viernes, 13 de marzo de 2020

Puirtu Braña (Ayer) - Picu Torres - Puertos de Cotorgán - Rufresnu - Cuevas (Ayer)

30 de Setiembre de 2019

Track: Puirtu Braña (Ayer) - Picu Torres - Puertos de Cotorgán - Rufresnu - Cuevas (Ayer)


Tornamos al Torres, magar de más de 10 años dende la última visita y taba claro que tocaba da-y una vueltina de tuerca a la ruta, escoyendo esta vegada facer una travesía dende'l Puirtu Braña hasta'l pueblu ayerán de Cuevas.

Partimos del Puirtu Braña (m) como tantes vegaes

Nun ye nada novedosu, ya que muncha xente tien fecha la travesía hasta'l pueblu de Caliao, pero esto desendolca nun traxín de coches que fae más pesada la loxística, que la propia ruta, poro quería desdexar esta opción pa esfrutar al másimu del monte ensin fadianos a kms de coche y finar la ruta en Cuevas yera perfeutu.

Facemos l'ascensu hasta la Ventanona cola vista puesta nel Torres

Asína que facemos la mítica ascensión hacia'l colláu la Ventanona, pegaínos primeru al rigu Isoba pa dir llibrando pela más llimpiu d'urcies hasta aportar al mayáu Torres, onde como non, les vistes del picu son brutales y onde decidimos bordiar un pocu hacia la Carba Torres pa entrá-y a la Ventanona pela mandrecha pudiendo esfrutar cola calma d'esta pequeña ayalga en forma de furacu na peña.

Ascensu más cenciellu de lo que remembrábemos d'antaño

Dende la collá la Ventanona, namái que tendremos que siguir senderu hacia l'arista Este del picu Torres, xubiendo pela normal, a la solombra de la cara norte y llueu encaramámonos na propia arista pa soleyéramente ganar el cumal del Picu Torres.

Na mió primer ascensión al Torres, llevábemos mui pocu nel monte y alcuérdome que les poques trepaes diéranmos un pocu que facer pero col pasu los años, daste cuenta como van camudando les sensaciones y lo que yera casi un retu, anguaño ye un paseín ensín denguna dificultá.

Cume nel Picu Torres (2104 m)

Taremos un ratiquín acolumbrando montes en toles direiciones y esfrutando del paisaxe y bien ceo, decidimos siguir alantre, averándonos al propiu camín d'ascensu pa enantes d'empobinanos hacia la ventanona siguir de frente pela arista norte col envís d'averanos hacia Los Fueyos.

Descendemos hacia'l Picu Los Fueyos pela fastera norte del Torres

Esfrutaremos un montón de la guapa senda que baxa del Torres pela fastera norte, entrando nos Fueyos, pelos que caleyaremos primero con vistes hacia la faza ayerana y llueu perpasaremos a la faza casina, dando vista a la llaguna Caballuna que tantes ganes tenía de conocer.

Perguapu paséu conociendo la llaguna Caballuna y puerto de Cotorgán

Con esti increyible paisaxe descendemos hacia la llaguna, estrada de ganao y decidiremos picar dalgo, enantes de siguir camín hacia'l Pandu Braña Callina, onde siguiremos con guapes vistes de los puertos de Cotorgán, cola vista puesta na siguiente collada nel mayáu Castiellu.

Tramu perabegosu pente'l mayáu Castiellu y la collá la Tabierna

Hasta equí, el nuesu camín fue prestosu, seliquino, lloñe de denguna dificultá nin téunica nin d'orientación, pero dende esti mayáu pudimos albidrar que'l senderu diba travesera una fastera de broza perintensa, na que tuviemos que dir bregando y ganando pasu durante 3kms hasta aportar casi al colláu la Tabierna.

Interesante descensu pela foz de Rufresnu

Ye una pena, porque'l senderu está perclaro, pero la llucha coles urcies ye a muerte, jeje, sicasí, pasáu esti tramu, tornamos a esfrutar del camín, siguiendo esta vegada hacia la foz de Rufresnu, per onde vien el GR de les brañes ayeranes, lo qu'amuesa que tornamos a un camín perandáu.

Facemos el tramu final pela guapa viesca del Tayu

Dempués del pindiu y calurosu descensu per Rufresnu, metéremos nel monte Tayu, onde tendremos un caleyar relaxáu a la solombra, conociendo dellos requexos de bona guapura nel restu del descensu de braña en braña, hasta aportar a Cuevas, xusto al altor del seutor d'escalada de la Fuente.

En resume, perguapa travesía, na qu'aparte d'ascender a un de los grandes montes d'Asturies, vamos conocer mayaos, llagunes y brañes de gran valir, si ye que'l desaniciu ganaderu y rural del país, nun fae que la broza tome tol monte, dexándonos ensín poder esfrutar de los nuesos paisaxes. Pa ello, los casi 20 km de percorríu, los 840 m de desnivel positivu, 1600 m de negativu y les 9 hores de patéu son más que necesarios.

Camudando'l Camín aportando a Cuevas n'Ayer

No hay comentarios:

Publicar un comentario