Modreiros (Miranda) - Xerra de Bixega

6 de Mayu de 2012

Track: Modreiros (Miranda) - Xerra de Bixega

Ehí siguimos col retu esi de los 100 montes más prestosos d'Asturies y por mala suerte o por mala política enerxética asturiana meyor dicho, tócanos tragar con delles rutes nes que'l monte prestosu pasó a meyor vida cuantayá... agora ye una puta llaceria.

El casu ye, qu'aprovechando qu'al fín había un día mediu decente nesta primavera, fuimos a decidinos por dir a una rutina de monte que ficiéranos tar pa la hora de xintar en casina, ya que yera'l día la madre y nun vamos tar tolos domingos fuera casa.

Entamu de ruta en Mudreiros (640 ms)

Asina que partimos de Llugones so les 8 y media la mañana garrando l'autovía "Y" en direición Uviéu y siguimos dempués en direición Grau pola As-63, hasta la salida de Cangas del Narcea. Dempués tomamos la As-15, pasando pelos pueblos de Salas de Bárzana, Santiagu la Barca y Requeixu, pa entrar a la fín nel conceyu de Miranda, onde travesaremos los pueblos de Cutiellos, Pumarada, San Bartolomé, L'Hospital, Llaureiru y Llongoria onde empobinamonos pola As-227, travesando Samartín de Llodón, San Cristóbal, Fontouria, Silviella, Albariza, Courias y a la fin, Balmonte onde desayunamos perbien nel Hotel Cela.

Ya van delles vegaes de mui bon almuerzu nesti hotel y esta vegada la tortiella y el trozu bizcochu (unu que ye llambión) foron increyibles. Dende equí, daremos media vuelta hasta Albariza onde sal una estrecha y pindia pista que va llevanos en delles envueltes hasta la braña vaqueira de Modreiros a 640 metrazos d'altor.

Salimos de Mudreiros en dirección al col.láu La Bovia

Serán casi les 10 y media la mañana, cuando entainemos a caleyar pista arriba hacia'l Col.láu la Bovia. Garrarémosla, saliendo del pueblu a la mandrecha y selemente va llevános al llau de mines d'antañu como la de Modreiros, L'Arroxu, L'Arroxón y Bixuriz hasta'l propiu col.láu de 848 ms.

Vista de la guapa viesca del regueru Los Güertos durante la xubida

La Bovia, sirve de pasu pente la braña de Modreiros y los pueblos d'Antuñana y Santa Marina y ta allugada pente la Xerra de Bixega y el picu Picu Gaméu. Dende equí, ya pocu nos queda ya de mirar coses guapes, ya que tenemos enriba la xerra tol horror eólicu, asína que casi preferimos mirar pa la guapísima viesca que ñaz del regueru Los Güertos, a lo baxero.

Xubimos del Col.láu La Bovia (848 ms) hacia la Xerra de Bixega

Llevamos media horina andando y vamos tener darréu'l tramu más duru, ya que vamos xubir a la xerra dende'l col.láu a puru güevu. Pa ello, ascenderemos pela Zorera siguiendo dellos senderinos hasta qu'a la fín topámonos cola pista que dirá de molín en molín.

Caleyamos baxo los molinos con ciertu mal rollu

Nesti puntu, dexamos de tener dalguna conciencia de tar faciendo dalgo de monte. L'espeutáculu ye horroroso y hasta da ciertu mal rollu, caleyar pembaxo de semeyantes monstruos. Pa enriba, nel nuesu día, a pesar de ser soleyeru, tiraba un airín que diba facé-yos dir a una velocidá mareante si dábate por seguir a dalguna de les sos enormes pales.

Podéis agüeyar a la velocidá que van y el ruiu que faen

Como agüeyasteis nel vidiu, nun ye mui prestosu andar per esta xerra, que quiciás si yera guapa de facer va tiempu, pero agora ye un auténticu dolor conocer tal destrozu mediuambiental. Aún así, caleyaremos pembaxu de lo que queda del Picu Cuervu y de los Fontanarios, empobinándonos hacia la Peña L'Urru.

El paisaxe ye un auténticu horror hacia Las Cobertorias

La verdá ye que dalgo intuyéramos Pangua y yo cuando ficimos el Picu Couríu, pero nun camentábamos tal estrozu nesta xerra, que dexando aparte la molinada que tien enriba, si tien bones vistes de conceyos como Miranda, Tinéu, Cangas del Narcea, Somiedu, Ayande... una pena la verdá.

Aún así, siguimos alantre hacia l'oxetivu del día, La Peña L'Urru??? Que sigún nos mapes onde restolo y nel propiu monte, ya nun esiste, ya que pasamos pel so allugamientu y nun hai más qu'un molín, poro siguimos hacia Las Cobertorias, puntu más altu de la Xerra de Bixega, por facer dalgún cumal.

Xubimos al máximu altor de la xerra de Bixega: las Cobertorias (1121 ms)

Aportaremos a los 1121 ms de Las Cobertorias, onde hai una tapa de la Piara, que pon L'Urru. Tengo mil duldes, sola toponima d'esta xerra. Nun se, si Las Cobertorias, yera L'Urru con fallu toponímicu o si enantes esistía una peñona que lleváronse per delantre les máquines pa llantar los molinos, como nomábase L'Urru. Apostaría polo últimu.

Siguimos xerra alantre con guapes vistes a los pueblos de Tinéu y Miranda

Tira l'aire y tamos mui fartos del soníu de los molinos. Quiero llargame d'equí, en cuantes que pueda. La mio idega inicial yera, baxar direutamente de Las Cobertorias hacia un senderu que márcanme los mapes penriba la mina la Francil, pero a Pangua-y apetez siguir xerra alantre y vemos una pista más alantre que paez empobinase hacia nós dende un colláu.

L'horror multiplícase: Molinos mutantes y balses mercurianes

Asína que siguimos, dacuando per pista, dacuando travesando a güevu pa salvar delles envueltes y pasaremos polos desaniciaos Picos Prietos hasta aportar al Alto'l Caulecho onde ya garraremos baxada hacia'l Col.láu de los Fitos.

En tou esti tramu, tendremos la suerte d'acolumbrar otru horror paisaxísticu, como ye la balsa de mercuriu de la mina de Bixega, asína como decenes de molinos más. Menos mal, qu'hai dalgo de bon paisaxe hacia perguapos pueblos de Tinéu, como las Col.ladas o de Miranda: Santa Marina, Vil.laverde,...

La Xerra Manteiga virxen

Nel nuesu baxar veremos la Xerra Manteiga, la cual sigue viva pel momentu, anque como l'anormalidá de los políticos asturianos nun tien llende, quedéme dalgo esmolecíu, camentando si tamién va sofrir un estrozu asemeyáu al de la de Bixega. Tiempu al tiempu.

Polo demás, aportamos a los Fitos y por nun baxar hasta'l col.láu Cimeiru, onde hai un edificiu enorme de caltenimientu de los molinos y parte la pista, preferimos baxar hasta ella, per un senderín que síguese bastante bien.

Baxamos del Col.láu Los Fitos pela Cueste'l Camín

Toparemos la pista y baxaremos a bon ritmu pela Cueste'l Camín, ya que ta echándose'l tiempu enriba nuesa, hasta la primer envuelta de la pista. Equí ya vemos qu'ésta baxa hacia la carretera que xube a Las Estacas, poro Pangua y yo falamos de la cagada que ficimos... toca tomar decisiones.

Como siempre, por nun siguir lo planeáu, tamos a tomar pol culu del coche en Modreiros y ya son la una la tarde pasaes. La decisión ta clara: Pau y Rebe, van baxar pela pista hasta la carretera As-310 y d'ehi baxarán con tranquilidá hacia Courías a la espera de que podamos dir a buscalas.

Pau intenta relaxase ante la liada de siempre

Menos mal, que ya nos conocen bien y tomáronlo con bona paciencia. Los faltosos de siempre, a metése pel mediu d'unos valles que nin conocemos hasta Modreiros. Pa entamar, siguimos una especie de pista hasta que vemos que torna a xubir.

Equí decidimos baxar hasta'l col.láu de Caunéu, onde buscaremos un senderu que baxe hacia'l val.le. Dicir que tamos en mediu de la Xerra de los Rebul.linos y tenemos que baxar hasta la riega de Caunéu pa tornar a xubir hasta'l crestéu que xube a Las Cobertorias.

Baxamos hacia'l colláu de Caunéu onde acolumbramos la ruta a siguir

La paliza va ser pa l'alcordanza. Alcontramos dalgún rastru de senderu y rápidamente baxamos de Caunéu (654 ms) hasta l'entamu del Monte Tabladón, onde nun sería estrañu atopar dalgún osu polo virxen del llugar.

Travesamos el preciosu monte Tabladón

La pena ye que nun tenemos tiempu pa esfrutar de la viesca y travesámosla a fueu, hasta oyer cada vegada más cerca la riega de Caunéu (494 ms) la cual cruciamos per onde más cenciellu vemos y alcontrámonos con dalguna muria humana d'abenayá.

Averámonos a estes muries col enfotu d'alcontrar senderu dalgún pero nun hai suerte y va tocános xubir per un de los piores faldones de xerra que vi na mio vida. Vamos tener que cruciar en llama, dellos tramos recién quemaos d'escobes tan incómodos, qu'a vegaes preferimos garrar pedreros pa nun engancharnos a les prietes rames.

Xubimos penosamente hacia'l crestéu de Las Cobertorias

Cuando a la fín, somos a encumar la cresta a unos 770 ms, tamos dafechu reventaos, paez que venimos d'una d'eses mines qu'abunden tanto nesta xerra, pero de picar carbón prieto. Lo pior de tou, foi camentar que tendríemos a vista Modreiros....

Pergrande erru... ya que tenemos enfrente nuesa una enorme ayalga arqueolóxica, la mina del Francil y como non, la sienda que la bordia va penriba nuesa enforma... unos cien metros d'altor namái, jeje.

Ganamos al fin el guapu senderu que supera la Mina La Francil

La xatada que llevámos enriba ye bestial, anque tiramos con xeitu p'arriba, hasta dar col senderu. Equí ye onde, dímonos cuenta de la tontería de siguir xerra alantre dende las Cobertorias, ya que la ruta quedaría perfeuta, baxando pela cenciella cresta hasta'l senderu qu'avanza colgáu penriba de tola mina La Francil, que sacaba mineral (bronce camiento) de la riega Barrublanco.

En menos d'ún hora, magar de dexar a Pau y Rebe, tamos nun colláu al llau de la Peña La Cruz, onde acolumbramos al fín a los nuesos pies, la Braña de Modreiros. Ensín más, baxamos corriendo per senderu hasta dar coles primeres cases del pueblu, aportando al coche frayaos y cola mayor sudada en muncho tiempu de montaña.

Reventaos aportamos corriendo a Modreiros de nuevu

En resumen, ruta mui pocu encamentable, que ficimos en 3 hores y 50 minutos, superando un desnivel acumuláu de 950 ms (atención a la paliza de xube-baxa de val.les) con tan solo un desnivel direutu de 630 ms nos 10,8 kms de percorríu.

Si queréis facela, por tachar esos 100 montes más "prestosos" d'Asturies, baxar de Las Cobertorias hasta lo cimeru de la mina La Francil y non sufráis nin un segundu de más, penriba d'esta horrenda anguaño xerra de Bixega.

Xiga de Modreiros nel tema'l Molín del Puirtu de Llan de Cubel

Quedarémonos cola música preciosa de Llan de Cubel, nesti molín del Puirtu, que nel so primer tema del set, tien por nome la Xiga de Modreiros. A esi ritmu más menos, baxamos en coche hasta recoyer a les neñes y d'ellí más en llama inda pa dexar a caún xintando coles sos families rondando les 3 y media la tarde, jeje.

Ta la prósima.... muncho meyor espero, jeje.

Les dos neñes que vien merecen la semeya final pola so paciencia

Nesta ruta horrible nel conceyu de Miranda ficimos el cumal de las Cobertorias (1121 ms), "monte prestosu astur"
Ver progresos en: Retos montañeros