Track: Bezanes (Casu) - Peña Les Príes
Como ye vezu, tornar a patiar pelos montes del parque natural de Reres, ye un placer y como ye vezu, siempre andamos restolando que viesques, riegues o cumales nun conocemos entá, poro, echo un vistazu a la carpetina de pendientes y anque siempre la tenía presente pa una ivernal, la peña Les Príes o picu La Senda diba tener la so visita.
Partimos dende Bezanes (655 m)
Pa ello, averámonos hasta'l pueblu casín de Bezanes, onde antaño ficiéramos salida en BTT hasta Brañagallones, pero que nunca nun mos diera oportunidá pa salir de monte dende'l so cómodu aparcaderu. D'esta miente, preparámonos y un pelín enantes de les 10 de la mañana cruciábemos la As-17 y el rigu Nalón, pa salir per pista ascendente hacia'l Carbayal.
Siempre per pista diremos caleyando sele hacia la riega Anciu
Pasaes les cabañes d'El Carbayal y al altor de la vega los Llanos, fadremos una envuelta pa continuar per bon camín hacia la riega d'Anciu, onde alcontrámonos un guapu requexu, per onde la riega embarranca pente la peña Castiellu y faldera del monte Anciu.
Siguiemos per guapu camín hacia'l cotu d'Anciu
Un par de guapes envueltes faenmos cruciar cómodamente la riega y continuaremos pela manzorga la riega metiéndose la pista nuna guapa viesca que crucia'l val de Los Llobos primeru y que sal peles Brañes a un ampliu mayáu como ye'l cotu Anciu, que dará pasu a la so fastera superior onde les cabañes en bon estáu, nos darán amuesa d'un bon usu ganaderu d'esta fastera de Casu.
Saldremos del cotu Anciu hacia la xerra Degollada
Diremos de primeres per camín hasta'l final del cotu, pa camudar el sen norte pol este, garrando'l meyor senderu que veamos hacia la xerra Degollada, que nos fadrá trabayar pel so monte baxo hasta'l collaín del Ñeru, onde tendremos guapes vistes del Requexón de Valdunes.
Garraremos la panda que tien de llevanos hasta les Príes
Dende esti colláin nel que garramos un pelín d'aliendu, siguiremos la cresta primeru pa pasar a una panda, per onde diremos trazando l'ascensu más llimpiu de broza. Les vistes van abriéndose según ganamos altor, hasta que damos pasu so los 1707 m d'esta peña Les Príes, picu La Senda ya incluso téngolo sentío como'l Porrón.
Cumal de les Príes (1707 m)
Les vistes ábrense como ya dixe, pero'l día nun ye'l más afayaizu pa les semeyes, aún así, préstame pola vida acolumbrar dellos montes, como'l picu Cornielles o la foz de Melordaña cola la Becerrera que lloñe de montes más visitaos de Reres, faen unes rutes ablucantes per llugares pernecesarios de visitar.
Crestiamos hacia la Peña Valdunes con guapes vistes del valle Capiella
Como siempre, toles rutes tienen tramos colos que nun contamos, llugares de fonda belleza que nel intre, alcontrarémoslo na baxada pela arista NO hasta la Peña Valdunes (1536 m) onde les cayíes al valle Capiella, xunto colos collores del Monte Valdunes son una pasada.
Baxada increyible hacia la vega Llagos
Dende la Peña Valdunes, onde tamos un bon ratín esfrutando de les vistes descenderemos per una viesca perguapa hacia la Vega Llagos. Como ya dixi, son pequeñes coses que faen qu'una ruta puea quedar reonda y baxar pente la fueya colos collores de la seronda na so másima espresión, fue esa plizca de suerte que ya dió, pela mió parte, el puntu final a la xornada de monte.
Siguimos el descensu pelos Argayos hacia Sotu
Dicir que taba ya na llende del dolor, ya que ficiera tola ruta con una infección nuna dea y decidí non xubir al Requexón, cosa que dos collacios ficieron, acompañándome'l restu del grupu, dende Llagos pelos Foyos pa siguir pela collada Bilaña hasta los Rebollos onde garramos un claru camín, qu'al traviés de los Argayos nos fadrá descender hacia Sotu.
Enllazamos per caleyes y praos dende Sotu a Bezanes
Dende Sotu siguiremos un claru camín, hasta dar con un portiella, onde cruciaremos un prau pela parte alta, siempre hacia unes cabañes, pa garrar otra caleya que nos llevará sin fallu hasta'l crucie d'El Carbayal per onde ascendiéramos delles hores enantes.
En resume, ruta completina, muncho más si facemos tamién el Requexón, que nun total de 7 hores aprosimadamente, daremos preste a 15.5 km con un desnivel acumuláu positivu de 1220 m pa conocer como non un pocu más d'esti conceyu de Casu que siempre tien dalgo más que descubrir.
Camudando'l Camín en Reres
No hay comentarios:
Publicar un comentario