1 d'Ochobre de 2023
Track: Pigüeces (Somiedu) - Picu'l Rubiu
Alborecemos una vegada más en Viḷḷar de Vildas, nel conceyu Somiedu, cola idega de zarrar los cuatru díes de monte, baxando un pelín pel vaḷḷe'l Pigüeña, hasta'l pueblu de Pigüeces, onde quedamos con dellos componentes más del grupu monte. Atrás quedaron, tres díes perbon monte, meyores fartures pa cenar y unes sensaciones non tan males como albidraba, pa llevar alantre la temporada montuna.
Pente pitos y flautes, retrasámonos un pocu, recoyendo y almorzando y cuando llegamos a Pigüeces, ya lleven un ratín esperando los collacios, xuntándonos pa la semeya a la entrada'l pueblu y entamando a caleyar peles sos cais a les 10 y media la mañana.
La ruta de güei va llevanos a ascender el Picu'l Rubiu, siendo esti cumal, l'últimu vértice xeodésicu de Somiedu que quédame per conocer. Esti monte, enmediu d'un tarrén bien xabaz de Somiedu ye un gran mirador y la so circular ye perfeuta pa una mañana, asina que saldremos con xeitu caleyando hacia la braña Pigüeces.
El camín, perfeutu pa calecer músculos, llevarános baxo la solombra de los ablanos y per un camín cómodu, a tramos de tierra y a tramos empedráu, durante pocu más de dos kilómetros a la vera la riega la fonte L'Alba, hasta topanos coles bien conservaes cabañes de la braña Pigüeces.
Dende la braña, garraremos un camín a la manzorga, que va facenos entrar na fastera la fonte'l Bisveiru, per onde diremos avanzando n'amplies envueltes, siempre per monte baxo, con dalgún tramín de cotoya, pero sorprendiendo lo abiertu y calteníu del camín, hasta dar a la collada sur de l'arista del Picu'l Rubiu (1205 m).
Dende la collada, tendremos amplies vistes hacia los montes del valle Somiedu y tamién hacia los montes de Tinéu, como'l so cumal más altu Pena Filera, pero la vista, vásenos hacia l'Altu'l Vildéu, al que ya conocemos, pero que'l color de les viesques de la Enramada, nos pide volver, así como a la xerra de Pigüeña, que tamién tráenos grandes alcordances.
Llueu de garrar aliendu, continuamos la llarga arista sur, pela que diremos avanzando caún al so ritmu, faciéndose un pelín cansada pa Benjamín, pero va ganándo-y'l pulsu pasín a pasu, p'algamar el cumal de 1395 m toos xuntos y cellebrar el so cumpleaños y la so vuelta al monte col grupu, llueu del accidente ivernal na Pena L.lana de munchos meses atrás.
Con dos hores y media de patéu y cola mente puesta n'intentar xintar un menú en Balmonte, entamamos el descensu hacia l'Altu'l Rubiu, collada norte d'esti monte, hacia'l que baxaremos ensin mayor problema, esfrutando del ñacimientu a la nuesa mandrecha d'un fayéu preciosu que baxa hacia'l valle la Trapa.
Dende l'Altu'l Rubiu, cuéstanos un pelín alcontrar el senderu que baxa per tolas Machadas, que nun ye otra cosa que delles pindies vallines de monte baxo que tienen qu'averanos hacia la Fonte'l Robléu, pero llueu de dellos metros pelín cotoyeros ya alcontramos el senderu que va faciéndonos baxar en pequeñes envueltes rápidamente hasta esta fonte'l Robléu, onde axuntarémonos toos pa enfrescanos ante'l calor que tamos sofriendo na baxada.
Llueu d'enfrascanos y garrar agua, ya baxamos más cómodamente hasta la pista que vien de la braña La Fana pa empatar col camín que xubía hacia la Braña Pigüeces, faciendo'l restu del camín a la solombra, más relaxaos hasta entrar de nuevu nes cais de Pigüeces.
En resume, zarramos cuatru díes de patéu, con esta guapa circular al Picu'l Rubiu, que sorprende polo guapu'l monte y el so asititiamientu privilexáu, faciendo un total de 8, 5 km de percorríu, con +/- 805 m de desnivel acumuláu nun total de 4 hores y 20 minutinos.
No hay comentarios:
Publicar un comentario