10 d'Agostu de 2023
Track: Paones (Berlanga de Duero) - Hoz de la Peña Miguel - Hoz de Fuente del Lobo
Dempués d'un día de descansu tiraos tol día na piscina por mor del calor terrible que fizo, al día siguiente con temperatures un pelín más afayaices pa caminar, volvíemos a planificar una ruta pela comarca soriana de Berlgana de Duero, averándonos nesti casu al pueblu de Paones.
Esta vegada, nun díbemos atacar otru vértice xeodésicu na nuestra ruta, sinon que teníemos l'envís de conocer un par de foces na redolada d'esti pueblín de Paones. La verdá ye que mirando mapas d'esta fastera sorprendióme'l relieve y nun lo pensé, restolando por wikiloc y alcontrando rutes na zona, poro camentamos que sedría tarrén transitáu.
Saldremos de Paones y en malpenes mediu kilómetru de carretera en direición Berlanga de Duero, atoparemos el camín en Fuente Concejo, que va dir llevándonos a la foz de Peña Miguel. Como ye normal, los primeros metros son por ampliu tarrén, sorprendiéndonos un pelín, la falta de senderu claru lo que nos tien restolando'l meyor trazu que nos faiga dir llibrando las aliagas y demás plantes pinchantes y pelín urticantes.
Pesie a la falta de senderu, la foz tien puntos perinteresantes, guapes formes de les peñes y parés verticales, adentrándonos na espesura de la foz y zarrándose este enriba nuesa hasta llegar al puntu, nel que la vexetación nun mos dexa avanzar y tenemos que buscar una salida hacia la parte alta, alcontrando una vira bien guapa ya interesante que nos amosará vistes mui guapes de tol cañón.
Dempués de la escapatoria a la manzorga la foz, diremos caleyando esfrutando de les vistes del cañón y de pasu escaparemos del picor continuu de pates que fue la travesía pelo baxero. A estos altores, Miguel ya diba repunando, tando menos avezáu qu'un servidor a estes xeres de bregar pel monte, asina qu'esfrutaremos de los miradores na parte alta del Hoz, no que sedría Cueva Cil y decidiremos empatar col cañón de vuelta, ensin descender de nuevu hasta'l tramín final, ya que nun consideramos que pagase la pena.
Fadremos la travesía pasando pela mayada del Pedregal, alcontrando senderos y empatamos fácilmente cola pista que vien dende Berlanga de Duero, nomada como'l Camino de Noguerales. Lo que nun contaba ye con alcontranmos con una zona de bulder namás topar el camín, viendo les marques de magnesiu con varios bloques de cierta altura.
Caleyaremos felizmente pel camín de Noguerales, viendo marques de GR, pero bien ceo, Miguel cambiará la cara al ver que tenemos qu'abandonar esti cómodu camín, que tamién llevaríanos a Paones de vuelta, pero nós tenemos que salir a la manzorga pa conocer la Hoz de Fuente Lobo, na que si alcontramos traza de senderu y delles costrucciones ganaderes, poro tenemos claro que ye un cañón munchu más transitáu que l'anterior de Peña Miguel.
La verdá ye qu'esta vegada vamos percorrer cómodamente tola foz, esfrutando de ciertos llugares, como la cueva del Ojo y recordándonos bastante a la foz de Fuente Arenaza, que tantes vegaes usamos pa entrenar corriendo, poro esta Hoz de Fuente Lobo, va ser muncho más amigable y disfrutona, decidiendo na so parte final, xubir hacia'l Ruidero, pa evitar caleyar per carretera con esti calor dellos kilómetros.
Sin mayor dificultá, bregaremos un pocu de monte a través pel Ruidero, hasta salir a un camín, que ya va llevanos hacia Paones en descensu, p'aportar al pueblu xusto antes de que'l calor apriete de verdá, anque a dicir verdá tuviemos una brisa agradable tola ruta que fizo baxar la temperatura ambiente.
Con 3 hores y cuartu de ruta, per tarrén muncho más montuno que nes rutes anteriores, terminábemos los 12,5 km con +/- 215 m de desnivel y nun me quedaba otra, qu'invitar a unos torreznos en Berlanga a Miguel y llevarlo a meter les pates arañaes y enllenes de picotazos de las aliagas a las Fuentes de Quintana, onde tuvimos un bon ratu de bañu y masaxe.
No hay comentarios:
Publicar un comentario