Xineru y Febreru de 2025
Magar d'operar la cadera a primeros d'Avientu y pasar un mes bastante fastidiáu rehabilitando per Xixón, con munchu paseín y exercicios pa la patuca, en Xineru tornábemos a casa, onde pudimos continuar la rehabilitacíon más seria, con bici estática y eliptica, así como exercicios de fuercia, pudiendo recuperar bastante rápidu.
D'esti xeitu, a mediaos de Xineru, anímábame a caminar pel monte un par de díes, yendo hasta dellos seutores a tomar el sol, como la Carba la Robla na Peña Manteca y la Covarriella, onde pude siguir probando la estabilidá de la prótesis de cadera y la recuperación de la fuercia na pierna drecha.
A los pocos díes, diba atrevéme a probar a esguilar, col envís, de ver si teníemos fuercia na pierna drecha y si dalguna posición molestábame. Como non, ficímoslo en graos bien baxos, aprovechando pa conocer un seutor nuevu na Peña Manteca como ye L'Utiru, equipáu per Mon y Villa, nun curro increyible.
Los díes fueron pasando y L'Utiru, convirtióse nel mió llugar de xuegu
particula, pudiendo esguilar dellos díes colos collacios, xubiendo pali
pali el nivel de les víes, disfrutando muncho a vista toles víes hasta
quedame con L'Utiru (6b/+), una vía llarga y de cantu, que sedrá una
clásica del seutor.
La verdá ye que toles víes paeciéronme mui buenes, pel momentu y eso que voi asegurando los pasos pa nun volar, pasando un pocu de tensión estra, teniendo que colgar ún de los díes nun 6b+ (Vetas de Miel) ya que nun fui a alcontrar bien la posición del cuerpu nel pasu y dióme mieu volar.
Dempués de la revisión del trauma, coincidiendo xustu colos dos meses de la operación, confirmándome que taba too estupendo, volví a esguilar al día siguiente col compañeru Santos, metiéndonos a calecer en L'Utiru, montando dempués la vía de la mandecha Javi Mugarra (7a), que tenía per encadenar Santos, faciéndola sufriendo un pelín.
Magar d'entrugar si creía que llegaba bien a cadena, metíme p'allá a ver que pasaba, sufriendo un pocu na parte más desplomada, onde salí del pasu apretando presa a presa enforma. Llueu ya tocó salir a la placa y fuí soltándome, navegando de llau a llau de la vía, según me diba paeciendo, pudiendo encadenala al flash, nel segundu cumplemés de la cadera nueva.
L'últimu día de visita a L'Utiru, tocó tastiar víes ya más físiques na parte drecha, como ye la Luna, un 6c mui buenu, que fícelu al segundu, ya que pringué y volé un puquiñín, a mou de preba, nel pasu del desplome. Pa completar el día, pude facer poniendo cintes Vetas de Miel, que teníala pendiente, confirmando, que vamos avanzando rápidu y bien, de cara a tar recuperáu pa la primavera.
Mil gracies, Mon, Villa, Javier.... por sacar otru seutor en Morcín alantre, pal esfrute de tolos escaladores de la zona. A mí, personalmente ta salvándome la vida, pa nun tener que repetir víes y rodar enantes de volver a los proyeutos pendientes.
------------------------------------------------------------------
26 de Mayu de 2022
Siendo sinceros, llueu del mes de Marzu y Abril, col bon tiempu y bones temperatures que fizo, nun contaba casi con apaecer de nuevu pela Carba. Nel mes de Febreru si que xubiera con Santos y Dani varios vienres, probando tranquilamente Distopia Primaveral (7c+/8a), ensin mayor envís que dar pegues sueltos y ver si yera a moveme nestos graos.
Llueu de munchos díes pela Cualladrona, llevándome Aker y Soul (7b+), Roca Norte (7b+/c) y dexando a puntín Esclavos del Grado (7c/+), averéme dellos díes frescos hasta la Carba, p'acompañar a Santos que taba probando Pétalos (8a), asina que volví a dar unos pegues a Distopia Primaveral, xunto a Rubén, viendo que me movía diferente, algamando munchu color nun últimu pegue del primer día.
%20-%20Berto%20Xuan%20Alcoceba-%20Ani%20Iglesias.jpg)
D'esti xeitu, unos cuantos díes más, fuimos afinando la forma y los movimientos y cola motivada del encadene de Rubén, tocó dir a por ella, cola cuenta atrás del calor picando a la puerta. Un par de díes más, dexándola con una caída cola compaña d'Orlando que la probaba per primera vegada y esta selmana sentía que yera'l momentu de llevámela.
El martes, xubía con Orlando, montándola y viendo que taben munches preses húmedes poro, diba tar la cosa complicada. Baxo cepillando y dando magnesiu a les preses, dando un segundu pegue bastante buenu, cayéndome nel pasu duru pa min, aportando a cadena y dexándola una vegada más y diben 3 con una cayía.
El miércoles con un día frescu y sequino, nun tuve la suerte de tener compañía pa xubir, asi que tuve qu'esperar al xueves, onde al igual que cuando probé la vía per primer vegada, arrodiáu de collacios, fuimos hasta la Carba a echar la tarde, viendo que pegaba una solana de puta madre, así que pintaba fea la cosa.
Tocamos la roca, vien una ñube y entro a la vía, con sensaciones bastante buenes, nel clásicu pegue pantera, aportando al bloque y casi quedándome de la presa, pero yéndome p'abaxo. Sigo hasta cadena, pola cosa de dexala de nuevu con una cayía ya intento centrame nun segundu pegue hasta onde caiga y dexar un terceru pa marchar.
Me como un pegue colega de Silvia en Crucifixión y métese la ñube y sopla un vientu friu, asina que métome a la vía a ver que pasa, entrando al bloque con fuercia, sintiendo mi presa clave mui bien, quedándome nel dinámicu, asina que salgo p'arriba de la barriga, intentando baxar vueltes con calma nel siguiente chapaxe.Doime un airín incómodu y salgo col mió métodu, colocando pies y zarranda pinza de dreches aportando a la d'esquierdes lo más paráu posible, yendo al dinámicu final, más paráu de lo normal y yéndoseme un pie, que nun sé mui bien tovía, como aguanté la puerta.
Tuve la suerte de recomponéme y ya centrar tolos pasinos finos de pies y zarrar les preses llaterales como si nun hubiera un mañana, hasta aportar al reposu final. El restu la hestoria, la de siempre, ponese cardiacu por culpa del pasín llargu de cadena pa los baxos, pero llego bien paráu, chapando la cadena ensin problemes y llevándome Distopía Primaveral (7c+/8a), teniendo claro que depende muncho de la estatura, pero nun tengo tantes referencies pa decantame.
-----------------------------------------------------------------------------
5 Avientu de 2022
Entamamos temporada ivernal en Peña Manteca, dempués de munchos díes de branu y seronda alloñáu de los parés d'esta peña y siendo sinceros, tornamos a la Peña Manteca, porque les restricciones inxustificaes paxareres, llévenmos a la Carba o L'Argayu ante'l cierre de Figares, como másimu esponente de la llocura ornitóloga de Morcín.
Y digo llocura ornitóloga, por nun llamalos paxareros ensin otra cosa que facer, ya que pieslles d'escueles como Figares, por añeramientu d'Utre ye una total estupidez, siendo un animal que ta en plenu espoxigue, sólo hai que ver l'aumento del númberu d'utres nos últimos años, conviviendo col escalador ensín dengún problema, cosa que nun pasaba cuando la cantera taba en furrulamientu.
En fin, llegó l'iviernu, llegaron los pieslles per añeramientu xabaces dafechu, 8 meses y mediu en Figares, supuéstamente dinámicu, anque prestaríame ver si van trabayar los guardes y reabrir una vegada que comprueben onde añeren les utres y si se-yos molesta. El casu ye que como nun mos movemos, el coleutivu escalador, que ye'l que dexa perres a los hosteleros en Morcín, pues na, siguiremos perdiendo seutores durante meses y meses, cuando pudiera ser muncho menor los meses de regulación.
Dicir, que según el bopa espublizáu, Figares tien de revisase nos dos meses entrantes del entamu la regulación, cosa bien fácil de facer, si sólo tuviera reguláu por Zapiquera (Alimoche) , pero paezme complicáu, con tal cantidá d'utres esistentes, que vayan permitir l'apertura de dalgún seutor de Figares, ya que de xuru, que los ñeros tarán perende en tola peña, anque les víes queden mui pembaxo de les reuniones.
Falando de Peña Manteca, sabé-y que queda en zona piloto, lo que significa que si los escaladores molesten a los páxaros, pueden piesllar los seutores (Carba, Ramileru, L'Argayu), asi que ya sabéis nun faigáis ruiu, nun molestar a los páxaros, que les motocicletes del circuitu del Llusuriu, eses nun fain ruiu, nin molesten nin na... somos los escaladores, tenéilu claru eh!!
Los cazadores pegando tiros per tolos montes, esos tampoco molesten, lo que pasan que los ornitólogos nun tienen los tolanos suficientes, nin la conseyería a metese colos cazadores, eso ta claro. Asína que ya sabéis, jipis escaladores, que nun dexáis perres nel conceyu Morcín, esguilar en silenciu, na de gritos sharmáticos, tonada, cante jondo, nin flashes indiscriminaos, que los páxaros nun ponen el güevu... y quedamos sin Peña Manteca tamién.
Peña Manteca (Seutores visitaos)
Croquis modificaos por mi de la escuela d'escalada de Peña Manteca, por mor del trabayu de Asturvertical na so mayor parte. Gracies y col so permisu.
---------------------------------------------------------------------------------
28 de Xineru de 2022
Como non, Peña Manteca sigue siendo referente pa dir a apretar al solete ivernal, asína que nestes selmanes de fríu y díes secos ficimos delles visites sobretou a la Carba, ya que tábemos tol grupu colos nuesos proyeutinos.
A L'Argayu, la verdá ye que tuve muncho más perezosu y namáis qu'averéme un día per ellí, faciendo como siempre una vía de les "cencielles" pa calecer, como fue'l Diablo tiene cara de conejo (6c/+), bona vía mui complea, con dalgún bloquín y tramu de plaquina fina.
Llueu, metiérase muncho calor y magar de tar un bon ratu asegurando a Anna na Coco (7a+) vía na que ta proyeutando dúramente, metíme a probar la Directa a L'Argayu (7b+), la cual pente la dureza del bloque final y la solana que chupara, decidí desmontar, ya que la veía perdura pa un día de tanto calor.
Andre tuviera, probando l'Espíritu del OI!, un 6c+ atómicu, con componente físicu y mental, al tener dellos vuelos llaterales, sobretou na parte alta. Esta vía, nel intre, fízo-y perder muncha confianza na so escalada, cosa que recuperará aina y ye que'l componente mental de la escalada ye tan importante como'l físicu.
Al primer 7b d'Anna cola Purista del A Vista, vía que pa min ta na mesma dificultá de Sagitario A, hai que sumar tamién el mió encadene a la Ventana de Eli, vía que llevóme un total de 6 o 7 sesiones, algamando los 4 pegues al día, según fui ganándo-y tola resistencia a esta vía, pelín a bloque como toes les del seutor, que terminó por enganchándome enforma.
Tornando de nuevu a mi másimu grau, ya tamos en condiciones d'intentar xubir el nivel na Carba, prebando cualesquiera de los dos 7c del seutor, asína que na prósima visita tocará xubier pela vía como se pueda y prebar los pasos con tola calma del mundiu, agora sí que toca proyeutar.
18 d'Agostu de 2021
Los díes pasen d'esti branu pelín atípicu, nel que tamos yendo a seutores soleyeros más de lo normal, por mor de lo ñublu reinante nes tardes. Poro, llugares como L'Argayu que contábemos ser d'iviernu, fueron protagonistes de varios díes d'esguilada.
Ún d'ellos tuviemos la suerte de contar col grupu de collacios d'Alex Txikón, Carlos "Snoppy", El Gitano... colos que tamién coincidimos en Figares, pudiendo recomendá-yos varios seutores onde esguilar tranquilos y probar les víes más significatives.
17 de Xunetu de 2021
Como tolos años, siempre garramos un seutor en branu y vamos dándo-y caña, llimpiando víes o simplemente garrando forma de cara a un proyeutu qu'illusione. Nesti sen, garramos la Carba, como campu base, nos díes ñublaos de tarde, col envís de dir tachando víes y averándonos a proyeutar en Ni Toro ni Titán (7c).
La última en cayer a la llibreta, fue Sagitario A, otru 7b, pelín más durín que los anteriores, nel que compartimos pegues de rises con varios collacios, pero que sobretou tengo qu'agradecer a Anna y Suco, xubir un sábadu a les 9 la mañana enantes de qu'entrase'l calorón del finde, pa poder encadenala.
El día anterior, ya me cayera arriba'l tou nel últimu pegue, asína que tocó volver dafechu fanáticu, teniendo que camudar métodu pa encadenala, por mor, de que l'allargue qu'usaba pa facer tol bloque del tirón, molestábame nun día sin vientu y nun podía llanzar a un invertíu... fuera allargue, asumir y encadenar.
10 de Xunu de 2021
Continuamos col trabayu en Peña Manteca, arrequexaos poles prohibiciones temporales d'esguilada al seutor de la Carba. Dicir que ví baxar a xente del Ramilleru o L'Argayu y tengo munches dubies si entra o non, na fastera restrinxida, por si les mosques, ser sensatos y por esperar mes y mediu, meyor nun esguilar nestos seutores hasta Agostu.
Na Carba, magar d'encadenar la Purista del A Vista, tocaba buscar otru proyeutín y aprovechando qu'Andrea quería probar la A.Iva (6c+), tando dambes víes al llau, volví a Crucifixión, que-y diera un pegue va munchu tiempu.
A la fín, anduvimos finos y dempués d'un peguín de preba na que pringué na chorrera d'abaxo, nel segundu pegue fice tola parte baxa y salí del techu ensin fallu, pa llevame esti 7b, quiciás un pelín sele, nel tercer pegue en total, lo que diz, que va siendo hora de metese a proyeutar más en serio.
24 de Mayu de 2021
Los llunes al sol, tan trayendo bonos resultaos, sobretou si'l domingu tocó dir de monte, ya que suelo llegar descansáu de yemes y tren superior, que de pates, suelo llegar petáu y tar munchu tiempu, aguantando posiciones de reposu esguilando nun suel dar bon resultáu jeje.
Ayeri, tamién xunióse a probala Orlando que xubió con Aly a trepar y pudimos compartir pegues los tres. Al segundu pegue del día, pude enchufala, afinando un pocu el métodu de salida nun cruce, cosa que nun tenía clara'l día anterior y pringara nel mesmu pasu tres vegaes.
Orlando dió-y dos pegues de prueba y Suco pringó incomprensíblemente cuando ya ficiera tolo duro en dos ocasiones. Los nervios dacuando xueguen males pasaes y cayer onde nun deberíes ye parte del xuegu de la esguilada.
22 de Mayu de 2021
Otru finde más, de furgo, esguilada y monte, averándonos el sábadu hasta L'Argayu, magar d'una mañana d'espertar, almorzar con tranquilidá y xubir hasta'l seutor a la 1 la tarde. El día taba ñublu, asina que tampoco mataba'l calor, anque l'amenacia de lluvia taba presente por mor de les ñubes que pasiaben penriba L'Aramo.
Les intenciones ya son clares, nesti seutor, lo primeru tratar de tachar dalguna vía de placa de la parte alta y llueu apretar nos desplomes. Poro, entamamos faciendo un 6a arriba'l too, que dexóse trepar bien y valió pa calecer los deos un pelín, anque hai que dicir que pa facer placa, muncho meyor el seutor del Ramilleru.
Dempués, tanto Anna, como Iso como ye, nun perdimos más tiempu y metímonos de plenu a Capitán a Posteriori, un 7a+ de pasos tallaos, nos que les secuencies ganen en vistosidá a la manufactura, quedando una vía elegante na que'l final ya ye sólo aguantar magar del apretón na seición central.
Peña Manteca (Seutores visitaos)
Croquis modificaos por mi de la escuela d'escalada de Peña Manteca, por mor del trabayu de Asturvertical na so mayor parte. Gracies y col so permisu.
18 d'Abril 2021
Magar d'un finde d'esguilada, probando cosines per Otura y Figares, el domingu despedímonos en L'Argayu de Peña Manteca. Día fresquín pela mañana pero soleyeru, diba ser una bona preba xubir hasta ellí pa ver si aguántase a sol esguilando y la verdá ye que muncho meyor nubláu, porque pesie a tener bon tactu la roca, cuando pega duro aquello ye un fornu, anque tire una brisina.
Sacante del calorín que pasamos, vamos garrándo-y gustu al seutor y vamos tachando cosines, siendo unos cuantos los que fuimos turnándonos nos pegues. Iso, metióse a montar Coladita que nun la tenía y al final llevósela al segundu pegue.
Pela mió parte, metíme al caberu 6c que me quedaba na mandrecha, El Espíritu del OI! (6c+), vía completísima y la más guapa d'esta parte del muru ensin dubia. Ya sólo cola parte de la chorrera d'abaxo paga la pena y si-y amestamos la salida del techu, tenemos un rutón.
Pringuéla nel pegue a vista al salir del techu y ya nel siguiente encadenámosla non ensin sufrimientu, por colocame mui raru pa salir del techu pela manzorga. Anna, metió-y dos pegues tamién pa llevásela muncho más cenciello que yo, infinítamente más cenciello jaja... ye lo que tien esguilar bien.
Pero otra parte, pa terminar, con pelín d'insolación ya, metíme a probar Capitán a posteriori, un 7a+, mui guapu de tallaos, pero con unos movimientos mui prestosos. La verdá ye que tengo ganes de volver pa da-y un par de tientos decentes, porque diría que sale rapidín.
13 y 14 de Marzu 2021
Tornamos a Morcín, magar de dellos findes per Teberga, echando un gabitu nel desbroze d'Entecampos y tamién per Cabrales, tanto d'esguilada per Oceño como de monte per llugares tan guapos como Rubó y Collantes.
Al día siguiente, averámonos hasta la Carba col envís de facer Cruciva, una variante pente Crucifixión (7b) y A.Iva (6c+) que queda nun perguapu 7a, que paga la pena facer, porque l'enllaz en travesía pente les dos ye una preciosidá.
16 de Febreru 2021
Darréu, Peña Manteca ta siendo'l centru d'esta pequeña ayalga pa la escalada que ye Morcín. Falábemos n'anteriores entraes de la Carba la Robra, un seutor reequipáu d'antaño, al que se-y metieron delles víes más, asina como d'un seutor nuevu na parte alta de la peña del que tuviemos la suerte de dir probando casi toes elles.
Ye tal la cantidá de xente que ta pasando pola escuela, qu'hai díes que toca pedir turnu pa probar una vía, pero nun pasé per ellí hasta esti puente, nel que sólo yera folixa antroxera en Xixón. Poro, namás que fice unes poques víes quedándome cláramente con Coladita, un 6c+ qu'amuesa a les clares l'estilu de la esguilada, física y de resistencia.
-----------------------------------------------------------------
7, 14 de Payares de 2020
Continúabemos de vacaciones morciniegues, tornando esta vegada hasta Peña Manteca que teníemos un pelín escaecíu dende cuantayá. Aprovechando que pasáronme unos croquis más actualizaos del seutor de la Carba La Robra, tornamos per ellí un par de díes, col envís d'encadenar el 6c+ (Arco Iris) que probara va tiempu con Ani y Rubén.
15 y 27 d'Agostu, 14, 22 d'Avientu de 2019 y 11 de Xineru de 2020
Morcín sigue dando grandes momentos d'escalada y nun sólo momentos, sinon grandes escueles y ye que tenemos nel Monsacru y nos sos parés munchos seutores onde poder prauticar esta pasión. Pero non sólo ye'l Monsacru, sinon que tenemos tamién Figares, Laboratoriu, La Puente ... y agora tenemos un par de seutores enfrente d'esti monte sagráu, como ye la Peña Manteca que nun va muncho cabalgábemos.
Tenemos claro y vémoslu a diariu, como l'ambiente escalador nesti
conceyu ye pergrande, siempre alcontrándonos con collacios trepamuros
nos distintos chigres ya seya de la Foz o Santolaya y ye que la
rellación de los escaladores debe ser así, col tercer tiempu en chigre y
colos chigreros interesaos na nuesa actividá.
Salta a la vista, que los deportes al aire llibre son un motor económicu pa delles zones que van perdiendo'l so texíu industrial que-yos mantuvo con vida nos últimos años. Ye d'agradecer que'l colectivu escalador eche ese cafetín enantes de xubir y esa cervecina al baxar, amosando la nuesa actividá como dalgo que valoren los vecinos del conceyu, siempre dende'l respetu y la collaboración.
Dambes escueles, na Carba la Robra (seutor Arco Iris antañu) y la más nueva en direición al colláu Bugariza, son escueles en continuu crecimientu y equipamientu, poro debemos respetar a la xente que ta faciendo un increyible trabayu, sus tiempos, sus decisiones de nun dexar esguilar si hai peligru de cayida de piedres... y siempre collaborar no que podamos.
Nel seutor superior, aparte d'un patéu bien guapu, tenemos quiciás, a mi mou de ver la meyor escuela pa iviernu de graos medios-baxos na fastera central. El trabayu que se fizo ye ablucante y la calidá y llargura de les víes son una auténtica pasada.
Casi tengo toles víes encadenaes na fastera principal de la muria y nun fice una vía fea nin mala, ya sea de V o lo que podría rondar un 7a como máximu grau de la escuela pel momentu. Como ya dixe, les dos escueles paguen la pena munchísimu, siendo esta última una ayalga pa esguilar relaxáu y plaquear con una calidá de roca brutal.
Todo tiene muy buena pinta tengo mucha illusion a ir!!
ResponderEliminarLas vías son superentretenidas y calidad de la roca brutal
EliminarBuenas, tengo ganas de visitar la zona pero no encuentro croquis, tendrás algo por ahí? Si puedes, alrali75@hotmail.es
ResponderEliminarGracias por adelantado!