El Brañil.lín (L.lena) - Xerra del Cuitunigru

9 d'Avientu de 2020

Track: Brañil.lín (L.lena) - Xerra del Cuitu Nigru

Otra selmana de vacaciones, na que llegó una ivernada curiosa saliendo a pisar ñeve, pero con mui mala meteo, na que tan sólo un día tuvimos bon tiempu, lo que fuimos a aprovechar nosotros y munches persones más que naguaben per sacar los esquís a pasiar.

Partimos dende El Brañil.lín (1435 m)

La primer idega yera tirar hacia'l Puirtu Braña, pero vemos na páxina del 112 que pieslláu, enterándonos a lo postreru, qu'un ábanu cortara la carretera. Como mediu mundiu, decidimos dir hacia la estación de Payares, aportando cola furgo ensin dengún problema hasta l'aparcaderu d'El Brañil.lín.

Vamos faciendo camín pel Val.lón hacia la Ventosa

Como bon montañeru, tengo un odiu fonderu a les estaciones d'esquí, pero bono, tocaba sacar a les perrones un ratín, qu'Anna calzase los esquís y yo diba entreteneme coles raquetes faciendo un pocu de pata. Salimos d'El Brañil.lín y nun día d'estos de cayer pates arriba de guapu, entamamos a raquetiar pel Val.lón siguiendo les buelgues de dellos esquiadores, esfrutando de los collores blancu y azul de la ñeve.

Aportamos al col.láu la Ventosa pa crestiar hacia'l de Fuente Reina

Demientres vamos bregando coles raquetes, esquís y dos perres que nun paren, aportamos al col.láu La Ventosa (1690 m), onde damos vista a la nuesa manzorga al Cel.leros y a la nuesa mandrecha, tol cordal que va hacia'l Cuitunigru.

Abrimos vistes hacia Cel.leros y las Tres Marías demientres avanzamos al Cuitunigru

Les vistes van ampliándose según vamos avanzando hacia'l col.láu de Fuente Reina, imponiéndose penriba too las Tres Marías, les cuales impresionen dende la nuesa posición. A dicir verdá, paezme complexu pa un montañeru alcontrar el momentu perfeutu pa visitar estes xerres d'esquiadores, pero si hai dalgunu, ye enantes de qu'apaeza tola triba peles pistes.

Continuamos hacia'l cumal de Cuitunigru

De Fuente Reina ya tenemos a tiru el Cuitunigru, con nun se cuantes hestories nel so cumal, la verdá ye que voi esfrutando de la ñeve, de les vistes ya inclusu, d'atopar a tolos esquiadores foqueando, munchos con perros, pa baxar peles pistes esnalando unos y corriendo a cuatru pates los otros.

Vistes perguapes dende'l cumal del Cuitinigru (1852 m)

Nós, tenemos abondo con controlar a Xena, que lo menos ye la primer vegada que pisa ñeve, viéndose nel so caleyar y nel fríu que pasando la probe. Kíla, avezada a estes hestories, nun ta teniendo'l so día y la ñeve recién cayíu, ta faciéndose que-y quede xelu pente los deos de les pates y los pelinos, teniendo qu'echar un gabitu dacuando.

Averámonos hasta'l cumal de la Carbazosa (1867 m)

Fadremos cumal nel Cuitunigru (1852 m) con vistes increyibles del macizu de Penubina y decidimos continuar hasta otra cota importante de la xerra del Cuitunigru, como ye la Carbazosa (1867 m), monte que fai llende pente'l conceyu de L.lena y les comarques de L.luna y los Argüeyos, no que sería otru tres conceyos asturllionés.

Tornamos so los nuesos pasos al Cuitunigru pa descender pel Val.le Fuente Reina

Dende los 1867 m de la Carbazosa, Anna decídese a esquiar un pelín, seguida per Xena y Kila y yo, tornamos so los nuesos pasos, hasta'l Cuitunigru, xuntándonos otru ratín, pa descender coles perrones mediu corriendo-raquetiando pela pista que baxa pel val.le Fuente Reina, hasta aportar a El Brañil.lín, onde topámonos con milenta escaladores, que tamién-y dan al mundiu de esquí de monte.

Pa esti montañeru, la ruta tuvo perbien, faciendo un pocu d'entrenu nes 4 hores y cuartu qu'anduviemos per esta xerra, faciendo un percorríu de 8 km con un desnivel positivu de 520 m. En resume, un paseín pa conocer un pelín meyor estes xerres del cordal cantábricu, que por nun llegar a los dosmil metros, queden escaecíes dafechu.

Camudando'l Camín na Xerra del Cuitunigru