Millaró (Los Argüeyos) - Cuetu Millaró

27 de Setiembre de 2020

Track: Millaró (Los Argüeyos) - Cuetu Millaró

2020, añu pandémicu. Branu enllenu de salides al monte, col grupu, sin grupu, xataes, ascensiones clásiques. Qu'esperar a partir d'agora? Entamamos temporada como si nun pasara na? Munches incóunites teníemos y aún así, decidimos entamar la temporada del GM Xuan de la Borrina con una salidina curtia pa intentar calecer pates y que la xente vaya animándose.

 

Partimos de Millaró (1380 m)

La idega? Averanos hasta Llión a la gueta del solín ya que por Asturies andaba'l día mediu gafu, poro tiramos pal puertu Payares y vamos dir hasta'l pueblu de Millaró, dende onde pensamos ascender al so cuetu, el Cuetu Millaró de 2181 m, ye dicir un monte bien curiosu, que suel facese muncho n'ivernal, como ya intentáremos va unos añinos teniendo que danos la vuelta nun hombru a 1745 m aprosimádamente.

Ascendemos per pista hacia'l colláu Farramedal

Esta vegada nun hai fallu, tamos nun día soleyeru anque fresquete, asina que travesamos el pueblu y saldremos per una pista que n'amplies envueltes tien de dir llevándonos hacia'l colláu Farramedal. La verdá, ye que sorprende l'accesu al pueblu, pela guapa foz de la riega Millaró, pente les peñes de los Bueyes y el picu Cruz, montes que dende riba, son tan guapos como dende baxo.

Garramos arista hacia'l picu La Pizarra y continuaremos la cueda de dosmiles hacia'l Cuetu Millaró

Nel colláu Farramedal, garraremos tola cuerda hacia'l picu La Pizarra, pasando un tramu d'urcies baxes pela Llana Gustomil y ya per tarrén llimpiu hasta esti cumal de 1984 m, onde como non, alcontramos afloramientos de pizarra, dignos de facer un teyáu y una cosa si fai falta jaja.

Continuamos sele hacia la mola del Cuetu Millaró pel Altu'l Sestéu

Escaeceremos les pizarres y paralelos al cursu del valle de Riosal qu'aporta hasta'l pueblu de Piedrafita,  vamos ascender tola arista Este pasando per dellos dosmiles, como son la peña La Foya (2021 m) y el Altu'l Sestéu (2046 m), pa continuar per pindiu anque cenciellu tarrén hasta los 2181 m del Cuetu Millaró.

Nel Cuetu Millaró (2181 m) esfrutando d'una xornada soleyera de monte

Tamos nel monte una vegada más, esfrutando de les charres y alderiques nel GM Xuan de la Borrina y anque ficiéramos esta ruta curtia, pa quitar la carbonilla, ta prestándonos enforma. Poro, fadremos un tranquilu altu nel camín pa xintar y pa dixebrar les distintes posibilidaes que nos dá esti monte pa ivernal y nel intre, ya decido que quiero ascendelu de nuevu dende'l valle Piedrafita, asína que verémonos de nuevu más bien ceo.

 

Descendemos hacia'l Llanu'l Prau onde garramos la pista de baxada hacia Millaró

Con pocu más, decidimos dexar los dosmiles que llévenmos hacia L'Estorbín pa otra ivernal y garramos l'arista Sur, dexando la riega Matamala a la nuesa manzorga, hasta aportar al Llanu'l Prau, onde garramos una pista que crucia tola faza sur y que va dexanos descender cómodamente hacia'l pueblu de Millaró pasando pela collada Carrozal, zarrando una circular bien prestosa.

Como ya dixe, ruta seliquina de 12.5 km con un ascensu de malpenes 850 m, que tien de ser muncho más prestosa n'ivernal ya que nun llegó nin a 5 hores, poro pa los díes curtios y fríos, ye una opción bien guapa.

Camudando'l Camín pelos Argüeyos