes travesíes per Picos, viaxes al Pirinéu, findes xabaces per Casu o Ponga y toles llocures que se me diben ocurriendo y treslladaba a mapes primeru pa intentales nel tarrén dempué,s con tola aventura que siempre conlleva, saliendo unes vegaes bien y otres non tan bien.

 

Partimos de L.lanos de Somerón (856 m) al llau del so texu y capiya

El problema ye que ya nun depende de les ganes que tenga de facer monte o non, simplemente la lesión nun me lo permite, asína qu'intentaremos dir meyorando un pocu y salir col grupu na medida de les miós posibilidaes y nesti casu, allá fuimos con tola illusión hasta L.lena, pa facer la primer ruta de la temporada.

Saldremos pues de L.lanos de Somerón, pueblín bien curiáu, con bon aparcaderu a la entrada'l pueblu y con un Albergue de Peregrinos, supongo, ya que toi mui verde nesto del senderismu institucional, siendo lo mío y lo que más préstame'l montunéu xabaz.

 

Descendemos un pelín pela carretera hasta'l desvíu hacia Munisteriu

D'esti xeitu, salimos carretera abaxo durante mediu kilómetru hasta topar unos cartelos qu'indíquenmos el nuesu destín hacia Munisteriu, empatando con un guapu camín colgáu, per onde diremos esfrutando de les vistes hacia la fastera contraria del valle del ríu Payares, col cordal de Carrocéu col picu La Boya y el Tresconceyos como puntu altu d'esti cordal.

 

Aportamos a Munisteriu pa bregar un pelín pa salir al mayéu d'Espina

Daremos colos restos de Munisteriu y nel intre, tendremos que salir per un senderu n'ascensu a la manzorga, dexando'l PR que continuaría hacia Fresneo. De primeres, vamos siguiendo senderu bien, pero un argayu d'árboles fainos bregar un pocu hasta salir a un práu, onde alcontramos un senderu en travesía pa siguir per monte baxo y acabar enriba del guapu y cuidáu mayéu d'Espina.

 

 Xubimos pela Mortera per guapu tarrén y cabañes en bon estáu

Fadremos travesía penriba los cuidaos praos, p'ascender de mayáu en mayáu, siguiendo senderu hasta la Mortera onde recíbenos unos guapos caballos y vamos viendo a lo fonderu'l final de l'ascensión al cordal de Chanos de Somerón. Pa ello, entraremos nun guapu fayéu, pel que nun alcontramos continuidá hacia lo alto, teniendo qu'entrar nel prau de Braña, saliendo pela mandrecha la cabaña hacia camín más ampliu.

 

Salimos de Braña per monte baxo hasta la pista con vistes al Curul.lu Braña

Nesti puntu, pensábemos que terminábase'l tramu más abegosu, pero tornamos a entrar en viesca, algamando un senderín pente felechos de bon tamañu hasta aportar agora sí, a la pista del gaseoductu, dende'l que ya tenemos a tiru'l Curul.lu Braña, teniendo namái que siguir la pista hasta la innecesaria y enorme cruz de maera, que paez ser ta puesta pel pueblu de Carraluz.

 

Facemos cume nos 1314 m del Curul.lu Braña con guapes vistes del macizu Penubina

Dos hores y venti minutinos dempués facemos cume nos 1314 m del Curul.lu Braña, ún de los pocos vértices l.lenizos que faltábenme por conocer y d'agasayu, tendremos perbones vistes de tola fastera central astur, dende L'Aramo, cordal de Sobia, tol macizu Penubina y pal sur, vemos pelín prietu, el Cuitunigru y el Ceyón, lo qu'indícanos que lo mesmu tenemos qu'entainar si nun queremos moyanos.

 

Semeya grupal nel Curul.lu Braña

Coles mesmes, descendemos de nuevu hacia'l puertu del Tronco, onde continuaremos per pista tol cordal alantre de Chanos de Somerón. Dicir, que tamién podríemos facer esta ruta dende Chanos, xubiendo per pista hasta esti mesmu puertu del Tronco, pero lo nuesu nun ye'l pistéu, asina que vamos continuar cordal alantre, ascendiendo nel intre al monte L.linares pa descender al Alto'l Carril.

 

Percorremos el cordal de Chanos enmediu d'una meteo pelín repunante

Nestos pasos, vamos tener qu'abriganos ya qu'un vientu del sur, trainos pelín d'agua y fríu, viendo como les ñubes tan tornándose más gafes, poro decidimos ascender al picu Carril (1349 m) pa baxar al colláu las Porqueras, onde se supón que traviesa un PR-As 95 que baxaría a Chanos de Somerón, cosa que ya podéis escaecer dafechu.

 

Baxamos per senderu con cierta traza na parte alta pa un infiernu na parte baxa hacia Chanos

Podéis escaecer esi PR, lo que marquen los mapes nun esiste, pero sí que baxa un guapu senderu que va faciendo envueltes maraviyoses y que na parte alta síguese bastante bien, hasta qu'aportamos a una cabana, cerquina'l pueblu, onde'l senderu amplíase de caxa, pero tómase enforma, con escayos, felechos, cotoyes y tou tipu de broza, que faime dir abriendo camín en pantalón curtiu, aportando a la parte alta del pueblu, con ciertu desencantu y munchu picor de pates.

Como dixe, una pena esti senderu, ya que'l trazáu dende Las Porqueras, ye mui guapu descendiendo tola vallina, pero aportamos escayaos enforma, sobretou Montse y yo, que díbemos de curtiu, dando preste a la ruta, xustu antes d'una tormentona, piesllando la ruta con 12 km de percorríu, +/- 730 m de desnivel acumuláu, nun total de 4 hores y 15 minutinos.

Camudando'l Camín pelos montes de L.lena