Del 5 al 16 d'Abril 2025
Una vegada más, averámonos hasta Teruel, al Alto Mijares en Olba, a pasar semana y media escalando, andando en bici y sobretou descansando, que la vuelta al curro dempués de la baxa, fuera bastante dura. Como yera d'esperar, el primer finde, aportamos a Olba de sábadu a mediudía, llueu d'un viaxe con tranquilidá dende'l vienres con parada a sobar en Soria.
Esi mesmu dí, xubiéramos hasta'l Más Allá nel Palomarejas, aportando al seutor xusto a la entrada de la solombra, pudiendo llimpiar un sectorín bien guapu, plaqueru anque de furacos pa facese a la escalada, faciendo vies dende V+ a 6b+, perfeutu pa calecer deos, siguiendo hasta'l corner del Más Allá, onde ficiera GYC Seguridad (7a) al segundu pegue, alloriando col pire a cadena.
Al día siguiente, dempués de liala un pocu por Olba, tuviéramos esguilando en Sombra Perpetua, faciendo un par de 6bs pa controlar el nivel de resaca y dando un pegue final a vista Entretubo (6c+/7a), prestándome muncho, siendo una vía con muncha calidá de movese y escalar fino.
De Llunes, tiraríemos hasta Meteoblue, llimpiando un pocu la so parte esquierda y probando dalguna vía más nel Callejón, siempre sin apretar, nes plaques solombriegues, pal día siguiente de martes, averanos hasta Sombra Perpetua y Paraiso, onde pude facer al segundu pegue Atrapasueños (7a) una vía superdivertida de movimientos y probé un 7a hipersobáu en Sombra Perpetua, con munches ascensiones, pero mal equipada a mi entender, ya que lo más difícil ye chapar la tercera penriba del rampáu, dando bastante mal rollu la escalada.
Si'l Domingu, llegara Xavi y Nathalie a Olba, el miércoles pela mañana, Rubén y Ani, tamién completaben equipu con Dani, Becky y Silvia y pa cellebralo, xubiéramos hasta Obras Selectas, quiciás el muru más impresionante d'Olba, teniendo un día potente, faciendo dos 6cs potentes a vista y llevándome la Sombra del Viento, nun pegue al corte, como pocos tuve na mió vida, dándome cuenta, que ya nun había piles y tocaba descansar un pocu.
De Xueves, fuéramos de nuevu hasta'l Más Allá, pa que Ani y Nathalie esfrutaran de víes más afayaices y Silvia y yo, dedicámonos a facer dellos 6b+ mui buenos, llargos, pero que ya nos dexaron claro, que nun teníemos nin fuercies nin yemes, poro al día siguiente, yo preferí salir a pegar una vuelta potente en bici y tan sólo, xubí de tarde a dar un par de pegues en Sol de Invierno a en Tu Sitio (7a), una placa de roxa collorada que me picaba dende'l viaxe anterior.
Esi Vienres, tiráramos a cenar a Olba, al Mijares, con liada a posteriori nel Chicuto, asina que'l sábadu tan sólo xubí a asegurar a Sandra a Obras Selectas, qu'averóse per Olba tamién y el sábadu ya, tuviéramos per Sol de Invierno, faciendo un par de víes pelín perres pa calecer y ya encadenáramos dempués Nicosaurius Rex (7a), que peacía más fea dende baxo de lo que yera al final, con movimientos prestosos.
Nel intre, aparte de topanos una meteo más gafa, con tormentes de tarde, el parking entamaba a volvese una llocura de xente, poro mi cabeza ya me decía, que debía dir pensando en colar, ya que tenía tan bon tastu de los viaxes anteriores que nun quería garrá-y zuna a una escuela que tanto me gustaba.
Por suerte, dempués d'otru día de descansu obligáu pola lluvia, tendríemos la oportunidá al fin, de conocer el Imperio del Sol, que como'l so nome indica, nun ye fácil alcontrar el día pa poder esguilar nes ablucantes rutes. Pela mió parte, fue'l día que más pude esfrutar de la escalada, llevándome a vista, tres 6cs llarguisimos y guapísimos y My Friend Aspi (7a) tamién a vista, anque del día quédome con Camino al Cielo, una llarga y sicolóxica ruta, con placa y diedro, con unos pires brutales, teniendo qu'escalar muncho entre chapa y chapa... un placer pa tolos sentíos.
El miércoles ya, cola furgo preparada pa colar y el parking petáu enforma, xubiéramos nun día fríu al Callejón, quedándome pela mió parte nes víes solariegues de la morra del Callejón, pringando pa calecer un 6b+ bien cabrón, pero pudiendo encadenar a vista El Perro Andaluz (6c) mui guapu y sobretou faciendo al segundu, Illuminati (7a+), un ruta mui divertida con dos bloquinos separaos durante'l percorríu.
Con esto ya, Alón a Olba, hasta la prósima... qu'espero seya un viaxe pelín más tranquilu en tolos sentíos
Del 19 al 26 Ochobre de 2024
Vacaciones más que merecíes, pa desconectar d'un branu enllenu d'hestories de toa triba, nel qu'esguilamos muncho, pero en permales condiciones. Poro, les ganes de fuxir de la mala meteo asturiana y zarrar así la temporada esguiladora braniega yeren totales, col envís de trepar lo másimu posible en graos un pelín amables, que pudieran salir al pegue o al segundu máximu.
El destín, pues pa min yera claru, ya que dempués de conocer Olba na selmana santa gustárame enforma, animándose Orlando y faciendo la tripla Ana, dempués de dar más vueltes qu'un perru p'acostase hasta que decidióse a venir. D'esti xeitu, garramos un apartamentín n'Olba y enllenamos la furgo, con tolos trastos pa díez díes fuera casa con mochiles d'escalada, instrumentos pa echar les tardes tocando per casa, caxes de comida como si fuéramos un mes al campu bas del Everest y dalgo de ropa si acaso, que nun vien mal dacuando.
Primer día, vamos a lo conocío, asina que tiramos pa Sol de Invierno, pudiendo tastiar la roca turolense, con un par de sestos baxos, bien guapos, enantes de que la solana echásenos a conocer el seutor del Más Allá, que como bien indica'l so nome, ye siguiendo de Sol de Invierno n'adelantre teniendo solombra, a partir de mediudía. Ellí, tuviemos más qu'entrenteníos y felices, prebando Bohemian Rapsody un 7a/+ superdivertíu, que tuve la suerte de llevame al flash, demientres los collacios dieran un par pegues infructuosos, enantes de colar pa Olba de vuelta.
Cola supuesta lección deprendía, en cuanto a escalar al sol, díbemos el segundu día a Meteoblue, pero nun yeramos a madrugar lo suficiente y pente ponte bien y tate quietu, aportamos al seutor, ya casi col sol pegando nos parés. Sicasí, enantes diéramos una vuelta per tola redolada, viendo otros munchos muros al final del valle del Palomarejas, enfrente de Sol de Invierno, que teníen pintona, así que la culpa fuera nuesa por nun entainar.
Ponémonos al lío y llueu de facer un sestín pelín físicu pero cenciello, entrámos-y Orlando y yo, a Take it Easy (7a), tocándo-y montar a él, demientres Ana decidía facer más sestos pa siguir rodando ya que la vía del día anterior, paecío-y perfísica y prefería plaquear más. Sicasí, acabó metiéndose nun 6c+ cabrón, que tuvo que meté-y dos pegues pa encadenalu, demientres yo tuviera, otru día más, la suerte de llevame al flash la vía que montara Orlando.
Increíblemente pa min, taben yendo los pegues rodaos y animáronme a probar Curva Peligrosa, otru 7a más plaqueru que la desplomada Take it Easy, dando un pegue poniendo cintes d'esos épicos, lluchando tanto'l bloque más duru, col flash d'una escaladora, asina como na parte alta, onde tocó bregar faciendo dalgún goméu épicu al sol, hasta aportar a cadena, decidiendo que pola mió parte, taba'l día más que fech, esperando a que los collacios terminaren les sos xeres.
Como ya sofriéramos dos díes siguíos col sol, el tercer día, fuimos ensin inventar na, a Obras Selectas, murazo increyible al que nun-y pega'l sol en tol día, asina que plumes y Orlando feliz, ya que nun soporta'l sol pa trepar. Nesti día tocábame a min, pringar montando, asina que buscamos dalgún 6c pa calecer deos pero como la guía ye un putu "desastre" o ta ya mui desactualizada, métome nel Poema ensin sabelo (7a), lluchándola, pero fallando nun pasu llateral nel qu'equivoquéme.
Nun tolos díes son folixa, asina que dempués de danos cuenta que tamos
nel Poema, Orli entra con un pocu respetu colgando pa calecer y probar
los pasos bien. Ana, sigue col so rodaxe y prueba un 6c con una pinta
guapísima que se-y resiste hasta'l segundu peguín, pero decide que nun
va metese en xardinos con nosotros ya que tien cuidar los hombros, asina
que monta la de la so manzorga que tien hasta meyor pinta.
Al segundu pegue, tanto Orlando como yo, llevámonos el Poema, paciéndonos una vía cinco estrellas, esfrutándola munchísimo y andamos rabilando a ver onde tirar otru pegue, decidiéndonos pola GREIM, ya qu'esa roca naranxa enllena de furacos llevábame picando dende que llegáramos, Eso sí, miramos por interné y vemos que'l primer llargu ye 7a, decidiendo que col primer llargu tenemos abondo que llevamos tres díes siguíos esguilando y siguir al segundu llargu de 7a+ danos pereza.
Tócame entrar a vista a la GREIM poniendo cintes y alloriando colos pires, asina que voi esguilando lo más fino y seguro que pueu, ensin arriesgar, metiéndome na babaresa final, onde ya voi bramando hasta chapar la última cinta, nun lleendo bien el final ya intento salir per unos romos horrendos hacia cadena, que como non, tírenme, pero quedando mui contento cola actitú que toi teniendo en cada pegue lluchando al corte.
Turnu pal Orli, que pídeme un flash yendo pol llibru en cada man y cada pié, aportando a la babaresa final onde-y toca ruxir un pocu, saliendo al planu final y yendo d'hombru a la presa que-y indico a la manzorga, montándose hacia la reunión y enchufando nun pegue maraviyosu. Dempués, Ana danos una lleición enchufando a vista, la vía que dexara mediu montada, mirándonos Orli y yo, nun tramu onde nun veíemos presa dende baxo, resolviendo esi tramu con mayestría total.
Quedaba yo por intentar facer al segundu pegue la GREIM, asina que tiré p'allá a ver que pasaba, faciendo la parte baxa casi peor que nel pegue poniendo cintes, pero una vegada que llegué a la fisurona, centré y fice los pasos pol llibru, enchufando otru sétimu más pa la llibreta nesti viaxe, anque ya veía que les fuercies diben baxando col pasu los díes, pero bono, a eso veníemos a trepar a muerte y despexar la mente.
Al día siguiente, el cuartu, díbemos camudar d'escuela y conocer la cercana Jérica, asina que tiramos cola calma hasta'l pueblu, onde decidimos almorzar, pegándonos una hostia épica los del chigre. Mal entamamos col cambeu de provincia entre Teruel y Castelló. Colo bien que tratábenmos nos chigres d'Olba, onde yeremos ya casi llocales y la primera na frente en Jérica.
Con esti mal comienzu, la llegada al seutor a la solombra, nun fue meyor. Ponémonos embaxo les plaques grises y con pinta sobaes, viendo tamién la equipación dalgo "old school" y Orlando nos mira, diciendo cabrones, que me toca a min y de resaca. Con esti plan, ficimos tres sestos baxos por conocer la escuela y colamos ensin tan siquiera echar una birra, decidiendo volver a Olba, pasando per Montanejos, conociendo otru guapu pueblu, al que dalgún día habrá que dir a trepar, siendo esta una escuela nomada los últimos tiempos con visites de gurús de la escalada.
El quintu día, amanez orpinando, pero como escaláremos tan pocu en Jérica, envede descansar, decidimos xubir hasta Sol de Invierno, pudiendo facer Ana un sestu baxu tan guapu como espuestu, enantes de que l'orpín pasase a lluvia potente, dexándonos coles víes más desplomaes como única opción, escoyendo un 6b de primer llargu, que facemos los tres, quedando seco tan sólo un 7a+ con pinta físicona, al que tócame meteme a montar.
A lo tuntu, siguimos el restu del día, dándo-y pegues a la vía los tres, teniendo hasta suerte cola meteo qu'a la fin asela y va dexanos colar al final del día ensin moyanos pa marchar. Eso sí, colamos del seutor, coles yemes a la moda d'apretar, quedándonos col tercer pegue buenísimu d'Orlando que sí que ye capaz de llevásela, llueu d'alcontrar yo nel segundu como chapar con seguridá, siendo asignatura pendiente pa Ana y pa mí, ya que nun tuvimos pila nel tercer pegue del día.
El sestu día d'escalada, decidimos tornar per Obras Selectas, dando un repasín a tol muru hacia la mandrecha, visitando'l Paraiso y Sombra Perpetua, onde gracies a dalguna vía que recomendárenmos posamos los trastos y decidimos asitianos embaxo d'un 6c míticu nomáu Gran Hermano, que-y tocó montar a Orlando, faciéndolu Ana y yo al flash, teniendo que da-y un segundu Orli pa continuar la xera esguiladora.
Dempués de los pegues, quedamos un pocu mirando que facer los tres, pensando si movenos hacia'l Paraiso o a Obras Selectas, pero la verdá ye que quedéme mirando pa la línea d'al llau de Gran Hermano, nomada como Vanyou y tenía una pinta brutal teniendo un grau de 7a+. Cuando baxó del 6c comenté-y que punxera les cintes que pudiese al baxar, ya qu'apetecíame meté-y un pegue a ver si sonaba la flauta.
La verdá ye que como ye la escalada, ya que fui poniendo cintes na parta baxa, lleendo la vía estupéndamente, plantándome na parte más tiesa, con cierta seguridá, pero equivoquéme antes d'entrar al bloque y tiré pela mandrecha quedándome ensin posibilidaes. Dempués de colgar, mirar una migayina como diba'l pasu, salí p'arriba al primer intentu, camentando que la diba reventar al siguiente pegue.
Con ciertu cansanciu, tanto Ana como Orlando probáronla, gustándo-y munchísimu tamién, anque Orli diba ya col bidón de gasolina escosu a estos altores del viaxe. Entré al segundu pegue super seguru de facela pero como saliera'l bloque a la primera nun miré bien los pies a usar y pringué con tol equipu al segundu pegue y posteriormente tamién al tercer, colando pa casa, con una baxona importante y viendo tamién como'l mió tanque particular d'enerxía diba terminándose, llueu de 6 díes d'escalada seguíos.
Sicasí, había moral y la ruta gustáranos muncho a los 3, asina que decidimos dexar montada la parte alta y al día siguiente, sétimu de trepada continua, tornamos pela mañana, con dalgo d'amenaza de lluvia pa la tarde. Poro, madrugamos y plantámonos allí, metiéndome poniendo cintes y pringando una vegada más nun bloque que pensaba nun diba ser tan difícil. Llueu diría Ana que reventó la vía con un pegazo, pa siguir Orlando, con una bona arrastrada, pa continuar dempués yo, faciéndola a la fín, magar de matizar bien los pies a usar, siendo'l quintu pegue en total... menos mal que salía a vista.
Pa rematar la xugada, Orlando animóse a dar un últimu pegue y enchufóla tamién, mirándonos los tres, diciendo que nun podíemos col alma ya, asina que llamada al pueblu d'al llau pa dir xintar y tiramos felices a tomar el vermú, comer y dir morrer al sofá, viendo una peli, ya que nun teníemos nin mediu gramu d'enerxía.
Dempués de la peli-siesta, tocó duchina y salir a tomar dalgo, cayendo una esbastiada brutal de tarde, corriendo rigos peles empedraes cais d'Olba, no que paecía una previa de lo que diben sofrir los vecinos malpenes 4 díes dempués. La intensa lluvia fue la disculpa perfeuta, pa quedar tranquilamente en casa Ana y que los paisanos, cola sensación de tol llabor fechu anduvíeramos de chigre hasta altes hores de la nueche... o meyor dicho madrugada... y ye que l'ambiente nesti pueblu ye otru de los sos grandes atrautivos.
Al día siguiente, eso sí, llevantámonos como pudimos y zarramos viaxe trepando per Sol de Invierno a la gueta de dalguna vía seca, cosa qu'alcontramos y con creces, ya que pudimos esfrutar d'otru murín nel Más Allá, onde tuviera pela mió parte, faciendo cuatru sestinos a vista con un nivel de roca d'ensuañu, demientres Orli pasaba'l día como podía y Ana llevábase otru par de 6cs pal bolsiellu con munchu méritu pa un octavu día siguíu d'escalada.
Continúabemos de vacaciones teniendo qu'escapar de Cuenca pola mala meteo que nos venía y averámonos nun viaxe lluviosu, de pocu más de dos hores, hasta la llende pente Teruel y Castelló, siendo más concretos, yéndonos hasta'l pueblu turolense d'Olba, onde alcontramos un abellugu maraviyosu pa pasar dellos díes d'escalada, bicicleta y hasta un pelín de comedia.
La idega yera dividir un pelín los díes d'escalada pente Olba y la cercana Montanejos, pero viendo'l nivel de xente qu'había per Montanejos, al final, paeciónos lo meyor esfrutar d'Olba, el másimu de díes posible, quedándonos namoraos tanto de la escuela, ensin conocer tolos seutores, como del pueblu, pasando mui bonos ratos nos distintos chigres del pueblu y charrando animósamente colos vecinos, que nun terminaben de creyer que viniésemos dende Asturies a escalar.
En cuanto a la escalada, nun pueu más que destacar lo guapo del llugar, siempre con un pateín per percorríos balizaos que llévanos hasta los seutores, col rigu con poces pa poder refrescanos y con ambiente nos seutores, con muncha xente conocío: asturiana y llionesa y xente que conocimos: vascos, catalanes... munchos neños, perros y xente, pero nun ambiente familar, ensin voces, nin bichos, nin titanes, sólo xente escalando, families y neños xugando y perros nel so sitiu ensin molestar.
La mayoría de los díes tuviemos nel seutor Sol de Invierno, onde tengo que dicir que movime más o menos pente'l 6c y 7a, paeciéndome toles víes mui buenes, con bona roca de plaques grises y desplomes colloraos, con tou tipu d'agarres y munchísima calidá nes víes, nun grau moderáu, tirando a durete quiciás, pero mui disfrutona d'escalar, quedándome con milenta víes a probar pa prósimos viaxes.
L'últimu día, averámonos hasta la muria d'enfrente de Sol de Invierno, entrando per otru percorríu balizáu dende'l Casucho, onde asítiense otros seutores como Meteoblue o Don Quijote, nel que finálmente quedámonos por mor de la cantidá de xente qu'había nel primeru, prestándonos un pelín menos que Sol de Invierno, pero ensin dubia, pagaba la pena la visita tamién pa despedir el viaxe, llevándonos al segundu pegue otru 7a más desplomáu, pero mui guapu tamién.
Con munchos metros escalaos, anque ensin apretar al másimu nivel, dalgo que suelo facer en tolos viaxes, colábemos de vuelta p'Asturies, cola sensación d'alcontrar otru requexu nel que tornar una vegada tres d'otra, sobretou porque entá quedábenmos munchos seutores per conocer y munches víes per prebar.
Poro, Olba, hasta la prósima, que nun sedrá a muncho tardar...
No hay comentarios:
Publicar un comentario