Viḷḷar de Vildas (Somiedu) - Busteḷḷín - Fanarrionda - Lḷau Bonu - Ferviḷḷín

29 de Setiembre de 2023

Track: Vil.lar de Vildas (Somiedu) - Bustel.lín - Fanarrionda - L.lau Bonu - Fervil.lín

Continuamos pel conceyu de Somiedu, afitando'l campu base nel vaḷḷe del Pigüeña y más en concretu nel pueblu de Viḷḷar de Vildas, onde ya va munchos años ficiéramos un par de rutes al Cornón y al Cogoḷḷu Ceboḷḷéu que punxeran daquella, na llende, les nueses capacidaes físiques montunes, siendo rutes mui llargues tanto en kilómetros como en desnivel.

Pal segundu día de monte, dempués del patéu y ascensión al Monegru, Miguel decide descansar, a sabiendes de lo que teníemos per delantre y Mario, que llega con bien de ganes de conocer ese Somiedu desconocíu, preséntase al almuerzu pa tomar un cafetín y preparámonos pa salir sobre les diez y media la mañana.

 

Partimos de Viḷḷar de Vildas (858 m) nel Pigüeña

Tamos nuna selmana de fola de calor, pero'l día ta fresquín de momentu, asina que salimos caleyando pel valle'l Pigüeña alantre, como si fuéramos hacia la nomada braña de la Pornacal. Bien ceo, al altor del puente Los Cotaos, vamos garrar el ramal drechu, ascendiendo nun primer momentu per pista formigonada, pasando a camín de tierra llimpiu nun primer momentu, hasta alcontranos col camín pelín tomáu, penriba los praos previos al Castru, onde tenemos un animáu alderique con un vecín de Viḷḷar.

Penriba'l Castru del cuetu Tabláu, alcontrámonos con una pista en perbon estáu que vien dende'l puente Francibín y que ya ensin dengún problema, va llevanos al traviés d'un preciosu fayéu, hasta la braña'l Busteḷḷín, onde llueu d'una hora de camín, esfrutaremos de les cabañes de teitu vexetal con vistes al picu Fanarrionda, munchos metros d'altor penriba nuesa.

 

Pasamos penriba'l Castru pa entrar nuna preciosa viesca hasta'l Busteḷḷín

En Busteḷḷín, entamará'l nuesu particular retu, que ye alcontrar sienda que nos saque valle alantre hacia'l cordal de la Serrantina. El mesmu vecín del pueblu en Tabláu, díxonos que nun contaba que tuviera abiertu, pero salimos de Busteḷḷín con xeitu, averánonos hacia la fonte Isabelina, alcontrando dellos metros pembaxu d'ella, un senderu pente un felechal, que va llevanos hacia'l cantu drechu del valle, onde algamaremos sienda marcada y vistes hacia'l valle Cascarón y sobretou a tol valle'l Pigüeña, siendo una ayalga pa los güeyos.

 

Somos a dir pescanciando camín, navegando peles traces de senderu hacia'l cordal de la Serrantina

Tamos esfrutando munchísimu, siguiendo les traces del senderu más evidente, dándonos cuenta que nel Somiedu más ganaderu entá podemos alcontrar muncha vida, nos mayaos y brañes, dando vista a munches cabeces de ganáu hacia'l Campu Vildéu. El nuesu camín pel cantu pente los valles de Busteḷḷín y Cascarón, siguirá sin mayores problemes, pudiendo almorzar mores a cada pasu, saliendo a la parte alta, averándonos hacia'l mayáu de Tableiros, onde tendremos salida a los altos del cordal de la Serrantina.

 

Salimos pali pali hacia Tableiros onde damos pasu a la llende con Cangas del Narcea

Nel intre, garraremos un tramín de la sienda la Culebra, que ya percorriéramos va pocu tiempu, cuando xuniéramos l'Altu'l Cabril col Rabu d'Asnu, nuna xornada perllarga de monte. La nuesa idega yera dir hasta'l Cogoḷḷu Ceboḷḷéu, pero viendo les 3 hores y media que llevamos de ruta, decidimos que'l nuesu puntu más altu del día, diba ser el picu Fanarrionda y que lo que de verdá teníemos ganes de conocer ye tola sienda baxo L'Altu'l Cabril que diba llevanos hasta'l ḷḷau Bonu.

 

Cumal del Picu Fanarrionda (1884 m) mirador bien guapu de Somiedu y Cangas del Narcea

Poro, siguiremos sienda hasta'l Lḷanón onde entamará la continua ascensión hacia'l picu La Fanarrionda (1884 m), al que damos preste a les dos y media de la tarde, xustu 4 hores dempués de qu'entamásemos a caleyar. Con estos datos, sacamos semeya y descendemos un pelín p'alcontrar un mayaín onde decidimos parar a xintar, con toles vistes a tolos grandes montes somedanos, destacando a la nuesa mandrecha tol cordal dende la Peña'l Cabril hasta los Raxos pasando pol Cogoḷḷu Ceboḷḷéu.

 

Vamos conocer felizmente tola sienda'l Cabril dende Carbazosa al ḷḷau Bonu

Llueu del descansu, vamos descender hacia'l colláu Carbazosa, onde podremos descender per cómodes envueltes hasta pequeños mayaos, onde pastia sele ganáu vacuno, pudiendo conocer esta sienda'l Cabril, que como non, dirá colgada baxo los parés de la Peña'l Cabril y penriba de la braña del Ferviḷḷín, la cual vemos a vista de páxaru y a la que podríemos baxar direutamente per un llimpiu y cómodu senderu que quedará pa otra vista, ya que paezme perimportante que Mario conoza ún de los requexos más guapos de Somiedu como ye'l ḷḷau Bonu.

 

Visitamos, como non, el ḷḷau Bonu asitiáu nun llugar dafechu espeutacular

Pelín más d'una hora va llevanos la maraviyosa traviesa baxo'l Cabril hasta'l llagu, al que sólo velu dende riba ya paga la pena, pero la baxada hasta'l propiu llagu y pasiar tranquilamente al so llau ye lo máximu. A sos pies, taremos sentaos dellos minutos, como si tuviésemos nun mundiu escaecíu, perdíu y na realidá restrinxíu, enantes de salir de la cubeta glaciar y tomar un senderu penmediu d'un fayéu increyible hasta la braña'l Ferviḷḷín.

 

Del Ferviḷḷín descendemos hacia la Campa'l Ríu travesando la parte baxa del fayéu

Paramos unos segundos nel Ferviḷḷín, echando vistazu cola mirada, al senderu que baxa dende la traviesa'l Cabril, camentando si ye l'accesu más rápidu al Cogoḷḷu Ceboḷḷéu, lo que tendremos que ver dalgún día. Dende la braña, siguiremos el cursu del regueru la Campa, travesándolo al llau d'un pequeñu tabayón y metiéndonos de nuevu na parte baxa del fayéu, el cuál nun yera a recordalu tan xabaz y tan guapu... paeciéndome un llugar únicu y cuásique máxicu.

 

Facemos descensu final dende la Campa'l Ríu a la Francibín pa garrar pista hacia Viḷḷar

Con pocu más, aportaremos a la Campa'l Ríu dexando atrás tol valle la Campa, garrando camín a la mandrecha la Campa, que llevarános baxo la viesca, hasta topanos col regueru Ceboḷḷéu, onde ya siguiremos per bon camín, hasta la puente Francibín, onde ascenderemos a la pista que vien dende la Pornacal, pa descender ya cola calma hasta Viḷḷar de Vildas, onde pudimos duchanos, descansar, tomar cerveces y cenar increyible en La Corte.

En resume, segundu día de ruta cola cadera a la moda, pero qu'al menos dióme pa esfrutar d'un día de monte como los d'antaño, descubriendo nuevos llugares nun conceyu que ye de lo más guapu d'Asturies. Los 16,25 km de percorríu y +/- 1200 m de desnivel acumuláu, nun ye nada comparáu con tolo que conocimos nesta ruta, nes 8 hores y 20 minutos de pateín restrinxíu somedanu.

 

Camudando'l Camín nel Somiedu ganaderu