viernes, 27 de marzo de 2020

X Aniversariu GM Xuan de la Borrina

1, 2 y 3 de Payares de 2019

Díez años va qu'un grupín de collacios decidimos formar un grupu de monte pa salir a conocer más Asturies, pa patear cada quince díes, pa dexar otros deportes como'l futbol o simplemente pa dexar de salir los sábados y aprovechar la vida d'otra manera.

Nestos díes años, fueron camudando les nueses vides, la mía centróse dafechu nel monte, la escalada, les carreres y en llevar un tipu de vida averada a la llibertá y la vida un pelín más nómada. Otros, tuvieron casáronse, fíos, empreses, trabayu... pero si pa dalgo valió formar esti grupu, fue pa tener una escusa cada 15 díes pa intentar venos y esfrutar de la nuesa afición. 

Escoyemos el valle de Saliencia en Somiedu pal X Aniversariu

Muncha xente fue pasando pol grupu, unos nun volvieron más, otros col pasu los años tornaron dempués d'un parón, dellos entraron y fixéronse imprescindibles. La tónica d'estos años fue'l continuu evolucionar, aportando toos dalgo nuevo, ilusion, ganes, motivación...

Tamién, otru puntu importante del nuesu grupu, ye la rellación casi dende l'entamu con Fernan y el Baskonia Mendi Taldea, que tantes grandes actividaes aportó, dende les mítiques traveseres per Picos hasta la Xuntanza anual ya fuera n'Euzkadi o n'Asturies.

Primer día de monte hostil per Somiedu

Esti añu, por ser diez añinos de vida, colos que nun sabíemos munchos de nós, si díbemos contar, quiximos cellebralo, yéndonos tres díes hasta'l conceyu de Somiedu onde tantes grandes rutes pudimos facer y que meyor llugar pa xuntanos que nel albergue de Saliencia.



Enantes de dir al valle, pudimos entamar l'alcuentru d'aniversariu, faciendo una ruta nel entornu de la Pola, onde pudimos "esfrutar" de la meteo serondiega que llevábemos sofriendo en tol so esplendor, colo que la moyadura y el vientu alloriáu fueron los verdaderos protagonistes.


Magar de la ruta, tocaba parar pela Pola de Somiedu a tomar una cervecina, despedir a dellos collacios que tornaben a casa y saldríemos ya direición Saliencia, col envís de danos una duchina caliente y preparanos pa la cena y el cacharréu a lo postreru con milenta anéudotes d'estos diez añinos.

Al día siguiente, almorzamos como señores, pa quitar un pelín el clavelín de los cacharros y viendo que tenemos un día muncho meyor que'l día anterior, ponémonos en marcha con ciñu, col envís d'intentar facer una ruta curiosina.

Segundu día más afayaizu esfrutando munchísimo

Pa ello, averámonos sele hasta'l pueblu de Arbichales, dexándonos cayer valle abaxu pa salir caleyando conociendo foces, montes, brañes, caminos bien guapos, unos vieyos na nuesa conocencia y otros recién descubiertos.


Magar de la ruta, ún día más, tenemos toes les facilidaes nel Albergue pa descansar, danos una duchina y tamién tol tiempu pa pasiar pel pueblu, tomar dalgo nel otru chigre y una vegada más, xuntanos cola calma a charrar y facer alcordanza sobretóu de les rutes feches per esta fastera somedana.

Últimu día en plena ivernada averámonos hasta los llagos de Saliencia

Al día siguiente, alborez con una ñevadina pelos altos que dexen si cabe, más guapu'l paisaxe somedán. Nun podemos facer otra cosa, qu'almorzar y xubir hasta los llagos de Saliencia a dar un paseín enantes que la seria ivernada que tien de venir, atrápenos en pueblu.


Poro, paseín, semeyines, un cervecín pa despedinos de los collacios del Albergue de Saliencia y salimos de Somiedu hacia Balmonte, onde tendríemos la xinta de pieslle del X Aniversariu, n'otru llugar onde nos sentimos como en casa y que tantos almuerzos enantes de dir de monte tuviemos nestos años: el Hotel Cela.

Cellebrando'l pieslle del X Aniversariu

Cola fartura d'una bona xinta, la entrega de los regalinos y col sentir de facer bien les coses, colamos del conceyu Miranda caún a les sos cases, hasta la próxima ruta que como siempre nun sabemos onde sedrá nin lo que vamos conocer, porque seguiremos llevando'l grupu al nuesu xeitu, cola improvisación por bandera.
Mil gracies a los enfotaos organizadores, a los participantes nos distintos díes, a Fernan y Bittor por venir dende Euzkadi, a los que nun pudieron venir, a los qu'esperemos que vuelvan al monte, a los que formaron parte del grupu y a los que formarán parte d'esti grupu de collacios tamién.

No hay comentarios:

Publicar un comentario