La Güera (Tierras del Burgo de Osma) - Altos del río Abión

11 d'Agostu de 2023

Track: La Güera (Tierras del Burgo de Osma) - Altos del río Abión

Terminamos los díes deportivos de vacaciones per Soria, con un últimu patéu pela contorna del ríu Abión, nes cercaníes del Burgo de Osma. Pa ello, averarémonos hasta la puente La Güeria, nel ríu Ucero, onde tendremos dellos apartaderos pa dexar el nuesu vehículo y termina una vía senderista que percorre tol ríu dende'l pueblu, mui usáu pelos habitantes del Burgo.

Dende l'entamu na Güeria (898m ) la talaya de Uxama siempre presente

Nun son les 9 la mañana y ya entamo a caleyar dende la puente, garrando un senderín al llau de los cartelos del GR86, anque'l nuesu destín sedrá dir ganando tola amplia arista del Lomero, per esti senduru hasta una mayada, onde empataremos con una amplia pista. Tol camín, fadrémoslo siempre coles vistes al otru llau del ríu Ucero, de la talaya d'Uxama, que ya visitara en dalguna patéu otros años.

 

Subimos tranquilamente hacia'l Lomero per senderu y pista finalmente

Continuaremos pista alantre hasta xuntanos col GR86 al altor de la Mina, de lo que supongo que pertenecerán un montón de restos d'edificaciones que voi mirando, de camín al vértice xeodésicu que corona'l monte Lomero de 1036 m, onde faigo semeya y empobínome hacia la Talaya de Lomero, primer puntu d'interés cultural d'esta ruta.

 

Vértice del Lomero (1036 m) y Talaya de Lomero

Magar d'esfrutar de les vistes dende la talaya hacia tierras de Gormaz, col so castillu presente doi pelín de media vuelta pa garrar de nuevu'l GR86 que fadráme caleyar con calma pela Cañada Real Soriana hasta Peñas Altas, onde abandonamos la pista principal pa baxar per un senderu evidente hacia'l valle del ríu Abión.

 

Baxaremos al ríu Abión pa cruciar la so puente y entamar ascensu hacia Valdenarros

Una vegada que tamos al empar del rigu Abión, podríemos hasta pegar un chapuzón enantes de continuar, pero siguiré hasta l'antigua y guapa puente onde cruciaremos, pa salir xustu enfrente per una pista al llau d'una finca que va llevanos hacia les antenes y talaya de Valdenarros. Otra posibilidá, si nun tenemos ganes d'ascender más montes, sedría acortar pel valle del ríu Abión, onde toparemos un guapu camín que percorrerá tol valle, siendo ésta un opción bien prestosa de conocer tamién.

 

Ascendemos a la Talaya de Valdenarros pa siguir camín tol monte la Pedriza alantre

Nós, vamos xubir hasta la talaya de Valdenarros, la cúal nun conocíemos, así que dempués de la visitina, continuaremos cordal alantre, per esti monte de la Pedriza, pasando per varies antenes pa dir descendiendo hacia la ermita la Magdalena, siempre cola vista puesta nos paredones de los Ojos del Bú, na otra vera'l ríu Abión.

 

Guapes vistes a los Ojos del Bú y el castillo de Osma

Siguiremos un pelín en descensu, dando vista al fondu tamién al Castillo de Osma, dominando tol pueblu homónimu y la hoz del ríu Ucero, cola talaya de Uxama xustu enfrente. Nel intre, tamién damos vista a tol Burgo de Osma, siendo un caleyar bien guapu, hasta topanos cola ermita la Magdalena, que dexamos a la nuesa mandrecha p'ascender a la Cruz del Siglo, onde tendremos el puntu de meyores vistes.

 

Baxamos hacia l'amestaura de los ríos Abión y Ucero, pa continuar per senda hasta'l Castillo de Osma

Nesti puntu, decido descender de la cruz per l'arista Este que tien delles trepaduques nun tarrén entreteníu, anque podemos escaecer esta opción, baxando tanto a la ermita como hacia'l ríu Abión, aportando esáutamente al mesmu puntu, onde les meyores poces pa bañase del Abión. Dende equí, siguiremos a l'amestadura col ríu Ucero y continúa pela senda peatonal, hasta la baxera del castillo de Osma, al que doime cuenta que nun lo conozo y decídome a xubir a facéi una visitina.

 

Visitamos el Castillo de Osma, reciéntenmente remocicáu en parte

Si nun tenemos ganes de más ascensos, podemos siguir tol ríu Ucero alantre hasta dar cola puente la Güeria, pero la visita al castillu prestóme abondo, viendo que les obres que ficieron nos últimos tiempos ameyoraron el so aspeutu munchu y dar un paseín pente les sos muries paga la pena. Fadremos toles vueltes posibles pasando per tolos requexos del castillu y saldremos per detrás, pa continuar hacia'l GR qu'asciende al Lomero, pero garrando un senderu a media altura.

 

Faldearemos el monte Lomero penriba del cañón del Ucero hasta aportar a la Güeria de nuevu

La última parte será tamién prestosa, con vistes atrás al Castillo de Osma y Burgo de Osma, como a la talaya de Uxama y sobretou baxo nuesos pies diremos dominando tol cañón del ríu Ucero, alcontrando siempre senderu penriba de los cortes del cañón hasta pasáu una antigua cantera, garrar senderu de descensu hasta la puente la Güeria onde zarramos esta circular prestosa alrodiu del ríu Abión y los sos montes.

Dempués del día "picante" anterior, na ruta per Paones, esta vegada completamos esta circular de 12 km y +/-340 m de desnivel en malpenes 3 hores, qu'amuésanos tol interés cultural y montañeru d'esta fastera soriana, pudiendo completar la mañana como non, con un vermú nel Burgo de Osma, con torreznos de másima calidá asegurada.

Camudando'l Camín per tierres de Osma