Track: Aguinu (Somiedu) - Altu'l Vildéu
En plenu X aniversariu y con tola ilusión del mundiu, alcontrámonos con un día mui d'esta seronda, terrible en cuanto a meteo, con lluvia intensa, humedá brutal y fresquín en cuanto a temperatura. Sicasí, tamos con ganes y como tiempu de tar nel chigre o nesti casu nel albergue, ya tendremos, decidimos recortar la travesía planiada y averámonos al pueblu somedán d'Aguinu col envís de facer una pequeña circular y conocer un pelín esta fastera anque toque moyase.
Perpasamos Aguinu pa siguir per camín hasta la braña Reconcu
Dende esti guapu requexu, anque pelín sombríu, sobromanera colas penas Albas más bien prietes de la lluvia, saldremos n'envueltes hacia lo alto'l cordal, alcontrándonos con tramos perembarraos y con dellos momentos de xarabatos que casi nos faen abandonar. Un árbol, onde somos a abelluganos un ratín, sedrá'l puntu d'inflesión, dándose la vuelta un par de compañeros y decidiendo siguir el restu, pa ver si somos a facer cumal nel Altu'l Vildéu.
Ascendemos pelas Cuestas hacia l'Altu'l Vildéu
Pa ello, siguimos xubiendo hacia'l cordal polas Cuestas, pasando de pista embarrada a senderu per monte baxo, avanzando más apriesa hasta aportar a una collada onde ya tenemos a tiru l'Altu'l Vildéu, sinon fuera pol fuerte vientu qu'azótanos xabazmente. Tán sólo tendremos que travesar una viesca dalgo más protexíos del vientu y salir a un tramu de brezu altu, que va danos camín hacia'l cumal pente les ventoles furioses.
Cumal del Altu'l Vildéu (1545 m)
Por suerte, anque'l vientu nun para nel cumal, la lluvia déxanos vivir un ratín, saliendo l'arcu la vieya pa dar un toque épicu al momentu. Son d'estos díes nos que presta pola vida compartir monte col GM Xuan de la Borrina. Tamos empapaos, pero ente rises, facemos semeyes por turnos y con dellos rayinos de sol, envede baxar pel mesmu camín, decidimos aventuranos hacia una val.lina al oeste del cumal.
Descendemos a la col.lá Vildéu onde entama una baxada per viesca preciosa
Pa ello, descenderemos per senderu pente'l brezu hasta la guapa Col.lá Vildéu (1451 m) onde al arrequexaos pente los árboles decidimos parar a picar dalgo dempués de casi 2 hores y media de llucha escontra los ellementos. Menos mal, que llueu del descansín, vamos tener el premiu a les ganes de facer monte, alcontrándonos con una baxada increyíblemente guapa per esta val.lina de Monte Grande.
Siguimos ablucaos cola belleza serondiega d'esta viesca de la Val.lina
Facemos l'últimu tramu pegaos a la riega'l Ríu
Pente la fueya, les fayes, requexos enllenos de vida con regatos vamos descendiendo ensin danos cuenta y aportamos a la mecedura de dos riegues que formen la del Ríu, poro ya sólo tenemos que siguir dalguna sienda pegada al rigu que va sacanos a la braña Reconcu, llibrando maraviyósamente tol tramu de barru pel qu'ascendiéramos hacia Las Cuestas.
Empatamos a Reconcu pa descender cola calma hasta Aguinu
Con sensación de completar una circular guapa y llibrando'l día de la meyor manera posible, como ye facer monte xuntos, descendemos ya pol camín de nuevu hasta Aguinu, aportando al portal de la capiya xusto enantes de que punxérase a esbastiar de nuevu y pudiéndonos mudar la ropa baxo techu.
En resume, fastera a la que tengo mil ganes de volver pa conocer tol cordal que penriba de Monte Grande llevaríanos hasta'l pueblu de Perl.lunes. Nel intre, nós ficimos esta pequeña circular que durante 3 hores y 45 minutinos fízonos percorrer unos 7 km con un desnivel acumuláu de 700 m y conocer una pequeña parte d'esti monte que separa los valles del Somiedu y el Pigüeña.
Camudando'l Camín na seronda
No hay comentarios:
Publicar un comentario