Track: L.lau (Babia) - Pena Gracheira - La Crespa
Día raro, ya que me duermo pa dir de monte y tengo que salir d'Asturies a fueu cola furgo, col envís de xuntame a mis compañeros del GM Xuan de la Borrina que salieren mínimu una hora y media antes. Así que toca recalcular la ruta y plántome en L.lau na Babia llionesa.
El grupu saldría dende la carretera que va pa Piedrafita, engolándose bien ceo a la llarga arista de la Pena Larga, poro demientes facíen este monte, dábame tiempu a facer el viaxe hasta L.lau de Babia, anque nun tuve tiempu nin a almorzar daqué.
Salimos de L.lau (1350 m) en Babia
Dende ellí, saldría con Kíla cola calma aportando hasta'l llagu (l.lau), onde tuve tiempu a parar na mayada de Puñín demientres la perrina dábase un bañu y siguir penriba'l llagu hasta una collada con baxada per pista hacia Cacabillu, onde decidí, que lo meyor yera echar una siesta demientres el grupu desdencía de la pena Larga.
Ascendemos per carretera hasta'l L.lau de Babia
Cuando aporta tol grupu, magar de los saludos y los que pasó Bertín, pues siguimos toos xuntos ascendiendo hacia l'arista de la Pena Gral.leira. Nun tien denguna dificultá, más qu'esfrutar de les rares vistes d'estos montes de Babia y de Somiedu más al norte. Dende esta fastera cuéstame conocer dellos montes, pero'l Muxivén algama tol protagonismu, apeteciéndome munchísimo conocelo, pol so porte solitariu enmediu de tola plana.
Ascendemos hacia la Gral.leira ganando vistes a dosmiles de Babia
Según vamos ganando altor, tamién pinten perbien, montes como la pena Orbia o el picu Salgueiru y ye que la cantidá de dosmiles nesta fastera faen bien atrautivu averase hasta la Babia pa facer monte, anque hai que dicir que son montes allombaos dafechu, perafayaizos quiciás, pa la dómina ivernal.
Siguimos avanznado hacia l'arista de la Pena Gral.leira
Siguiremos ascendiendo, pasando pela pena Puñín y ganando tola arista, camudando'l so calter herbosu, con vistes hacia la Pradera que baxa pal valle'l Sil, por un crestéu más calizu con vistes hacia'l L.láu, hasta qu'aportamos a los 1931 m de la pena Gral.leira.
Cumal na Pena Gral.leira (1931 m)
Tamos nel oxetivu del día pal grupu monte y los collacios que lleven más tiempu de patéu que yo, deciden quedase a xintar. Yo, como casi siempre, nun llevo nin comida, poro decido allargar el mió paséu y cola compaña de Kíla, salimos arista alantre corriendo hacia l'Este col envís d'ascender a fueu a la cercana cume de la Crespa.
Averámonos hasta l'averáu cumal de La Crespa
Descenderemos apriesa, per un tarrén superentreteníu a tramos ensin senderu y aportaremos a la mayada la Muesa que percorremos corriendo, averándonos hacia la fastera norte de la Crespa, onde al altor d'un colláu (1891 m), entamaremos tol guapu crestéu hacia la parte cimera de la pena.
Kíla corriendo pel cumal de la Crespa (2057 m)
Tengo que dicir qu'esti picu La Crespa, si ye un monte bien guapu na so fastera Este, con una cayida sol valle de Fuenfría perinteresante y qu'ensin dubia, paga la pena conocer nuna ivernada. Dende lo más alto (2057 m), somos a acolumbrar esi marabayu de cumales de más de dosmil metros que formen esi pequeñu macizu del Montigüeiru, que nun va munchu tiempu yeremos a encumar na so dómina más atrautiva.
Descendemos de la Crespa hacia la fonte Michán
Dende'l cumal, ensin referencies tirámonso la perrina y yo nun descensu a pinchu, primeru yéndonos un pelín hacia'l sur hacia las Corradas y llueu baxando per un tarrén amestáu de yerba y peña, hacia una amplia mayada con fonte, la de Michán, pa ya garrar descensu más marcáu per seneru, axuntándome al altor de la riega homónima col restu del grupu que baxaba entá dende la Gral.leira.
Aportamos de nuevu al L.lau cola Pena Larga de fondo
El restu'l camín sedrá ya bien cómodu per pista, aportando con ganes d'una cervecina a L.láu, acompañándome en furgo Jenny, demientres el restu del grupu, fai camín per cómoda pista hasta'l puntu kilométricu 88 de la C-623 onde aparcaran los coches.
En resume, ruta un pelín sosa nun dómina tan seca del añu, pero que pa facer n'ivernal, son montes que se dexen bien, nel que trabayar col piolé y los crampones per estes pandes faigan que los 12 km de percorríu y los 800 m desnivel acumuláu seyan defechu, un disfrute total durante les pocu más de 6 hores nel nuesu casu.
Camudando'l Camín cola perra de mirada aviesa
No hay comentarios:
Publicar un comentario