Poncebos (Cabrales) - Bulnes - Cuetos d'Albu - Llagu Rasu - Valcosín

23 de Payares de 2020

Track: Poncebos (Cabrales) - Bulnes - Cuetos d'Albu - Llagu Rasu - Valcosín

Lo de siempre, llamada d'Ana con picor de monte xabaz y Berto qu'acude a la llamada. Conocémonos demasiáu bien, como pa saber que ye lo que-y presta a la compañera de grandes batalles, asina que preparo una circular cañera pero con toque teúnicu na parte alta.

Problemes? Tolos que quieras, tamos casi n'Avientu con mui poques hores de lluz y ocúrreseme la xabazada d'ascender a los Cuetos d'Albu dende Poncebos. Camiento que somos a ello, pero tamién tengo claro que nun tamos na forma d'otros años y ye que'l 2020 pasó factura en tolos sentíos.

Partimos de Poncebos (260 m) de nueche aportando a Bulnes (715 m) pela canal del Texu

Aún así, decidímonos y nun día fresquín, fresquín, alborecemos pela canal del Texu, magar de salir dende Poncebos en Cabrales, unos minutinos enantes de les 8 la mañana col frontal. Pocu que cuntar d'esti primer tramu d'ascensión hasta Bulnes dende'l puente La H.aya, ya que va casi diez años que ficiera esta guapa canal per primer vegada n'ascensión al Trabe Norte.

Nuna hora clavada tamos nel Castillu, nel barriu altu de Bulnes, lo que nos diz a les clares, que tan mal de forma nun tamos. Siguiremos camín alantre, empobinándonos hacia Amuesa, pasando pel Llanu'l Tornu, onde va dellos años hubiera un ábanu brutal dende'l Cuetu d'Albu, cumal al que pretendemos ascender.

 

Salimos de Bulnes hacia Orandi pela Cuesta Quemada

Xustu enantes d'entamar la canal d'Amuesa, desviarémonos a la manzorga, per una vallina nomada como Cuesta Quemada, tarrén amestáu, pelín abegosu d'andar, con tramos de yerba llargo y caliza resbariosa, hasta aportar a la base de la enorme panda que ye'l Cuetu d'Albu, onde trendremos senderu más cenciellu de caleyar.

El día caltiense perfríu y sólo los ritmos a los que vamos, faen que nun tengamos que poner más ropa, sicasí, decidimos parar a xintar daqué nel empalme de la Cuesta Quemada col senderín que vien dende Amuesa pasando por Orandi.

Entamamos la insufrible ascensión al Cuetu d'Albu

Casi 3 hores de ruta, amuesen lo duro y abegoso del tarrén nel que nos movemos y entá quédanos salir hacia la panda interminable que ye la fastera norte del Cuetu d'Albu. Poro, facemos el pasu d'Orandi hacia'l Bobiu y agachamos les oreyes a la gueta del meyor senderu que nos faiga dir ganando desnivel pali pali.

Tan sólo les increyibles vistes de tola fastera de los Trabes, faen que dexemos de mirar al suelu y ye que nun hai un momentu nin pa garrar aliendu. Tola ascensión ye pindia y continua, poro entretenémonos en mirar un pocu'l trazáu que vamos siguir y en charrar de milenta histories de la vida, hasta que sentimos l'arista final más averada y la emoción del cumal entama a tener una clara presencia.

Brutal llegada al cumal del Cuetu d'Albu

Más de 5 hores faen qu'a la fín aportemos a los 2401 m del Cuetu d'Albu y non sólo eso, sinon que ye'l primer momentu del día que sentimos el sol na nuesa piel. Nun podemos facer otra cosa, que mirar pa tolos llaos ya intentar calecer, ya que les vistes son alloriantes, ya seya hacia la Vega Urriellu o hacia'l Cornión, tal ye que nun somos a parar de sacar semeyes.

Vistes dende'l cumal del Cuetu Albu (2401 m)

Tamos nos díes más curtios del añu y costónos más de 5 hores superar los 2200 m de desnivel direutu qu'hai pente Poncebos y esti cumal. Cualquiera sentiría que ya tenemos el día más que fechu y buscar una baxada pa retirar sedría lo normal, pero tovía ye la 1 la tarde y tenemos ganes de más caña.

Navegamos pente la caliza pa crestiar hacia'l Picu d'Albu

Desfacemos camín pela arista O hasta una pequeña forcadina, onde destreparemos per tarrén rotu, pasando pente varies aguyes hasta aportar al forcáu que separa'l Cuetu del Picu d'Albu. El llugar ye 100% Picos y saber movese y navegar ye pernecesariu, pasando del forcáu a la fastera E del Picu d'Albu onde tendremos delles trepadines cencielles hasta encumar los 2442 m.

Esfrutando del sol serondiegu nel picu Albu (2442 m)

Tamos esfrutando como neños y con esti cumal ya completo tolos Albos, ya qu'al Neverón d'Albu ya xubiera con Fernan va unos años, pero queremos completar el crestéu, asina que ponémonos a restolar per onde tenemos pasu.

Pa ello, descenderemos hacia la fastera del Llagu Rasu, per tarrén de terracéu espuestu, con muncha piedra suelto. Poro, tenemos munchu curiáu y andamos sollertes de nun dar dengún pasu en falsu. Tamos más tiempu de lo que nos prestaría restolando'l pasu, pero en travesía nun lo vemos claro, hasta que topamos una vira ascendente pela que trepamos hasta una forcada onde alcontramos accesu hasta la cresta hacia'l Neverón.

Perguapa travesía pente'l Picu y el Neverón... esixente y espuesta

Sacante de lo físicu de l'ascensión a los Cuetos d'Albu, el tramu pente'l Picu y el Neverón fué lo más esixente téunicamente y los 40 minutos de navegación así lo indiquen. A les 2 y media de la tarde, una hora y cuartu dempués de pisar el cumal del Cuetu aportamos al Neverón d'Albu (2443 m), a mi entender, ún de los cumales más guapos y con meyores vistes del central y que teúnicamente nun ye tan complicáu como pa nun tener más visites.

Descansu más que merecíu nel Neverón d'Albu

Con casi 7 hores d'actividá, decidimos echar un ratín a asoleyar y xintar daqué, ya que tenemos claro, que la baxada sedrá llarguísima pero sabemos onde queremos tar pa cuando la lluz escose, poro nun vamos tener más priesa de la necesaria.

Col banduyu enllenu, guío a Ana pela baxada del Neverón d'Albu, tarrén conocíu pa min, non como'l restu de la travesía que fuimos a l'aventura como ye davezu en nós. Facemos les clásiques envueltes de baxada del Neverón pela fastera Este y embocamos hacia'l canalizu pel que tenemos que destrepar, anque Ana nun lo vea mui claro jaja.

Descendemos del Neverón demientres la lluz de la tarde entama a escosar

Superamos el destrepe sin problemes y ya baxamos per tarrén cenciellu hasta la base de los Cuetos d'Albu, onde empobinámonos apriesa hacia'l Llagu Rasu, col envís de facer una nueva baxada hacia Cambureru que nun conozo.

La circular ye perfeuta y vamos encantaos, pero nun contábemos colo enrevesáu del tramu pente'l Llagu Rasu y la mayada de Cambureru y ye que tenemos que dicir que se nos fizo bola. La navegada qu'hai que facer per esta fastera ye ablucante, teniendo que dir guiyándonos de h.itu en h.itu con mui pocu camín marcáu.

Perabegosa fastera la del Llagu Rasu hasta Cambureru

 

Nun somos de ponenos nerviosos nunca, pero tuvimos qu'empleganos a tope, buscando per onde sedría meyor baxar, tanto que xubiéndome a una peña pa intentar acolumbrar camín, pisé una piedra que movióse y fízome baxar rodando per una llambria zampando una hostia curiosina.

 

Con dolor nel cadril, siguimos descendiendo hasta alcontrar una vallina que fízonos empobinar hacia la canal de Cambureru con un pasu increyible per un canalizu. La verdá ye que cuando aportamos a la mayada Cambureru, nos miramos, miramos el reló, les 5 y media y camentamos lo gafu que diba ser perdenos de nueche per esti llaberintu de h.oos y vallines.

Tramu perconocíu de Cambureru y Valcosín hacia Bulnes

Sabemos mui bien de les nueses posibilidaes, tanto físiques como téuniques, pero los dos pensamos que lo mesmu fuéseme la pinza con tan poques hores de lluz nel día, planiar esta baxada pel Llagu Rasu y que sedría muncho más sensatu baxar pela Corona'l Rasu y H.ou Lluengu hasta Cambureru.

Siempre toca deprender dalgo nel monte, esta vegada llibramos pero ye fácil perdese, poro nun encomiendo demasiáu la xunión de Cambureru col Llagu Rasu nesta dómina de l'añu. Nós, aportamos a Bulnes xustu col atapecer, magar de facer Valcosín coles últimes lluces, baxando la canal del Texu a la lluz del frontal.

Facer una circular de casi 18 km con 2220 m de desnivel positivu y negativu nesta dómina del añu, ye cuanto menos una pequeña llocura, pero bono, así son les nueses llocures de casi 11 hores y media d'actividá.

 

Como siempre, dar les gracies a Ana por llevame de monte, por faceme discurrir rutes que nos presten a los dos y por poneme siempre les llendes un pocu más allá. Un placer de día y un placer d'actividá.

Camudando'l Camín nel coral de los Urrieles