H.ou de los Cabrones (Cabrales) - Cuetos del Trabe - Amuesa - Bulnes - Texu - Poncebos (Cabrales)

9 de Xunetu de 2013

Track: H.ou de los Cabrones (Cabrales) - Poncebos (Cabrales)

Ayeri de nueche, paez que los únicos con fuercies pa nun dir pa la cama a primer hora, fuimos Pangua y yo, que tuviemos fuera colos frontales, lleendo revistes y bebiendo cerveces que nos proporcionaba'l refuxeru. El casu, fué que cuando aportamos al refuxu de nuevu, magar de ver l'atapecer, alcontrámonos con tol mundiu na cama, dempués de paez ser d'una riña del refuxeru pa con unos faltosos de Murcia.

Nun tengo claro, que folixa queríen montar nun refuxu d'alta montaña a 2030 ms. Fernan, Bittor y Tito, taben nel sacu ya, y nós nun teníemos nin plizca de gana de durmir, anque tuviésemos cansaos, poro falamos col refuxeru, seriu pero mui bon paisanu por ciertu, y proporcionónos un par de cervecines pa facer sueñu.

Alborecemos nel H.ou de los Cabrones (2033 ms)

Al día siguiente, alborezo con esta semeya... y dígome... esto ye Asturies, si nun vos presta dir a tomar pol culo. Esi pensamientu, vínome al notar como los ingléses qu'había nel refuxu, yeren respetuosos, falaben sele ya esfrutaben de cada momentu que pasaben entre les ablucantes cumes que nos arrodiaben.

Los españoles (murcianos nesti casu), daben voces, bebíen, reíense de los ingléses... ya nin siquiera foron a esmolecese por ver el mayor espectáculu del H.ou de los Cabrones, l'atapecer y alborecer del día. Ye claro, qu'Asturies tien que salir d'esti estáu de lladrones y babayos, arguyosos de la so propia mierda de ser y del so sentíu patriu.

Xubiendo a la collada L'Agua (2139 ms)

Aparte, d'estos camientos, llevanteme pela mañana, colos pies tocaos. Ya llevamos tres díes de Travesera Picos baxo un calor fondu y lo que pior llevo, ye'l recalentamientu de les plantes de los pies. Amás, nel día de güei, desdexaes delles opciones d'ascensión lo más importante y duro del día va ser la baxada... más pior inda.

Pero bono, seyamos positivos, vamos a finar una travesera más y hai qu'ascender daqué pa quedar más a gustu, poro tiramos con calma y ensín mochiles hasta la collada l'Agua. Ellí, Pangua, Tito y yo, vamos ascender los Cuetos del Trabe.

Vía d'ascensión per un canalizu de roca probe nel qu'hai qu'andar con güeyu

Supongo qu'hai dalguna ruta que xuba directamente dende la collada, pero nós, preferimos baxar un pocu desnivel y arrodiar el cumal sur, pola fastera oriental que mira pal h.ou de Cabrones. A dicir verdá, nun ye una ascensión difícil, pero hai que tener munchísimu curiáu coles piedres.

Los canalizos pelos que trepamos, son de roca probe, despréndese cenciello, poro hai qu'andar sollerte de nun-y tirar a los d'abaxo piedres. Polo demás, en cuanto garramos la vía d'ascensu, en venti minutinos ya tábemos pisando esti modestu cumal sur de los Trabes (2222 ms).

Facemos cumal na cume sur de los Cuetos del Trabe (2222 ms)

Y digo modestu, porque anque en dellos mapes, venga marcáu como un cumal importante, malpenes llevanta varios metros de colláu sol Cuetu Central del Trabe. Asína que dempués de marcalu, siguimos caleyando pela cresta hasta'l puntu más altu de los Cuetos del Trabe, el central (2752 ms).

Paséu hasta'l Cuetu'l Trabe Central (2752 ms)

Como nun tamos nes meyores condiciones dempués de 3 díes per Picos, escaecemos cualesquiera posibilidá de seguir descubriendo'l restu de cumales. Dizse que son una docena de cumales, anque la mio dimposición de tener un colláu mayor de 30 ms o un nome rexistráu en mapes o llibros pa consideralu cume siquiera, faime pensar en una posterior visita a los que queden pa comprobalu.

Ablucante panorámica fecha por Tito... dende los Albos a los Dobresengros

De toes formes, apúntome na llibreta de los Trabes, tres cumales, anque'l sur... sacante de tar nomáu nos mapes, nun debería nin contalo. Sacante d'esto, colo que sí que me quedo ye coles increyibles vistes que tenemos... una amuesa la panorámica que fizo Tito dende'l Central, digna de tar en cualesquier salón d'un montañeru.

Al igual que na xubida o más, muncho curiáu col argayu de piedres baxando y salímonos de nuevu hasta la collada L'Agua, onde topámonos con Fernan, que venía de xubir al Picu Canalizos, diciéndonos que tien corte pal accesu al primer Dobresengros.

Ascensión al Picu Canalizos (2247 ms)

Con esto quiso decinos, que nun diba aventurase a nengún de los Dobresengros, asína que paecía que les ascensiones pel día de güei acabábense y que los Dobresengros diben quedar pa otru día tamién. Pangua y yo quisimos al menos conocer esi pequeñu collaciu de los Dobres y xubimos tamién hasta'l Canalizos, el cual aparte de ser casi más alto que los Trabes y tener bones vistes d'ellos, tien una estupenda visión de la Canal de Ría.

Pangua y Fernan nel Canalizos

Agora sí, aportamos a esti cumal, non sin esfuerzu, ya que paez que'l cumal ta más cerca y hai qu'ascender más de lo albidráu, y baxamos a fueu hasta la collada primeru y llueu hasta'l refuxu, despidiéndonos tamién de los Dobresengros, que tendrán que quedar pa una intentona nun futuru próximu, espero.

Descansu nel H.ou de los Cabrones enantes d'entamar la baxada

Son les 10 y media de la mañana y como quien diz... ya ta tol pescáu vendíu. Les nueses aventures montañeres quédense namái, en nun sufrir de más col calor, baxando hacia Bulnes onde espéranos la xinta de fin de Travesera.

Baxando'l tramu d'amiestu de ñeve y caliza baxos los Cuetos del Trabe

L'añu pasáu, quedáramos ensín ella, al acometer una estaya final escesívamente dura, qu'amestáu a les condiciones malísimes del tiempu, púsonos en términos casi épicos acabando pertarde pa cualquier xinta. Esti añu, viendo que nun fue la Travesera más plena de satisfacción, quiciás por tener unes mires altísimes al planiarla, merecíemos quedar al menos fartucos.

Baxando la Cuesta'l Trabe hacia Amuesa

A bon pasu, baxamos tola parte que traviesa pente los Trabes y el H.ou del Agua, y más aína inda, baxamos tola cuesta'l Trabe, parando namái que pa echar un vistazu a les cabañes d'Orandi, peles que teníemos intención de baxar si xubíamos a los Albos y tamién pa falar con un rapaz que xubía hacia Cabrones, dándo-y una botella entera d'agua ya que camenté que diba pelín xustu y podía pasalu mal pol calor.

Llarguísima y guapa canal d'Amuesa

La canal d'Amuesa puso'l puntu desesperante a la baxada, ya que los mios pies nesti puntu, ya nun podía más y glayaben a les clares, que queríen metese nun ríu y poner unes chancles. Poro, baxé corriendo tola canal, con tal d'aportar cuanto antes a Bulnes.

Aún así, fízoseme llarguísimu'l tramu del Tornu, asína como la pista que va del Castillu a la Villa en Bulnes. A les 2 de la tarde, llegamos Pangua y yo, a la ponte so la riega'l Texu, onde ante l'asombru de los turistes metémonos al ríu según vamos pa refrescanos.

Aportamos a la hora'l vermú a Bulnes

Casi media hora más tarde que nós, apaecieron Tito, Bittor y Fernan, que ficiéron esáutamente lo mesmu. El cuartu día de Travesera y el calor nun mos daba un respiru de nenguna manera. Menos mal, que col ríu y colos cañones de cerveza recuperamos una temperatura corporal más normal.

Salú ya dixebra... a pola próxima Travesera...

La xinta en Casa Guillermina, mui correcta al igual que'l tratu, y con poques ganes de tornar baxo'l sol, salimos de Bulnes, empobinándonos hacia la guapísima y mui concurrida canal del Texu. Nun tengo muncho más que cuntar d'esta canal ya que n'ascensión al Torre Cerredu fícela p'arriba y p'abaxo, prestándome pola vida.

Baxando la canal del Texu

Esta vegada, a pesar d'alcontranos con munches persones que mirábenmos raros, por mor de los mochilones que llevábemos enriba, tamién prestóme volver a baxar per equí. Nun se que tien, pero tando como na parte baxa de los Picos, ye una amuesa perfeuta de lo que si yes montañeru pues alcontrate penriba.

El Picu asoma tímidu demientres aportamos a Poncebos

Ensín más, atopámonos cola puente la H.aya y pa mi sorpresa somos inclusu a ve-y la tiesta al Picu Urriellu, cosa que nunca toviera la oportunidá nes vegaes que pasé nesti puntu. Col estómagu enllenu, pero con otra sudada por mor del calor, aportamos al coche, onde teníemos la ropa a mudanos.

En total, esti cuartu día, fízose nun total de 9 hores y media, anque tenemos que quitá-y delles hores de paraes. Lo que nun-y pudimos quitar nin llibrar, fueron los 450 ms d'altor d'ascensión y sobretou los 2245 ms de desnivel de baxada que pa los pies y les pates cansaes son el remate a una Travesera rara pero mui sufrida.

L'añu que vien tamos seguros, que seremos a medir meyor les nueses fuercies, planificar unos oxetivos riales y factibles y a esfrutar d'otra nueva travesera que ya tenemos nel maxín.... solo necesitamos salú y ganes que nunca falten.

Camudando'l Camín en Picos una vegada más, una Travesera más

Nesta cuarta estaya de la Travesera ficimos 3 dosmiles de Picos: Cuetu Sur del Trabe (2222 ms), Cuetu Central del Trabe (2752 ms) y Picu Canalizos (2247 ms)

 
Ver progresos en: Retos montañeros