Puertu Payares (L.lena) - Picu Ceyón

29 d'Abril de 2012

Track: Puertu Payares (L.lena) - Picu Ceyón

Casi un mes ensín salir al monte... ye dafechu desesperante. Poro, ya nun había quien aguantase más y decidí facer una ruta con un mínimu de ventanu de bon tiempu, aprovechando que Carlos tamién taba con ganes y que díbemos conocer a un nuevu collaciu, Haritz.

Interné ye así. Si va unos años, conociera a Fernan gracies a esti blogue, agora'l corréu del GM Xuan de la Borrina, fizo qu'Haritz quisiera xuntáse a nós, pa ver como furrulábemos como grupu de montaña y de collacios, que ye lo que somos en rialidá.

Partimos nel aparcaderu del Puertu Payares (1367 ms)

La ruta diba ser al Picu Cel.lón, xustu enriba del pueblu l.lenizu de Payares. Pa ello, salimos de Xixón pola autovía minera en direición a Mieres del Camín, onde empatamos cola As-66 que nos dexará nel pueblu de Campumanes, llugar davezu d'almuerzu.

Magar del cafetín xubiremos al Puertu Payares, pasando pelos pueblos de la Frecha, Renueva, Fierros, La Muela, La Romía Baxo, Floracebos, Payares y La Campa, hasta travesar la llende del País Astur, baxando unos pocos metros hasta l'aparcaderu del Puertu.

Caleyamos pol Boquete la Calera con Ubina a lo lloñe

El día ta rarucu, ta ñubáu, gris... pero nun fai fríu... asína que preparámonos sele, botes, poláines, mochila y garramos una pista per detrás Casa Pernales. Dende'l primer pasu, avanzamos pela ñeve, pasando pol Boquete la Calera empobinándonos hacia la Xerra La Candanosa.

Xubimos pela Xerra Candanosa

Sigún vamos ascendiendo, veremos que pal Macizu de Penaubina, ta'l día zarráu, pero dacuando un rayu de sol, alluma dalguna de les altes cumes del macizu como la propia Penaubina o los Picos del Fontán.

L'ascensu faise pesáu por mor de l'apertura de buelga

Asína mesmu, echamos dalguna güeyada hacia l'otra fastera del puertu, onde pocos son los esquiadores qu'atreviéronse a xubir hasta Brañil.lín pa da-y a les pistes del Cuitu Nigru. Esti acolumbrar atrás, danos una pista de lo continuu del ascensu, ya que vemos bien abaxo'l puertu a una hora de ruta.

Acolumbramos el Picu La Pedrera y el Portezuelo

L'apertura de buelga ta siendo más duro de lo camentáu y empozamos dalguna vegada qu'otra, pero vamos avanzando a bon ritmu, turnándonos Haritz y yo, demientres Charly ocúpase de les semeyes.

L'arista tórnase preciosa nel nuesu avance

Como siempre, paez que ya tenemos unos cumales a la vista y nun sabemos si ye'l nuesu oxetivu o non, pero como suel pasar, nunca ye'l primeru. Nesti casu, foi'l Picu La Pedrera (1873 ms) y el Portezuelo (1858 ms), los que nos ficieron xubir el nivel d'esixencia al mesmu tiempu qu'ellos xubíen lo pindio del tarrén.

Paez qu'a la fín vemos a lo lloñe al Ceyón

Nel cumal d'estes llombes, vamos acolumbrar a la fín, lo que paez ser el Ceyón. La verdá ye que llevamos unes dos hores de llucha cola ñeve, pero ta siendo, per momentos, una auténtica pasada avanzar pel filu de l'arista fecha pola ñeve y el vientu.

Garramos la llende asturllionesa hacia'l nesu destín

Finalmente, baxamos un pelín hasta'l col.láu que sepártanos del entamu de la Xerra de los Pasos d'Arbás, a la que pertenez como cota más alta'l Ceyón y garramos la llende de los paises astur y l.lionés como llínea d'empobine hacia'l primer cumal de la xerra.

Defechu, vínonos de luxu la valla, ya que nel intre metíosenos una ñube enriba y la visibilidá fízose menor, aportando a esti primer cumal, la Cianca (2002 ms) con ciertes dificultaes pa saber cual yera'l puntu más alto.

Metíos na ñebla pasamos pola Cianca hasta aportar al Cel.lón

Dende equí, baxamos d'esta antecume con curiáu hasta'l col.láu y enfilamos darréu con tranquilidá, cola vista puesta nel prietu vértice xeodésicu, hasta los 2040 ms d'altor del Picu Cel.lón.

Cumal del Picu Cel.lón (2040 ms)

Dicir qu'apesar del día, de metese les ñubes, d'apaecer el sol picando como si fuera agostu, de volver a metése la ñebla, d'abrir buelga con llugares nos que fundíemos hasta la rodiella, d'otros más prestosos con una buelga cenciella.... esti picu hai que facelo con ñeve, jeje. Ye una pasada dafechu y eso que nun tuviemos vistes en casi tol tiempu.

D'otra miente, como por arte de maxa, abrióse dalgún clarín y pudimos xintar daqué asoleyando y agüeyando tola buelga abierta dende'l Portezuelo y lo que pudiera ser la ruta a siguir n'adelante con tola cresta del picu La Pájara.

Tola buelga abierta nel ascensu y el picu la Pájara

Esto, yera dalgo que ya camentaba yo pa dientro pero que nun teníemos nidio, ya que'l tiempu y la rodiella de Charly nun sabíemos lo que podría aguantar a non. Asína que, decidimos caltener esa esperanza de siguir ruta hasta baxar al col.láu de los Pozos, onde tomaríemos la decisión.

Baxamos al colláu de los Pozos

Bien ceo, veríemos que taba poníendose mui prieto'l día penriba la Pájara y les duldes sola continuidá hacia'l Picu Campañones, col envís de garrar tola cresta hacia'l Pájara ficiéronse pergrandes. Poro, preferimos baxar hacia'l valle de los Pozos.

Baxando pol valle los Pozos

Pa ello, baxo una lluz perincómoda na que nun se dixebraben bien les formes de la ñeve entamamos la baxada. Y digo esto, porque nel puntu de baxar de la cornisa ñeve nel col.láu, nun fui a ver el corte y espetéme una focicada escontra la ñeve, mediu metrín más abaxo, jeje.

Endelantre, vamos facer una buelga rápida, siempre a la mandrecha del requeru los Pozos, ensín mayores dificultaes hasta una pequeña llomba, dende la que vemos, enriba nuesa, claramente'l cornisu ñeve del Cel.lón, quedándonos nel maxín que nel momentu en qu'argaye val más nun tar per ellí.

Averámonos al regueru los Pozos

Dende esa llomba, vamos ya decidir baxar hacia'l regueru los Pozos, ya que vemos qu'al otru llau d'esti, tenemos un camín que va llevános hasta la pista de baxada al pueblu d'Arbás del Puertu.

Paez mentira, pero hasta esta baxada tola ruta foi, a pesar del tiempu, d'una tranquilidá absoluta. Pero como albidraba, sigún diba viendo'l regueru y fuimos averándonos a esti, otres munches riegues que-y dan calce a Los Pozos, baxaríen pembaxo de los nuesos pies, faciendo que primeru yo y llueu Charly, quedáramos colgando pelos brazos na ñeve, viendo la riega casi un metru pembaxo de los nuesos pies.

Presa col augua xeláo nel regueru los Pozos

Dempués del sustu, algamamos una baxada más segura pente les escobes, qu'en mi casu valiéronme pa salir del furacu y aportamos hasta'l regueru, el cual cruciamos ensín nengún problema, garrando'l camín que dexónos ensín dificultá na pista.

Como comentariu, dicir qu'esta baxada ensín ñeve, nun tien que tener mayor dificultá, sacante de llibrar les zones d'escobes, pero de xuru qu'al llau del regueru Los Pozos, tien de poder baxase tol ratu de forma cenciella.

Tol valle los Pozos y Charly col paquetón de ñeve

Llevamos cuatru hores de ruta, cuando tando na pista ponse a ñevar abondo, faciéndonos llibrar de la mente'l por qué, de nun continuar la ruta pol picu La Pájara. A vegaes, el tiempu date la razón xusto cuando lo necesites, ya que los incidentes na baxada, fízonos pesar la otra opción como meyor que la del valle.

Garramos tola pista alantre con una bona ñevada

Ensín más, garramos ritmu pela pista y baxamos con xeitu pela manzorga'l regueru, pasando delantre de munchos restos de l'actividá minera d'antañu nestos montes. Primeru, sedrá l'edificiu del Cuetu la Pedrera pa llueu conocer les bocamines, toes hulleres, de la mina Inés y l'Africana, asína de como la central hidroéletrica, a la que da fuercia d'augua la presa, onde garramos la pista.

Pasaremos per Arbás del Puertu hacia'l Puertu cola ñeve desaniciada

Con pocu más, que dir viendo como dexamos de pisar ñeve, llegaremos a la parte cimera del pueblu d'Arbás, nel que l'esbarrumbe industrial ye desconsolador y desviarémonos enantes de la carretera, pel camín de Santiagu, que ya per praos, va dexános en pocu tiempu y en xubida nel aparcaderu del Puertu Payares.

Nes 4 hores y 50 minutos d'esta ruta, aparte de ver como'l sol desfizo unos bonos metros de llende nival, dimos preste al Picu Cel.lón, percorriendo 9,9 kms y superando un desnivel acumuláu de 750 ms d'altor siempre cola ñeve como másimu protagonista.

Camudando'l Camín nel Puertu Payares

Nesta mañana de monte, fuimos a facer: Picu Cel.lón (2040 ms) vértice xeodésicu l.lenizu y dosmil y la Cianca (2002 ms) dos mil de L.lena
Ver progresos en: Retos montañeros