Track: Arbichales (Somiedu) - Güergola - Pena Prieta - Arroxos - Saliencia (Somiedu)
Continuamos cellebrando'l Décimu Aniversariu del GM Xuan de la Borrina y magar de moyanos enforma na ruta al Altu'l Vildéu güei alborecíemos con un día ñublu pero ensin precipitaciones, poro les ganes de patiar y esfrutar del monte yeren munches.
Magar del bon almuerzu, preparámonos col material ya insertámonos nun par de coches como podemos, col envís d'averanos hasta'l cercanu pueblu d'Arbichales onde queremos entamar la nuesa travesía. Ésta, va llevanos dende Arbichales hasta Saliencia, conociendo dos foces, varias brañes y ascendiendo a la Pena Prieta que ya ficiéramos va delles temporaes.
Preparaos n'Arbichales (1031 m) pa salir al monte
De primeres, salimos d'Arbichales empobinándonos pueblu arriba hacia la foz de la Güergola, primer puntu de gran interés de la nuesa ruta. Ye más, conózco tol restu del camín, pero esta foz, que sorpréndenos pola so guapura y pol gran trabayu fechu nel camín, nun la conocía entá, asína que la vamos esfrutando pasín a pasu.
Conocemos la guapa y bien trabayada foz de la Güergola
Saldremos de la foz, casi faciéndosenos curtia y les opciones de patéu amplíense. Si quisiésemos dir peles brañes baxes, podríemos averanos hasta la braña la Güergola y continuar per bon camín hacia Saliencia, pero nós, preferímos continuar l'ascensu hacia la braña de Murias, ún de les meyores conservaes y llueu de les semeyes de rigor, siguir ascensu hasta la braña más nomada de Somiedu, la de la Corra.
Paseamos poles brañes de Murias y la Corrá
Durante l'ascensu, ya desdexáremos averanos hasta la pena Michu, ya que como siempre, nestos eventos, el componente social ye tan importante como'l montañeru, poro nun queremos estendenos muncho na ruta, pa poder tar de chigréu y charrar cola calma enantes de la cena.
Típica bregada col brezu p'ascender a la Pena Prieta
Saldremos de la Corra siguiendo pela braña Cuérragu y equí como siempre, toca bregar y restolar cual ye'l meyor camín p'algamar un ascensu mediu llimpiu a la Pena Prieta. Unos consideran dar más vuelta hacia l'Altu'l Cuernu y yo tiré más de frente hacia'l Cuetu Chubisnera, pero ya sabemos que nun hai atayu ensin trabayu y tocóme bregar con urcies y brezu al altor del pechu más menos.
Cumal de Pena Prieta (1834 m)
Na cumera'l cordal, axuntarémonos el grupu y en filera diremos avanzando de finxu en finxu, hasta algamar el canalizu d'ascensión al cumal de Pena Prieta (1834 m). Como vamos sobraos de tiempu, vamos de peña en peña a la gueta del puntu más altu, pero como ficiéramos va dellos años, el cumal de la Pena Prieta, ye'l primeru de toos, poro sacamos la semeya como meyor podemos.
Descendemos hacia'l camín real pa xubir hacia l'Altu la Granda Blanca
Coles mesmes, descendemos hasta'l colláu col Cuetu Chubisnera, pa restolar un senderín que nos faiga siguir hasta'l camín real lo más sele posible y somos más o menos a alcontralo, anque toca bregar en dalgún tramín qu'otru col brezu y les urcies lo que déxanos claro, qu'esta peña casi ye más afayaiza de xubir n'iviernu.
Caleyamos sele per col.laos como'l de la Madalena hacia la foz d'Arroxos
Una vegada que tamos nel camín real, tendremos un pequeñu ascensu hacia l'altu la Granda Blanca, onde podemos ver l'arista sur de la Pena Prieta y siguiremos cómodu camín hacia'l col.láu la Madalena. Tol camín real, sedrá d'un caminar sele, nel que vamos charrando de mil coses, esperando l'últimu gran puntu del día, como ye'l descensu pela foz d'Arroxos.
Descendemos pel monte'l Rebollar hacia Arroxos
Conociéramos esta foz nel ascensu a los Bígaros va dellos años, pero nel intre díbemos cola oreya llevantada, ya que dixéranmos la xente de Saliencia, que vieren nestos díes un bardión nesa fastera y aparte d'agüeyar la belleza de la foz díbemos escucando per tolos llaos por si viésemos mover dalgo nes canales que cayen escontra la foz.
Adentrámonos nel tramu más ablucante de los Arroxos
Nun tuvimos esa suerte, pero como final de ruta nun pudo ser meyor, ya que los collores de la caliza, los milenta saltos d'agua, los pliegues xeolóxicos d'esta foz y na parte final de la foz, la salida a la viesca ye d'una belleza brutal.
Camudamos la peña d'Arroxos pela maraviyosa viesca final
La verdá ye que finamos la ruta con una sensación de triunfada total, quedándose la xente a sacar semeyes y esfrutar del paisaxe con tola calma del mundu, tanto que dalgunos fuimos pali pali baxando a Saliencia, entrando per una guapa ponte y percorriendo'l pueblu enteru hasta l'Albergue de Saliencia, onde tomamos una botellina a la espera de que'l restu del grupu aportare al alcuentru.
En resume, perguapa travesía, cenciella en cuanto a la loxística, a la navegación y na que conoceremos dos foces perguapes, brañes en perbon estáu de conservación y na que podemos o non facer el cumal de la Pena Prieta, too ello, pol módicu preciu de 7 hores y 15 min de sele caleyar, nel que superamos un desnivel acumuláu de 1105 m nos pocu más de 16 km de percorríu.
Camudando'l Camín en Saliencia
No hay comentarios:
Publicar un comentario