jueves, 7 de enero de 2021

Los Llanos (Morcín) - Cuitu Rumiru

3 de Xineru de 2021

Track: Los Llanos (Morcín) - Cuitu Rumiru

Iviernu de nuevu estrañu, ensin rutes del grupu y con una meteo gafa con una ivernada como nun viéramos n'años, ya que vamos pa 3 selmanes siguíes de ñevaes continues. Asina, que vemos media ventanuca o más bien, echámos-y un par y decidimos dir hasta'l Monsacru pa facer dalgo rapidín y quitar los picores montunos.

Kíla esfrutando de la ñeve dende los primeros pasos
Nun hai que dicir que'l Monsacru, ye mi tarrén de xuegu favoritu, onde más esguilo n'Asturies y onde préstame entrenar corriendo pel monte, poro faltábame facer una ivernal y que meyor qu'esti añu. El día nun taba pa munches maraviyes, asina que salimos dende Los Llanos pa xubir pela canal de los Bues hacia'l colláu'l Cantu la Sierra.

Ascendemos pela canal de los Bues

Otres vegaes, cuando entreno, suelo enllazar Los Llanos con Otura y ascender pela canal d'Otura, con una canal más pindia y dura qu'esta, qu'enllacen ambes nesti colláu pa llueu descender un pelín y enllazar ascensu hacia la capiya la Madalena primeru y llueu hacia'l cumal de la Fayona, qu'ascendiéramos va milenta años.

Facemos tola travesía pela capiya la Madalena hacia'l Cuitu Rumiru
 
Según aportamos al colláu cola Fayona, métese una ñube y toca sofrir cola ventisca, poro decidimos siguir hacia'l cumal mayor del Monsacru, el Cuitu Rumiru y descender por si la cosa se pon complicada. Pasaremos pel Cantu la Tinta, baxando a un collaín y ya fadremos l'ascensión final a los 1054 m del Cuitu Rumiru.

Cumal del Cuitu Rumiru (1054 m) nel Monsacru

Con esta meteo y el monte bastante petáu de ñeve, nun ta'l día pa facer otres variantes, como pudiera ser la vuelta más llarga per Valdeoveyes pasando pel sedu nel paré picu'l Llanu Villar hacia Covarriella, poro decidimos descender pela Vallina Monxa, faciendo buelga cola ñeve penriba les rodiyes y ya garrar bon camín hacia Covarriella.

Baxamos pela Vallina Monxa hacia Covarriella

Dende Covarriella ya garramos pista tranquilamente y nunes cuantes envueltes taremos de nuevu nos Llanos, mudándonos de ropa pa dir xintar un menú na Vega de Riosa. La verdá ye qu'esta rutina que ficimos en malpenes dos hores y media, con un desnivel d'unos 600 m y un percorríu d'entre 4 y 6 km dependiendo de les variantes, ye una gran opción ya seya pa entrenar en seco o pa bregar un puquiñín pela ñeve.

Déxovos el track, coles variantes pa que faigáis lo que más vos preste y si queréis xubila dende La Collá, tenéis la entrada de va unos añinos equí.

Camudando'l Camín pel Monsacru ivernal

No hay comentarios:

Publicar un comentario